දිලිසෙන සමක් ඇත්තම් ඔබත් හරි ලකි

මනාලිය වන ඔබ සූදානම් කරගත යුතු දේවල් මෙන්ම සිතිය යුතු සැලකිලිමත් විය යුතු දේවල් ද බොහොමයක් තිබෙනවා. අප දැන් කතා කරන්නට සූදානම් වන්නේ මනාලියගේ ඇඳුම් පැළඳුම් විලාසිතා ගැන නෙවෙයි. මනාලිය වෙන්නට කලින් ඔබේ රුව ගැන සැලකිලිමත් වන ඔබ ඒ පිළිබඳ සිතිය යුතු කරුණු කාරණා ගැනයි. අප බොහෝවිට සිතන්නේ මනාලියගේ ඇඳුම් පැළඳුම් විලාසිතා හැඩ ගැන්වීම් ආදිය ගැනයි. නමුත් මේ සියල්ලටම වඩා තමන්ගේ සම පැහැපත්කර ගැනීම රුව ලස්සනකර ගැනීම ගැනත් මනාලියක් විශේෂයෙන්ම සිතිය යුතු වෙනවා. හේතුව මංගල දිනයේ ඇයගේ සමේ දුර්වර්ණයක් හෝ රුව ලස්සනෙහි කිසියම් අඩුපාඩුවක් වුවහොත් එය මනාලියගේ සුන්දරත්වයට බාධාවක් විය හැකි නිසයි. මෙන්න මේ නිසා මනාලිය වන්නට සිටින ඔබ සමේ පැහැපත් බව ගැන මෙන්ම මෙහිදී ඔබ භාවිතයට ගන්නා ආලේපන ගැන සැලකිලිමත් විය යුත්තේ මොන ආකාරයෙන් ද යන්න විමසා බලමු.

තමන්ගේ සම ලප කැළැල්වලින් තොරව වඩාත් පැහැපත්ව තිබෙනවාට වැඩි දෙනෙක් කැමැතියි. ඒත් බොහෝ විට යම් යම් හේතූන් මත අපට එවන් සමක් හිමි නොවන්නට පුළුවන්. අප සම ගැන කතා කළොත් සමහරුන්ගේ සමේ ස්වභාවය තෙල් සහිත හෝ වියළි සහිත හෝ අධික කුරුලෑ සහිත හෝ විය හැකියි. මනාලියක වීමට පෙර තමන්ගේ සමේ තිබෙන ස්වභාවයට අනුව අවශ්‍ය ප්‍රතිකර්ම යෙදිය යුතුයි. පළමුවෙන්ම අප විමසා බලමු ඔබේ සම අයත් වන්නේ කිනම් කාණ්ඩයකට ද කියා. සමේ ඉතා අධික තෙල් ගතියක් හෝ වියළි ස්වභාවයක් නැතිවීම ද යාන්තමට දිලිසෙනසුලු සමක් නම් ඵම සම ඇති අය ඉතා වාසනාවන්තයි. හේතුව මේ සම සාමන්‍ය සමක් වීමයි. ඉතා තද තෙල් ගතියක් ඇති කුරුලෑ ලප කැළැල් ඇති සම අධික තෙල් සහිත සමකි. මුහුණේ සමහර තැන්වල වියළි බවක් පැවතීම සම මතුපිට වියළි කුඩු සහිත ස්වභාවයක් වීම වියළි සමක් ලෙස හඳුනාගත හැකියි. නාසය නිකට ඇස් යට තෙල් සහිත හා මුහුණේ අනෙක් පෙදෙස්වල වියළි බවක් හෝ සාමාන්‍ය ලෙස ඇත්නම් එම සම මිශ්‍ර සමකි. ඉහත කී ආකාරයෙන් ඔබේ සමේ ස්වභාවයක් පවතියි නම් එම සම අනුව කරනු ලබන ප්‍රතිකාර ක්‍රම එකිනෙකට වෙනස් වේ. ඔබේ සමෙහි කිසියම් අඩුපාඩුවක් වෙත්නම් ඔබ හැඩ ගන්වන රූපලාවණ්‍ය ශිල්පියා හෝ ශිල්පිනිය සමඟ සාකච්ඡාකර තමාට අවශ්‍ය නම් පමණක් රූපලාවණ්‍ය ප්‍රතිකාර සිදුකර ගත හැකියි. 

