වියළි සමට ආයුර්වේද ප්‍රතිකාර ඖෂධීය මිරිස් ගුළිය
මිරිස් ගුළිය කියන්නේ ගැමි ගෙදරක කුස්සියේ තිබෙන ජනප්‍රිය ආහාර රසකාරකයක්. රස ආහාර වේලක් වගේම ඖෂධීය ගුණාංග රැසක් මිරිස් ගුළියෙන් ලබාගන්න පුළුවන්. මිරිස් ගුළිය හදන්න කොත්තමල්ලි, සූදුරු, මාදුරු ගන්නවා. ඊට අමතරව උළුහාල්, කරාබුනැටි, රම්පේ, කරපිංචා, වියළි මිරිස්, ලුණු වගේ දේවල් අවශ්‍යයි. මේ සියල්ලම ඇල් දියෙන් අඹරලා ගන්න පුළුවන්. සාමාන්‍යයෙන් මිරිස් ගුළිය මිරිස් අඹරන ගල උඩින් තමයි තියන්නේ. නමුත් මැටි භාජනයක වුණත් තියලා තියෙනවා. ආහාර පිසින විට ටික ටික දැමිය හැකියි. මෙය වැඩි කාලයක් තියා ගන්න අමාරුයි. ලුණු මිශ්‍ර නිසා දවස් තුනක් පමණ තබා ගන්න පුළුවන්. රෝගී අයට මේ මිරිස් ගුළිය එතරම්ම සුදුසු නැහැ. යම් යම් රෝගවලට වැඩියෙන් ප්‍රතිකාර ලබන අවස්ථාවලදී මිරිස් ගුළියට ගන්න වියළි මිරිස් ප්‍රමාණය අඩු කරනවා. ඒ හැර ඕනෑම කෙනකුට මෙම රසකාරකය ඉතාම ගුණදායකයි. ආහාර රසවත් කරනවා. ආහාර දිරවීමද ඉක්මන් කළ හැකියි. ඒ වගේම ආහාර කල්තබා ගැනීමේ ගුණ සහිතයි. ලුණු මඟින් සෙම ඉවත් කරනවා. සෙම, උණ, සෙම්ප්‍රතිශ්‍යාව නිතරම තිබෙන අයට ලුණු ටිකක් වැඩිපුර දාන්න පුළුවන්. බඩ විරේක කරන ඖෂධයක්. සම වියළීම තරුණ වයසේ ඉන්න කාටත් තිබෙන ගැටලුවක්. රූපලාවණ්‍ය ගැන හිතන බොහෝදෙනා සම වියළීම නිසාම විවිධ අපහසුතාවලට ලක්වෙනවා.
සම වියළීම :
සම වියළීම කාන්තාවන්ගෙ මෙන්ම පුරුෂයන්ගෙත් විවිධ කාලවල දක්නට ලැබේ. මුල් කාලයේ නොතිබුණත් තරුණ කාලයේදී ඇති විය හැකිය. ස්නේහශ්‍රාවී ග්‍රන්ථිවල අඩපණ වීම මෙයට හේතුවයි. එනම් සම මතුපිට තෙල් ශ්‍රාවය නිසි අයුරින් නොවීමයි. මෙහි ලක්ෂණ ලෙස සමේ දිලිසෙන ස්වභාවය අඩු වීම, සම රළු වියළි වීම, නිය පිටින් ඉරක් ඇඳි විට සුදු පැහැයෙන් දිස්වීම, කොරළ මතුවීම, සම ඉරිතළා ගිය ස්වරූපය දක්නට ලැබේ. පාරිසරික උණුසුම හා තෙතමනයේ බලපෑම, ආහාරපාන, සමහර ඖෂධ වර්ග, ජලය අඩුවෙන් පානය කිරීම, සම සේදීමේදී සහ ස්නානයේදී සිදුවන වැරැදි හේතුවේ. සම වියළීම නිසා සම පහසුවෙන් වයසට යෑම, රැලි වැටීම ඉක්මන් වීම, වියළි බව නිසා පහසුවෙන් පැළීම, කඩතොලු වීම හා ඉරිතැළීම ඉක්මනින් සිදුවේ.
ප්‍රතිකාර :
1. සම වියළි නම් දිනපතා බීමට ගන්නා ජල ප්‍රමාණය වැඩි කළ යුතුය.
2. සමෙහි තෙතමනය ඇති කරන ආහාර වන පිපිඤ්ඤා, පැණි කොමඩු, කැකිරි, සාරණ, නිවිති, වැනි ආහාර එකතු කර ගන්න.
3. දිනපතා ස්නානය ගැටලුවක් නැති මුත් සමට යොදන පිරිසුදුකාරක කෙරෙහි අවධානය යොමු කරන්න.
4. ඇඟ සේදීමෙන් අනතුරුව සමේ තෙතමනය රැකදෙන ක්‍රීම් වර්ගයක් ආලේප කරන්න.
5. රණවරා, නෙල්ලි රසකිඳ, බෙලිමල්, ඉරමුසු, පාන වර්ග.
6. පැණිකොමඩු යුෂ, කැරට් යුෂ, තක්කාලි යුෂ, පිපිඤ්ඤා යුෂ, සැල්දිරි, තැඹිලි යුෂ ආදී යුෂ දිනපතා පානය.
7. ස්නානයේදී රත්මල් කැකුළු, බෙලි කොළ, රෝස මල් පෙති වැනි දෑ තම්බා ඇඟ සේදීම.
8. සතියකට වරක් ස්නානයකට පැය දෙකකට පෙර තල තෙල් ගා ශරීරය සම්බාහනය කිරීම. මින් ස්නේහ ශ්‍රාවී ග්‍රන්ථි උත්තේජනය වේ.
9. ස්වේද කර්ම හෙවත් ඇඟේ දහදිය පිට කරන ක්‍රමවේද සිදු කිරීම.
උපුටා ගැනීම මව්බිම
