නැති ලෙඩ ඇති කරන සුදු වෙන්න ගාන
රූපලාවන්‍ය ආලේපන අමු ද්‍රව්‍ය 420 ක් අහිතකරයි - ප්‍රමිති ආයතනයේ අධ්‍යක්ෂිකා සතරසිංහ
බො‍ෙහා් ආලේපනවල රසදිය වැඩිපුර අඩංගුයි - පරිසර විද්‍යාඥ හේමන්ත විතානගේ
ආයුර්වේදයේ හම සුදු වීමට බෙහෙත් වර්ග නැහැ - මහාචාර්ය අනුර තිසේරා
සැබෑම සුන්දරත්වයට කවුරුත් ප්‍රියයි. දුටුවන් නෙත් සිත් ඇඳ බැඳ තබා ගැනීමට ශරීරයේ සුන්දරත්වය මහෝපකාරී වෙනවා. “ඔයා අද හරිම ලස්සනයි” මේ විදිහට අහන්න අපි කවුරුත් කැමැතියි. ලස්සන වෙන්න කවුද අකැමැති. ඒත්... ලස්සන ගැන තැවෙන බොහෝ යුවතියන් කාන්තාවන් වගේම පිරිමින් පවා අද සමාජයේ සිටිනවා. තමාගේ හමේ පැහැය ඔපවත් කරගන්න හැඩ වැඩ වෙන්න මේ නිසාම මොවුන් විවිධ රූපලාවණ්‍ය උපාංගවල සහාය පතන එක දිනෙන් දින වැඩි වන බව මිසක අඩු වන බවක් නම් පේන්නෙ නෑ. ලස්සන වෙන්න උත්සාහ දරන හුඟ දෙනෙකුටම තිබෙන ප්‍රධාන ගැටලුවක් තමයි සමේ පැහැය පිළිබඳ ප්‍රශ්නය. උපතින්ම තමන්ට ලැබුණු සමේ පැහැය ඉතාමත් කෙටි කලකදී වෙනස් කළ හැකි ද? එසේ කළ හැකිනම් එය සමට හිතකර ද? මෙය අද බොහෝ දෙනෙකුට ගැටලුවකි. අද වන විට සමාජයේ සම සුදු පැහැ ගැන්වීම ලස්සන වීමේ ප්‍රධාන අංගයක් ලෙස සලකා කටයුතු කරන පිරිස බොහෝය. ඒ සඳහා භාවිත කරන සම සුදු වීමේ ආලේපන පිළිබඳව දෙවරක් නොව තුන් වරක් සිතා බැලිය යුතු කාලය එළැඹ ඇත. ඒ එයට නිදසුන් සමාජයෙන්ම සපයන බැවිනි. තම මුහුණ පැහැපත් කර ගන්නට රූපලාවණ්‍ය සත්කාරයක් සිදුකර ගැනීමට මීගමුව රූපලාවණ්‍යාගාරයකට ගිය වයස තිස් තුනක තරුණ ගුරුවරිය ඇගේ මුහුණ සුදු කිරිමට ගැල් වූ ක්‍රීම් වර්ග විෂ වී අවාසනාවන්ත ලෙස මියගියේ පසුගියදාය. මෙම රූපලාවණ්‍ය ද්‍රව්‍ය හා සත්කාරක සේවා කටයුතු එය සිදුකරන වෙළෙඳුනට ධන උල්පතක් සැපයුව ද පාරිභෝගිකයනට මරු කැඳවූ අවස්ථා ගණනාවක්ම පසුගිය කාලයේ අසන්නට ලැබිණි. සම සුදු කිරීමේ ආදීනව පිළිබඳව යළිත් වරක් කතාබහට ලක්කළ යුතු කාලය එළැඹ තිබේ. එනිසාම ඒ පිළිබඳ කටයුතු කරන පාර්ශ්වයන් කීපයකින් මේ පිළිබඳව අදහස් විමසා බැලීමට අපි කටයුතු කළෙමු.
ශ්‍රී ලංකා ප්‍රමිති ආයතනයේ අධ්‍යක්ෂිකා එස්. එන්. සතරසිංහ මහත්මිය මේ පිළිබඳව දරන්නේ මෙවැනි අදහසකි.