කුරුලෑ සමක් ඇතිවීම ද බොහෝ දෙනකුට තිබෙන ගැටලුවක්. ඇයි කුරුලෑ සමක් ඇති වන්නේ? 

බොහෝ විට ආරය නිසා. අපිරිසුදුකම නිසා. හෝමෝනවල අසමතුලිතභාවය සහ මානසික ආතතිය නිසා ද ඇතිවන්නට පුළුවන්. සමහරවිට තමාගේ සමට නො ගැළපෙන ආලේපන ආදිය නිසා ද කුරුලෑ ඇතිවිය හැකියි. කුරුලෑ ඇති වූ විගස වෛද්‍ය උපදෙස් ලබාගත යුතු වෙනවා. පසුව අවශ්‍ය නම් රූපලාවණ්‍ය ප්‍රතිකාර කළ යුතුයි. විශේෂයෙන්ම කුරුලෑ සහිත සමක් ඇති අය සම පිරිසුදුකර ගැනීම සඳහා ඖෂධීය බොඩිවොෂ් වර්ගයක් පාවිච්චි කළ යුතුයි.

ඔබ සැලකිලිමත් වියයුතු තවත් විශේෂ කරුණක් තිබෙනවා. එනම් මනාලියක් වීමට සිටින ඔබ අලේපන තෝරා ගැනීම හා භාවිතය හිතුමතේ නොකළ යුතු බවයි. යම් රූපලාවණ්‍ය නිෂ්පාදනයක් මිල දී ගැනීමේ දී සමට ගැළපෙන ලෙස තෝරාගත යුතුයි. දේශීය වශයෙන් නිෂ්පාදනය කරන නිෂ්පාදන ශ්‍රී ලාංකික අයට හොඳින් ගැළපේ. එවන් නිෂ්පාදනයක් මිලදී ගැනීමේ දී එහි ප්‍රමිතිය තිබෙන්නේ එය නිෂ්පාදනය කරන රට නොවේ. එය ජාත්‍යන්තර තත්ත්වයේ ද යන වග පමණි. දේශීය මෙන්ම ජාත්‍යන්තර තත්ත්වයේ නිෂ්පාදනයන් ද තිබෙයි. ඔබ යම් නිෂ්පාදනයක් මිලදී ගැනීමේ දී එය තමන්ගේ සමට ගැළපෙන්නක් වීම අවශ්‍යයි. ඒ වගේම ජාත්‍යන්තර තත්ත්ව සහතික වන ISO GMP සහතික ලත් නිෂ්පාදනයක් වීම වැදගත්. එමෙන්ම එය ශ්‍රී ලංකා ජාතික ඖෂධ අධිකාරියේ අනුමැතිය ලත් දෙයක් වීම ද අත්‍යවශ්‍යයි. (DDA) ඒ විතරක් නොවෙයි ඔබ යම්කිසි රූපලාවණ්‍ය නිෂ්පාදනයක් මිලදී ගැනීමේ දී එම නිෂ්පාදනවල නිෂ්පාදිත දිනය කල් ඉකුත්වන දිනය සහ මිල නිවැරැදිව සඳහන් වි තිබීම වැදගත්. ඔබට දැන් හිතෙනවා ඇති මනාලියක් වන ඔබ රූපලාවණ්‍ය ආලේපන තෝරා ගැනීමේ දී ඒ පිළිබඳ කෙතරම් සැලකිලිමත් විය යුතු ද කියා. හිතුමතේ ආලේපන භාවිතය ඔබ කිසිසේත්ම නොකළ යුතු දෙයක්. බොහෝවිට මනාලියක් වීමට සිටින යුවතියක් සම පැහැපත් කරගන්නට ගොස් නොයෙකුත් ප්‍රශ්නවලට මුහුණ දී ඇති අවස්ථා අප්‍රමාණයි. එම නිසා ඉහත කී කරුණු කෙරෙහි අවධානයෙන් යුතුව කටයුතු කරන්න.

උපුටා ගැනීම තරුණි