නව යොවුන් වියේ සමට කෘත්‍රිම ආලේපන සුදුසු නැහැ
කාලය අඩුයි :
පාසල් වියේ පසුවන බොහෝ යුවතියන් කොණ්ඩයට පවා විවිධ විලාසිතා එක්කර ගනිමින් හැඩවීමට වැඩි කැමැත්තක් දක්වනවා. නමුත් ඔබ වැඩි වශයෙන් පාසල් කටයුතුවල නිරතවීම හා වෙහෙසීම නිසාත් සත්කාර සඳහා යොමුවීමට ඇත්තේ සීමිත කාලයකි. ඒවගේම ඔබ දෛනිකව ගන්නා ආහාර පිළිබඳත් ඔබේ එතරම් අවධානයක් නම් යොමු නොවේ.
පෝෂණය අඩු වුණොත් :
මෙලෙස වැඩෙන වයසේ පසුවන ඔබට ලැඛෙන පෝෂණයේ අඩුවීමත් සමඟම සම අවපැහැ ගැන්වීමට වුවද ලක්වීමට පුළුවන. එමෙන්ම නිතර හිරු රශ්මියට නිරාවරණය වීම හා දහදිය දැමීම නිසාත් සමට කුණු දූවිලි ඇතුළු වෙයි. මවක් වශයෙන් මේ වියේ පසුවන දියණියන් පිළිබඳ සැලකිලිමත් විය යුතු වන්නේත් මෙනිසාමය. ඇයගේ පිරිසුදුභාවය හා පෝෂණය පිළිබඳ අවධානය යොමු කරමින් ඇය සුන්දර නිරෝගී දියණියක් බවට පත් කිරීමේ වගකීම මවක් ලෙස ඔබට පැවරෙන දෙයකි. නමුත් අද බොහෝ යුවතියන් එදාට වඩා තම රූ සපුව ගැන සැලකිලිමත්ය. ඔවුන් නිතරම විලාසිතා කිරීමටත් ඒවා අනුගමනය කිරීමටත් නිතරම පෙලඹෙයි. එහිදී හිස, සම පමණක් නොව සිරුරේ නිසි හැඩය පවත්වා ගැනීමටත් වැඩි අවධානයක් යොමු වේ. මෙහිදී ඔබ වඩාත් සැලකිලිමත් විය යුතු වන්නේ පිරිසුදුකම පිළිබඳය. ඒ සඳහා නිසි සෞඛ්‍ය පුරුදු ඔබේ ජීවිතයට ළඟාකර ගැනීම වැදගත්ය.
* දිනකට දෙවරක් දත් මැදීම.
* දිනපතා හිස හොඳින් සෝදා පිරිසුදු වීම.
* ඔබ දෛනිකව අව්රශ්මියට නිරාවරණය වීම හෝ විවිධ ක්‍රීඩාවල නිරත වන නිසාත් දිනපතා ස්නානය කර පිරිසුදු වීම වඩාත් සුදුසුය.
සන්ස්ක්‍රීම් එකක් :
නිතර අව් රශ්මියට හසුවන නිසා ීමබ ජරු්ප එකක් ආලේප කර උදෑසන නිවෙසින් පිටව යා හැකි නම් එය ඔබේ සමටද ආරක්‍ෂාවක් සැපයේ. නිතර දහදිය දමන නිසා දහදිය දුගඳ පාලනයට ඩියෝඩ්රන්ට් දිනපතා ආලේප කිරීමට හැකි නම් එයද වඩාත් සුදුසු වන්නකි. එය ඔබට දවස පුරා සුගන්ධවත්ව සිටීමට ඉවහල් වෙයි. මෙම ඩියෝඩ්රන්ට් ආලේප කිරීමට පෙර කිහිලිවල ඇති අනවශ්‍ය රෝම ඉවත් කිරීමටද වගබලා ගන්න.
* නිය පොතු කපා නිය පිරිසුදුව තබා ගැනීම.
* දිනපතා තුවා පිරිසුදු කර භාවිතයට ගැනීම.
* තම ඇඳුම් දිනපතා පිරිසුදු කිරීම.
* ඔබටම වෙන්වූ වෙනම පනාවක් නිතර පිරිසුදු කර භාවිතයට ගැනීම.
