සුදු සමක් සඳහා වෙහෙසීම මානසිකවද ගැටලු ඇති කරයි
ලෝකය පුරා පවතින විවිධ පාරිසරික සාධකවලට අනුකූලව මිනිසුන්ගේ සමේ පැහැයන්ද වෙනස්ව පිහිටා ඇත. ඉතාම පැහැපත් සුදු සමින් යුතු අය සේම කහ, දුඹුරු, තලෙළු, තද කළු වැනි වර්ණවලින් යුතු මිනිස් කොට්ඨාස අපට හමුවේ. මේ වර්ණ රැස අතරින් ඈත පුරාතනයේ පටන් සුදු පැහැගත් ළා පාටින් යුතු සමට කිසියම් වූ විශේෂත්වයක් හිමිව තිබිණි. ළා පැහැති සමක් හිමි අය එළිමහන් පරිසරවල නොගැවසෙන, අව්වේ වැස්සේ වැඩ නොකරන, සැප පහසුකම් සහිත ජීවිත ගෙවන කිසියම් උසස් සමාජ තත්ත්වයන්ට හිමිකම් කියූ අය ලෙස එකල සමාජවල පිළිගැනීමක් විය. යටත් විජිතවාදී යුගවල, තද කළු සමක් සහිත අප්‍රිකානු ජාතිකයන් වහලුන් ලෙස බොහෝ තාඩන පීඩනවලට පවා ලක්විය. නමුත් කාලයත් සමග මිනිසුන් වඩ වඩාත් ශිෂ්ඨාචාර ගතවෙද්දී මෙම තත්ත්වය, කෙමෙන් වියැකී ගියේය. පසුකාලීනව සමහර සුදු ජාතිකයන් තමන්ගේ වඩාත් සුදු පැහැපත් සම තරමක් අඳුරු කරගැනීම සඳහා උෂ්ණාධික රටවල අව් රැස් විඳීමට පවා පෙළඹිණි. නමුත් කාලාන්තරයක් තිස්සේ, මිනිස් සිත් සතන් තුළ පැලපදියම් වූ කළු, සුදු භේද තවමත් හොල්මන් කරන අවස්ථා අනන්තවත් තිබේ.
සුදු යනු යහපත්, හොඳ, පොහොසත් යන හැගීමත් ඊට සාපේක්ෂව කළු හම නිතරම අයහපත්, අවලක්ෂණ, දුගී යන හැගීමත් මනස් තුළ සැගව පවතී. එසේම දරුවන් කුඩා අවධියේදී අසන්නට ලැඛෙන විවිධ කතන්දර හරහාද මෙම හැගීම් වඩාත් තීව්‍ර කරන පණිවුඩ ලබාදෙයි. කුඩා කල අප අසා තිඛෙන බොහෝ කතාවල නිතරම වාගේ යහපත්, හොඳ චරිත උසස් චරිත සුදුපාටය. කුමාරිකාවන්, සුරංගනාවියන්, රජවරු සුදුය. අයහපත් නපුරු චරිත හඳුන්වාදෙන්නේ කළු පාටිනි. කුඩා කල මනසට ලබාදෙන මෙවැනි සංඥා හේතුකොටගෙන මොළයේ, යම් යම් දේ ගැන මානසික සංකල්ප උපදී. මේ ආකාරයට සමේ පැහැය හා සම්බන්ධයෙන්ද සුදු පාටට වැඩි ලකුණු ලැබේ. හොඳ සමක් යනු සුදුපාට සමක්ය. නිරෝගී, යහපත් සමක් නම් එය සුදුපාට විය යුතුය. අප හැමවිටම උත්සාහ කළ යුත්තේ සම සුදුපාට කරගැනීමටය යන අදහස් අප මනස් තුළට පිවිස තිඛෙන්නේ මේ ආකාරයටය. විශේෂයෙන්ම කාන්තාවන් ලස්සන වන්නේ සුදු සමක් හිමිකරගත්විට පමණක්ය යන හැගීම් ඉපදී ඇත්තේද ඒ ආකාරයටමය.