සමට සහ හිසකෙස් රෝගවලට රෝස වතුර

ගෙවත්ත හැඩ කරන මල් කුමරියන් අතර රෝස මල්වලට වැඩි ඉඩකඩක් හිමි වෙනවා. ඒ විතරක් නෙමෙයි රෝස ඔබේ රුව හැඩ කරන්න හා ඖෂධයක් ලෙසත් භාවිතයට ගන්නවා.

රෝස වතුර : 

ඉතා හොඳ රූපලාවණ්‍ය සත්කාරයක් සහ ප්‍රතිකාරයකි. රෝස පෙතිවල සාරයෙන් රෝස වතුර හා රෝස තෙල් සාදාගෙන සිරුර අභ්‍යන්තරයට හා බාහිරවද සත්කාර කරයි.

භාවිතය : 

රෝස මල් පෙතිවලින් විවිධ රූපලාවණ්‍ය නිෂ්පාදන හා ආහාර රසකාරත් නිපදවයි. ඇතැම් ඔෟෂධීය සත්කාර වලදීත් රෝස පෙති යොදා ගනියි. මෙතරම් ප්‍රයෝජනවත් රෝස මල් ඔබට ක්‍රම රැසකින්ම පිළියෙල කර ගන්නත් පුළුවන්. 

නිවෙසේදීම සාදාගන්න : 

මුලින්ම ඔබ ගන්නා ජලය හා භාජනද පිරිසුදු වීම වැදගත්. 

අවශ්‍ය ද්‍රව්‍ය: 

• රෝස පෙති 50
• ආසවනයෙන් වෙන් කළ වතුර (වතුර නටවා (100 C) එම හුමාලයෙන්) ගත් වතුර. 

පිරිසුදු කර ලබාගත් වතුර ළිප තබා 100 C උෂ්ණත්වයේ නටවා ගන්න. දැන් ළිප නිවා එයට රෝස පෙති එක් කරන්න. එය මඳ වේලාවක් වසා තබා රෝස පෙති හුමාලයෙන් තැම්බීමට හරින්න. එය නිවුණු පසු පියන විවර කළ විට රෝස පෙතිවල වර්ණය ජලයට මිශ්‍ර වී රෝස පෙති සුදු පැහැවිය යුතුයි. එම වතුර පෙරහනයකින් එක්වරක් පෙරන්න. නැවැත එම වතුර පෙරහන් කඩදාසියකින් පෙරා ගන්න. 

බෝතල් කිරීම : 

මෙලෙස සාදාගත් රෝස වතුර විසබීජ ඉවත් කර පිරිසුදු කරගත් කුප්පිවලට පුරවා ගන්න. (එක බෝතලයකට පමණක් දැමූ පසු එය විටින් විට විවෘත කිරීමේදී විසබීජ ඇතුළු වී එය ඉක්මනින් නරක් වෙයි.) ඉන් පසුව එම බෝතල් ශීතකරණයේ තබා තම අවශ්‍යතාව අනුව පාවිච්චියට ගන්න. මෙය මාස 6ක් හෝ අවුරුද්දක් පමණ තබා ගැනීමට හැකියි.

සත්කාර : 

දැන් මෙම රෝස වතුර සමට පමණක් නොව හිසකෙස්වලට නිරෝගී බවටත් සත්කාරයක් ලෙස භාවිත කළ හැකියි. අතිශයින්ම පිරිසුදු රෝස වතුර ඇස් ලෙඩවලදී දෑස් හොඳින් සේදීමටත්,  මුහුණ පිරිසුදු කරන ක්ලේන්සර් එකක් ලෙසත්, ආසාදිත කුරුළෑ සහිත සම හොඳින් පිරිසුදු කර ගැනීමටත් භාවිතයට ගන්න පුළුවන්. 

හිසකෙස්වලටත් : 

සමට මෙන්ම හිස සෝදා හිස්හොරි මර්දනය කිරීමටත් මෙය කදිම සත්කාරයකි. හිසකෙස් හොඳින් සෝදා ගත් පසුව රෝස වතුරින් හිසකෙස් සෝදා දිලිසෙන නිරෝගී බවක් ලබා ගන්න ඔබටත් පුළුවන්.

මව්බිම