“ජාත්‍යන්තර පර්යේෂණයන්ට අනුව දෙස් විදෙස් රූපලාවණ්‍ය නිෂ්පාදන සඳහා භාවිත කරන අමුද්‍රව්‍ය අතුරින් භාවිතයට ගැනෙන අමුද්‍රව්‍ය 420 ක් පමණ මිනිස් ශරීරයට අහිතකර ඒවා බව ඔප්පු වී තිබෙනවා. අද වන විට එම තත්ත්වය වැඩි වී තිබුණොත් මිස අඩු වී නොමැති බවක් මේ හරහා අනතුරු ඇඟවෙනවා. රූපලාවණ්‍ය සම්බන්ධ කොස්මෙටික්ස් ලංකාවට ගෙන්වනවානම් හෝ ලංකාවේ නිෂ්පාදනය කරනවානම් ඒ පිළිබඳව (CDDA) විලවුන් සහ ඖෂධ අධිකාරියේ එම රූපලාවණ්‍ය ද්‍රව්‍ය ගෙන්වන, නිෂ්පාදනය කරන පුද්ගලයා හෝ ආයතනය සාමාජිකත්වය (රෙජිස්ටර් වීම) ලබාගත යුතුය. එහිදී ඔවුන් ජාතික ප්‍රමිතීන් භාවිතයට ගෙන මේ දේවල් පරීක්ෂා කර රෙජිස්ටර් කිරීම සිදු කරනවා. ශ්‍රී ලංකා ප්‍රමිති ආයතනය වශයෙන් ජාතික ප්‍රමිතීන් සම්පාදනය කිරීමයි ප්‍රමිති ආයතනය මඟින් සිදුවන්නේ. මෙය අපි තනිව සිදුකරන දෙයක් නෙවෙයි. ජාත්‍යන්තර පිළිගත් ක්‍රමවේදයන් මතයි ඒ ක්‍රියාවලිය සිදුවන්නේ. එහි දී අදාළ පාර්ශ්වයන් ගෙන් සැදුම්ලත් කමිටු හරහා ඒ ද්‍රව්‍යයන් පරීක්ෂා කොට අදාළ ප්‍රමිතීන් සාකච්ඡා කිරීමෙන් සකස් කෙරෙනවා. මේ සියලු දේ අවසානයේ එම ද්‍රව්‍ය, සේවාව පිළිබඳ මහජන අදහස් ලබා ගැනීමේ පියවරක් ද අප අනුගමනය කරනවා. ඉන්පසු විශේෂඥයින් ගෙන් සැදුම්ලත් මණ්ඩලයක් මඟින් අදාළ භාණ්ඩය, ද්‍රව්‍යය ප්‍රමිතිගත කෙරෙනවා. එලෙස සැකසු ප්‍රමිතීන් 2000 ක් පමණ තිබෙනවා. භාණ්ඩ සඳහා භාවිත සංග්‍රහයත් රූපලාවණ්‍ය ද්‍රව්‍ය සඳහා SLS 457 ප්‍රමිතියත් මේ අනුව අපි හඳුන්වා දී තිබෙනවා. එහි කොටස් 2 ක් අන්තර්ගත වෙනවා. ඉන් පළමුවැන්න වර්ණක ද්‍රව්‍ය භාවිත කරන ආලේපන සඳහා සුදුසුයි කියා හඳුනාගත් වර්ණක මොනවා ද යන්න. දෙවැන්න, වර්ණක හැර භාවිත කරන අනෙකුත් අමුද්‍රව්‍ය මොනවා ද? එහිදී භාවිත නොකළ යුතු දේවල් මොනවා ද යන්නත්ය. භාවිත කරනවානම් යම් යම් තත්ත්වයන් යටතේ භාවිත කළ හැකි ද්‍රව්‍ය පිළිබඳවත් දැනුවත් කර තිබෙනවා. මේ ප්‍රමිතීන් පිළිබඳ කාරණාවත් රූපලාවණ්‍ය ද්‍රව්‍ය නිෂ්පාදනය කරන සහ ගෙන්වන අය දැන සිටීම ඉතාම වැදගත් වෙනවා. එහිදී අවසානයේ එම භාණ්ඩය, ද්‍රව්‍ය පරිහරණය කරන පාරිභෝගිකයාට එම ද්‍රව්‍යය විශ්වාසයෙන් යුතුව ලබා ගැනීමට අවස්ථාව උදා වෙනවා. ප්‍රමිතීන් පිළිබඳව වැඩි විස්තර www.slsi.lk වෙබ් අඩවියෙන් තොරතුරු ලබා ගන්න පුළුවන් නැතිනම් ප්‍රමිති ආයතනයට දුරකථනයෙන් කතා කර දැනගැනීමට හැකියාව තිබෙනවා.”
ශ්‍රී ලංකා පරිසර යුක්ති කේන්ද්‍රයේ (CEJ) විධායක අධ්‍යක්ෂ හේමන්ත විතානගේ මහතා හම සුදු කිරීමට යොදා ගන්නා ක්‍රීම් වර්ග පිළිබඳව දරන්නේ මෙවන් අදහසකි.