පිරිසුදුකම :
දිනපතා ස්නානය කරන නිසා කොණ්ඩය පීරීමේදීද පිරිසුදු කළ පනා වර්ග භාවිතයට හුරු වන්න. එවිට ඔබේ හිස හිස්හොරි, උකුණන් හා විවිධ ආසාදන තත්ත්වයන්ගෙන්ද ආරක්‍ෂා කර ගත හැකිය. පාසල් නිමවී නිවෙසට පැමිණි පසුත් ක්ලෙන්සර් හා ෆෙස් වොස් භාවිත කර සම හොඳින් පිරිසුදු කර ගන්න. මේ ආකාරයට පමණක් ඔබේ සම පිරිසුදු කරගැනීමට හුරුවන්න. මන්ද ඔබේ තරුණ සමට වෙනත් කෘත්‍රිම ආලේපන ද්‍රව්‍ය භාවිතය තවමත් සුදුසු නොවන නිසාය. මෙලෙස ඔබේ සුන්දරත්වය රැක ගැනීමට මූලිකවම අවශ්‍ය වන්නේ පිරිසුදුකමයි.
ගෙදරදීම ප්‍රතිකාර :
නමුත් වයස අවුරුදු 18න් පසු මැරුණු සම ඉවත් කිරීමට සතියකට වරක් ස්ක්‍රබ් සත්කාරයක් කළ හැකි නම් එය වඩාත් සුදුසු වන්නකි. ඒත් සමඟම ඔබේ හිසට ගැළපෙන ීය්පචදද ජදබාසඑසදබැර භාවිත කර හිස සෝදා ඔබේ මුහුණට ගැළපෙන කොණ්ඩ විලාසිතාවකින් වුවද සැරසීමට පුළුවන. එම නිසා මෙවැනි සත්කාර ඔබට නිවෙසේදීම කරගත හැකි නිසා රූපලාවණ්‍යාගාර වෙත ගොස් අනවශ්‍ය ලෙස මුදල් වියදම් කිරීමට අවශ්‍ය නොවේ.
ආහාර රටාව :
පාසල් සමයේ සිටින ඔබ හරිම අවිවේකීය. ඒ නිසාම ඔබේ ආහාර රටාව ගැන වගේම පෝෂණය ගැනත් ඇත්තේ අඩු අවධානයක්. බොහෝ විට ක්‍ෂණික ආහාරවලට යොමුව ඇත්තේත් මෙනිසාමයි. නමුත් වඩාත් සුදුසු වන්නේ නිවෙසේදීම පිළියෙල වන ආහාර වේලකට හුරුවීමය. නැතිනම් ඔබ නිතර පිටතින් ගන්නා විවිධ කෘත්‍රිම ආහාරවලින් අනවශ්‍ය මේදය තැන්පත් වෙමින් කුරුළෑ වැනි ආසදන ලෙස ඒවා මතුවීමට පුළුවන. එබැවින් හැකි සෑම විටම අමු එළවළු හා පලතුරු ආහාරයට ගැනීමට මෙන්ම පලා වර්ගවලට මුල් තැනක් දෙන ආහාර රටාවකට හුරු වන්නේ නම් එය ඔබේ නිරෝගී බවටත් නිසැකවම බලපාන්නක් වනු ඇත. ඔබ පහසුවට මිලට ගැනීමට හුරුව ඇති ඇපල්, මිදි ආදී පලතුරුවලින් මඳක් බැහැරව අපේම ගමේ එළවළු හා පලතුරු ගැනීමට හුරුවීම වඩාත් සුදුසු වන්නේ ඒවා නැවුම් බවින් යුතු වන නිසාමයි. මීට අමතරව ඔබේ දෛනික ආහාර වේලට කැරට්, වට්ටක්කා, පලා වර්ග ආදී එළවළු එක්කර ගන්නේ නම් සමේ නිරෝගී පැහැපත් බවටත් එය රුකුලක් වේවි. වතුර පානය කිරීමත් ඔබේ නිරෝගී දිවියට ඉවහල් වන්නකි.
වඩාත් සැලකිලිමත් වන්න :
ඇතැම් යුවතියන් වඩා පැහැපත් වීමට ගොස් වැරැදි ආලේපන භාවිතයෙන් සමට හානි සිදුකර ගන්නා අවස්ථාද අප අසා ඇත. එම නිසා හැම විටම තම සමට ගැළපෙන ප්‍රමිතිගත ආලේපන භාවිතයට පමණක් හුරුවන්න. තාරුණ්‍යයට පිවිසෙන අවධියක පසුවන ඔබේ සුන්දරත්වය රැක ගැනීමට නම් කායිකව පමණක් නොව යහපත් මානසිකත්වයකින්ද සිටිය යුතුමය. ඔබේ සැබෑ සුන්දරත්වය ඉස්මතු වන්නේද එමඟිනි. එමෙන්ම දිගු කාලීනව තාරුණ්‍යයේ සුන්දරත්වය රැක ගැනීමට නම් ඔබ මෙම සෞඛ්‍ය පුරුදු ඔබේ ජීවිතයට ළංකර ගත යුතුමයි.
උපුටා ගැනීම මව්බිම පුවත් පත
