ගර්භණී සමයට පමණක් සීමා වූ බාහිර වෙනස්වීම්
පොදුවේ ගත් විට ගර්භණී සමයේදී සිරුරේ පිටත දැකිය හැකි පැහැදිලි වෙනස්කම් මතුවීම දැකගත හැකිය. සම මත නිය සහ කොණ්ඩයේ ඇතිවන මේ වෙනස්වීම් තාවකාලික වන අතර ගර්භණී සමයෙන් පසුව ඉවත් වී යනවා. ගර්භණී සමයේදී සිදුවන පොදු වෙනස්කම් සිරුර පුරාම දකින්න පුළුවන්. තද කළු ලප, තන පුඩු, කලවා සහ පියයුරුවල දකින්න ලැබෙනවා. ගුරු පැහැ ලප මුහුණේ බෙල්ල වටේ සහ නාසය, නළලේ, උදරය මැදත් දැකිය හැකියි. ස්ට්‍රේච් මාර්ක් සහ කුරුලෑත් මේ අතරින් ප්‍රධානයි. ඒ වගේම කකුල්වල, එක තැනකින් පටන් අරගෙන ළා නිල් පාටට එන ශිරා වර්ග දකින්න පුළුවන්. ඒ වගේම කොණ්ඩයේ සහ නියපොතුවලත් වෙනස්කම් එනවා. මේ සියලුම වෙනස්කම්වලට හේතුව හෝමෝන වෙනස් වීමයි. නමුත් සමහර වෙනස්කම්වලට හේතුව මොකක්ද කියන කරුණ තවම සොයාගෙන නැහැ. හුඟක් වෙලාවට සමේ මෙලනින්වල වෙනස් වීම් වෙන්න පුළුවන්. මෙවැනි වෙනස්කම් තිබෙන ගර්භණී මවුවරුන් අව්වට යද්දී ටිකක් පරෙස්සම් වෙන්න. අධික ලෙස කුරුලෑ එනවා නම් දිනකට දෙවරක් මඳ උණුසුම් ජලයට ෆේෂ් වොෂ් දාලා මුහුණ සෝදන්න. කුරුලෑ කඩන්න තුවාල කරන්න එපා. නමුත් කිසිම හේතුවක් මත ප්‍රතිකාර පිණිස වෙළෙඳපොළේ ඇති ද්‍රව්‍ය වෛද්‍ය උපදේශයක් රහිතව ගන්න, බීමට හෝ ගෑමට සුදුසු නැහැ. ඒ වගේම හෝමෝන තෙරපි කිරීමත් සුදුසු වන්නේ නැහැ. හුඟක් වෙනස්කම් දරුවා ලැබීමත් එක්කම නැති වී යනවා. කකුල්වල සහ යෝනි මාර්ගයේ ශිරා මතු වන්නේ රුධිර ගමනය වේගවත් වීම නිසයි. නිතර දුර ඇවිදීම, සිටගෙන සිටීම, කකුල් පහතට එල්ලාගෙන සිටීම නිසා මෙම තත්ත්වය වැඩි වෙනවා. නමුත් ව්‍යායාම, කෙටි දුරක් ඇවිදීම, පිහිනීම වැනි කටයුතු මඟින් මේ තත්ත්වය පාලනය කරගත හැකියි. කොණ්ඩය දික්වීමත්, නියපොතු දික්වීමත් ගර්භණී සමයේදී දකින්න පුළුවන්. සමහර විට මුහුණ පුරා දෙපා සහ දෑත්වලත් කෙස් ඇති වෙනවා. නමුත් දරුවා ලැබුණු පසුව කොණ්ඩය ගැලවී යෑමත්, නියපොතු කැඩීමත් සිදුවන අතර එය ටික දිනකින් සාමාන්‍ය මට්ටමට පත්වෙනවා. මීට අමතරව රතු පැහැ ලප සහ බිබිලිත් මතුවනවා. තැන් තැන්වලින් පටන් අරගෙන එකතු වෙලා කලවා සහ පියයුරු දක්වා පැතිරීම දැකිය හැකියි. මෙයට හේතුව ප්‍රතිශක්තිකරණ පද්ධතියේ අසාමාන්‍යතාවක් නිසයි. එය ගර්භණී සමයෙන් පසුව සාමාන්‍ය තත්ත්වයට පත්වෙනවා.
උපුටා ගැනීම මව්බිම