“අපි ආයතනය මඟින් පසුගිය දෙසැම්බර් මාසයේ මාධ්‍යයට නිකුත් කළ, රූපලාවණ්‍ය සඳහා භාවිත කරන හම සුදු වීමට ආලේප කරන ක්‍රීම් වර්ගවල රසදිය අඩංගුයි කියන වාර්තාව. අපි තායිලන්තය, චීනය, පිලිපීනය, තායිවානය වගේ රටවල නිෂ්පාදනය කර මෙරටට ගෙන්වන හම සුදු කිරිමට භාවිත කරන ක්‍රීම් වර්ග සහ ලංකාවේ නිපදවන ක්‍රීම් වර්ග පරීක්ෂාවට ලක්කළා. විශේෂයෙන් පිටරටින් ආනයනය කරන ක්‍රීම් වර්ග තුළ භාවිතයට නුසුදුසු ලෙස වැඩි වශයෙන් රසදිය අඩංගුව පවතින බව එහිදී අනාවරණය වුණා. මේ පිළිබඳව මාධ්‍ය හරහා අපි ජනතාව දැනුවත් කළා. ඒ අනුව ඖෂධ හා විලවුන් අධිකාරියට එන්තරවාසියක් ද නිකුත් කිරිමට අපි පියවර ගත්තා. මෙය බොහොම ආන්දෝලනයක් ඇතිකළ පුවතක් බවට පත්වුණා. හම සුදු කරන ක්‍රීම් වර්ග සාම්පල් 46 ක් පරීක්ෂා කර බැලු විට එයින් 25 කම රසදිය විශාල වශයෙන් අඩංගුව තිබුණා. ඒවායේ මිලියනයකට රසදිය කොටස් 30000 ක් වෙනකම් තිබෙන ක්‍රීම් වර්ග හමුවුණා. ඒවා සඳහා විලවුන් හා ඖෂධ අධිකාරියෙන් වසර 4 ක කාලයක් සඳහා අනුමැතිය ලබා දී තිබුණා. පරීක්ෂාවකින් තොරවයි එලෙස අවසර ලබා දී තිබෙන්නේ. ඒ වගේම, මේ ආකාරයට සම පැහැපත් කර ගන්නට වෙළෙඳපළේ තිබෙන ආලේපන වර්ගවල බැර ලෝහ විශාල වශයෙන් අන්තර්ගත වෙනවා. ඒවා ශරීරයේ හම මතුපිට ආලේප කළ විට විවිධ රෝගාබාධයන්ට ගොදුරු වීමේ ඉඩකඩ වැඩියි. මේ ආලේපන සඳහා යොදාගන්නා අමුද්‍රව්‍යවල රසදිය, ඊයම්, ආසනික් සහ කැඩ්මියම් වැනි බැර ලෝහ අන්තර්ගත වෙනවා. මේවායේ කොපමණ ප්‍රමාණයක් ක්‍රීම්වල අඩංගු විය යුතු ද යන්න සොයා බැලීමේ ක්‍රමවේදයක් තවමත් අප රටේ නැහැ. ඇමෙරිකාව වැනි රටක් ගත්තොත් එරටට ගෙන එන ඕනෑම ද්‍රව්‍යයක්, භාණ්ඩයක්, ආහාරයක් ඉතා හොඳින් පරීක්ෂාවට භාජනය කරලා මිනිස් ශරීරයට සුදුසු ද කියන එක මත තමයි ජනතාවට එම දේ මුදා හරින්නේ. අපේ රටේ විලවුන් හා ඖෂධ අධිකාරිය මේ සඳහා ප්‍රමිතියක් හදලා තිබුණත් තවමත් ඒවා නීතිගත කරලා නැහැ. ඩ්‍රාෆ්ට් එකක් පමණයි තිබෙන්නේ. කොහොම නමුත් හම සුදු කිරිම සඳහා භාවිත කරන, මෙරටට ගෙන්වූ ක්‍රීම් වර්ග පිළිබඳ අපි කරන ලද පරීක්සණ ඔස්සේ ලබාගත් තොරතුරු පිළිබඳව වැඩි විස්තර දැනගැනීමට www.ejustice.lk වෙබ් අඩවිය හරහා ඕනම අයකුට බලා ගන්න පුළුවන්. ඒ වගේම, අපේ හමට කරනු ලබන ප්‍රතිකාරයන් ශරීරයේ හැමදේටම බලපානවා. බොහොම ඉක්මනින් ඒවා ශරීරගත වෙනවා. යම් හෙයකින් මේ බැර ලෝහ ලේවලට ලේ විෂ වුණහොත් හමේ ආසාත්මික තත්ත්වයන් ඇතිවීමට ඉඩකඩ පවතිනවා. එසේ නැතිනම් ස්නායු පද්ධතියට ඇතුළුවීම මේ ආලේපන ගැල්වීමෙන් උදාකර ගන්නා නරකම අවස්ථාවයි. ඕනෑවට වඩා රසදිය ශරීරයට ඇතුළු වුණොත් අතපය වෙව්ලීම, ශරීරය දුර්වල වීම, මතකය හීනවීම, හමේ රෝග, වකුගඩු ක්‍රියාකාරිත්වය දුර්වල වීම සිදු වෙනවා.”