මෙම හැගීම් තව තවත් උද්දීපනය කිරීමට, සම සුදුකර ගැනීම සඳහා ආලේපන වර්ග නිෂ්පාදනය කරන වෙළෙඳ සමාගම්වල මාධ්‍ය වැඩසටහන්ද හේතුවී තිබේ. හැකි තරම් සම සුදුකර ගැනීම හරහා ඊට සාපේක්ෂව සමාජයේ ආකර්ෂණය වැඩිකර ගත හැකි බව ඔවුන් නිරන්තරයෙන් ලබා දෙන පණිවුඩයයි. මෙම තොරතුරු වලට ආසක්ත වුණු ගැහැනුන් සේම පිරිමින්ද අද සම සුදුකර ගැනීමේ මහා සටනක යෙදී සිටින බව පෙනෙන්නට තිඛෙන කාරණාවකි. සමකයට ආසන්න රටක ජීවත්වන එසේම අපට උප්පතිතියෙන් ලැබි තිඛෙන ජාන සම්භාවයට අනුව අපට පිහිටන්නේ තරමක් තද පාට සමකි. හිරු එළියෙන් අපේ සම සේම අභ්‍යන්තර ශරීරාංග ආරක්ෂා කරදීමට මේ තද පැහැ මෙලනින් වැඩි සම අපට ලබාදෙන්නේ සුවිසල් දායකත්වයකි. මේ ආරක්ෂාවට බාධා පමුණුවමින්, සම සුදුකර ගැනීම සඳහා මේ වෙහෙසෙන්නේ කුමක් සඳහාද? ඒ වැඩි වැඩියෙන් සමාජ ආකර්ෂණය ලබාගැනීමට නොවන්නේද? කෙනෙකුට සමාජ ආකර්ෂණ ලබාගත හැකි එකම මාර්ගය සම සුදුකර ගැනී පමණක්මද? විශේෂයෙන්ම කාන්තාවක ලෙස තම ශරීරයේ හැඩය පවත්වාගැනීමෙන්, ප්‍රිය උපදවන සුළු කතා විලාශයන්, යහපත් හැසිරීම් රටාවකින්, බුද්ධි වර්ධනය මගින්, විවිධ දක්ෂකම් ඔප් නංවා ගැනී මගින්, ජීවිතයේ ගැටලුවලට සාර්ථක මුහුණදීම වැනි බොහෝ කරුණු ප්‍රවර්ධනය කරගැනීම හරහා සමාජ ආකර්ෂණය නොමදව ලබාගත හැකිය. එසේම මෙවැනි ස්ථාවර පැවැත්මක් හරහා ජීවිතයට ලද හැකි ප්‍රතිලාභද අතිමහත්ය. සමේ පැහැපත් බව වැඩිකර ගැනීම, සම සුදු කරගැනී ස්ථාවරව පවතින්නක් නොවේ. විවිධ ආලේපන වර්ග හරහා යම් තරමකට සම සුදුකරගත හැකි වුවද එය තාවකාලිකය. සමේ විවිධාකාර ගැටලුවලට මගපාදාගනිමින්, තාවකාලිකව සම සුදුකර ගැනීමට වෙහෙසවීම මගින් ඇති ප්‍රතිඵලය කවරක්ද? එසේම සුදු සම වඩාත් නිරෝගීය, සුදු සමක් සහිත වූ විට එමගින් අඩු වයසක් දිස්වේය යන මතයද සමාජය තුළ පවතින්නකි සුදු සමකට වඩා මෙලනින් වැඩි තද පැහැති සම බාහිර පාරිසරික සාධකවලට හොඳින්ම ඔරොත්තු දෙන්නකි. එසේම සම සුදු වූ පමණින් අඩු වයසක් දිස්වේය යන මතයද කෙසේවත් නිවැරදි නොවේ.
සම සුදුකර ගැනීම සඳහා අනවශ්‍ය තරමට ලතවෙමින්, ඒ සඳහා අනවශ්‍ය ලෙස වෙහෙස මහන්සිවීම මානසිකවද එතරම් යහපත් නැත. දිගින් දිගටම මේ හා සම්බන්ධයෙන් මානසිකව අසහනකාරීවීම විවිධ මානසික ආබාධ තත්ත්වයන් දක්වා දුරදිග යා හැකිය. උප්පත්තියෙන් තමන්ට ලැඛෙන සම නිරෝගීව, එහි ප්‍රභාව වැඩෙන අයුරින් පවත්වාගෙන යාම වඩාත් නිවැරදි ක්‍රමයයි. එසේ නොමැතිව සුදු වීමට යැයි අනවශ්‍ය ගැටලුවක් මවා ගෙන නිකරුණේ තම කාලය, ශ්‍රමය සේම මුදල් ද වැය කරමින් ලතැවීම ගැටලු රැසකටම මගපාදන්නක් බව කිව යුතුමය.
උපුටා ගැනීම ලක්බිම පුවත් පත