ගම්පහ වික්‍රමාරච්චි ආයුර්වේද වෛද්‍යායතනයේ මහාචාර්ය අනුර තිසේරා මහතා මේ පිළිබඳව අදහස් දක්වා සිටියේ මෙසේයි.
ආයුර්වේදය තුළ හම සුදු වීමට බෙහෙත් වර්ග නැහැ. සම පැහැපත් කරන බෙහෙත් තමයි තිබෙන්නේ. ආයුර්වේද බෙහෙත් හරහා හම සුදු කරනවා කියන එක බොරු මිථ්‍යා විශ්වාසයක් පමණයි. ආයුර්වේදයේ අඩංගු රූපලාවණ්‍ය බෙහෙත් ද්‍රව්‍යවලින් සමේ පැහැපත් බව රැකගැනීමට පමණයි උපකාර කරන්නේ. හම සුදු වෙන්නත් පුළුවන් කළු වෙන්නත් පුළුවන් පැහැපත් බව රැකගත හැකියි. අද රුව වඩන වෙළෙඳ භාණ්ඩ සඳහා ආයුර්වේදයේ නම යොදාගෙන ජනතාව මුළා කරන බව පෙනෙනවා. ආයුර්වේදයේ සම පැහැපත් කරන අමුද්‍රව්‍ය කිහිපයක් එකතු කරලා ආලේපන හදලා තිබෙන්න පුළුවන්. නමුත් ඒ විදිහට එකතු කළ පමණින් ආයුර්වේද නිෂ්පාදනයක් හෝ ඖෂධයක් බව කීම නිවැරැදි නැහැ. ආයුර්වේද ඇතිවුණේ ඉන්දියාවේ. උතුරු ඉන්දියාවේ සිටින හුඟ දෙනකුගේ හම පැහැපත්. ඉන්දියානු ආයුර්වේදයේ පවා ඇත්තේ සම පැහැපත් කිරීමේ ද්‍රව්‍ය පමණයි. හම සුදු කරනවා කියන දේ බොරු. හම සුදු කරනවා කියා වෙළෙඳපළට එන ආලේපන පරිහරණය කිරීම තුළින් සිදුවන්නේ සමට හානිකර විෂ ද්‍රව්‍ය මඟින් අපේ ශරීරයේ තිබෙන උඩු හම ඉවත් කිරීමයි. එය ශරීරයට බොහෝ දුරට හානි වෙන්න පුළුවන්. සාමාන්‍යයෙන් අපි පැහැපත් සමක් කියන්නේ, හම රැලි වැටී නොතිබීම සහ මලානික බවකින් තොර වීමයි. ඡවි කල්‍යාණය රැකගැනීම මෙයින් අපි අර්ථවත් කරනවා. මේ නිසා සමේ වර්ණය කියන දේ අපි උපතින්ම ලබනවා. ශරීරයේ ප්‍රකෘතීන් කියා දෙයක් තිබෙනවා. එක් එක් පුද්ගලයාගේ ශරීරයට ආවේණික ශරීර ප්‍රකෘතීන් තිබෙනවා. ඒ ප්‍රකෘතීන් අනුව තමයි අපේ ශරීරයේ වර්ණය තීරණය වන්නේ. ඒ නිසා එම ශරීර ප්‍රකෘතියට බෙහෙත් කරන්නට යාම හරියට මම නම් දකින්නේ පරිසරය වෙනස් කරලා එයින් පීඩා විඳින්නට සිදු වෙනවා වගේ දෙයක් ලෙසයි. ඒ වගේ තත්ත්වයක් තමයි ශරීරය සුදු පැහැ ගැන්වීම කියන කාරණය. ඕනම කෙනකුගේ හිත පිරිසුදු නම් ඔවුන්ගේ හම නිරතුරුවම පැහැපත් වෙනවා.”
උපුටා ගැනීම සිළුමිණ පුවත්පත
