ලස්සන තොල් සඟලක් ඔබත් හිමිකර ගන්න
දීර්ඝ කාලයක් තිස්සේ අපේ අවධානය යොමු වූයේ අපේ මුහුණේ වඩාත්ම දීප්තිමත් අංගය හා අප වඩාත්ම ආරක්ෂා කර ගත යුතු අංගය වන දෙඇස් වෙතය. ඒ හා සමානවම මුහුණේ පියකරු බව වැඩි කරන අංගයක් වනුයේ කෙනෙකුගේ දෙතොලයි. මුහුණේ පියකරු බව වැඩි කරන්නට සේම මුහුණේ පියකරු බව අඩු කරන්නටත් දෙතොලට හැකියාවක් තිබෙනවා. රූපලාවණ්‍ය ක්ෂේත්‍රයේදී ඔබ මේ අවයවය අලංකාර කර ගැනීම සඳහා යොදාගන්න ක්‍රමවේද නිසාත් විටෙක මුහුණ අවලස්සන වීමටත් විටෙක මුහුණ පියකරු වීමටත් හැකියාව තිබෙනවා. මේ නිසාම කෙනෙකුගේ දෙතොල්වල හැඩය, තරම පිහිටා තිබෙන ආකාරයත් ඒවා පියකරු බව තීව්‍ර කර ගැනීම උදෙසා හැඩකර ගන්නා ආකාරයත්; එසේම සෞඛ්‍යාරක්ෂිතව දෙතොල පවත්වා ගැනීම සම්බන්ධයෙනුත් උපදෙස් ටිකක් ලබා දීමට අපි අද හිතුවා.
අපිට එදිනෙදා සමාජයේ දී මුණ ගැහෙන මුහුණු දිහා ඔබ ඉතාම නිරීක්ෂණාත්මකව බැලුවොත් අපි මේ කියන්න යන දේ ගැන ඔබටත් හොඳින් අවබෝධ කර ගත්ත හැකි. විවිධ ප්‍රමාණයේ තොල් සඟල හිමි අය ඉන්න බව දැන් ඔබට පැහැදිලි ඇති. අපි ඉතාම අවධානයෙන් බැලුවොත් පහත ආකාරයට මේ දෙතොල් වර්ගීකරණය කළ හැකියි. සමහර අයගේ දෙතොල් දිහා බැලු විට උඩ තොල යට තොලට වඩා විශාලව පිහිටා තිබෙන ආකාරයක් දැකිය හැකි. එසේම තවත් සමහරුන්ගේ යට තොල උඩ තොලට වඩා විශාලයි. සමහරුන්ගේ තොල් දෙකම පිහිටලා තිබෙන්නේ විශාලව. සමහරුන්ට පිහිටලා තිබෙන්නේ ඉතාම සිහින් දෙතොලක්. තවත් අයට ක්‍රමානුකූලව තොල් රේඛාවක් (lip line) නොපිහිටා තිබෙනවා. දෙතොල් සම්බන්ධයෙන් මෙවැනි ආකාරයේ විවිධ තත්ත්වයන් අපට හමු වෙනවා. මේ සියලු තත්ත්වයන් ඇතිවන්නේ කිසිඳු බාහිර ප්‍රතික්‍රියාව හෝ සාධක මුල්කරගෙන නොවේ.
මේ තත්ත්වයන් ඇතිවෙන්න බලපාන්නේ උත්පත්තිමය ස්වභාවයන්. ජානවලින් එන දේවල්, පරම්පරාවෙන් එන දේවල්වලට අනුව තමයි මෙවැනි ආකාරයේ තොල් සඟල පිහිටන්නේ. මේවා වෙනස් කිරීම සඳහා කිසිදු ප්‍රතිකාර ක්‍රමයක් නැහැ. ප්ලාස්ටික් ශල්‍යකර්මයකට භාජනය වීමෙන් පමණයි මෙවැනි තත්ත්වයන් වෙනස් කර ගැනීමට හැකි වන්නේ. නමුත් රූපලාවණ්‍ය පැත්තෙන් ගත්තොත් මේ තත්ත්වයේ පෙනුම විවිධ හැඩතල වෙනස් කර මේක්අප් කිරීමෙන් වෙනස් කර ගත හැකිය. අපි උදාහරණයක් ලෙස සිතුවොත් උඩු තොල විශාලව පිහිටා තිබෙන කෙනෙකුට එය කුඩාවට පෙනෙන ආකාරයට මේක්අප් කර ගත හැකියි. එසේම තොල් ආලේපන සඳහා ඔබ පාවිච්චි කරන වර්ණ අනුව ද මේ හැඩතල වෙනස් කර පෙන්වන ආකාරයට මේක්අප් කරගත හැකියි. තොලේ හැඩය රූපලාවණ්‍ය ක්ෂේත්‍රයේදී වෙනස් කරනු ලබන්නේ තොල් රේඛාවෙනි.(lip line) මේක්අප් කිරීමේදී තොල් රේඛාව ඉතාමත්ම පරෙස්සමෙන් ඇඳගත යුත්තකි. මෙහිදී අපගේ විශේෂ අවධානයක් ලිප් ලයිනර් එක සඳහා ඔබ භාවිත කරන වර්ණය වෙත යොමු විය යුතුයි. සමහරු මේ තොල් රේඛාව ඇඳීම සඳහා තද කළු, තද රතු වැනි වර්ණ යොදා ගන්නවා. එහෙත් තොල් රේඛාව හෙවත් ලිප් ලයිනර් (lip liner) ඇඳ ගැනීම සඳහා මෙවැනි තද පාට කිසිසේත්ම සුදුසු වන්නේ නැත. ඔබ නොදන්නවා නමුදු සමහර රටවල අයහපත් ලෙස දිවි ගෙවන හොඳ චරිතයක් නොමැති කාන්තාවන් පෙන්නුම් කිරීමේ සංකේතයක් හැටියටත් මෙවැනි ලිප් ලයිනර් භාවිත කරනවා. ඒ නිසා ලිප් ලයිනර් අඳින විට කිසි විටෙකත් එවැනි තද පාට භාවිත නොකරන්නට වග බලා ගන්න. ඒක ඔබේ මුහුණට එකතු කරන්නේ අවලස්සනක්.
උපුටා ගැනීම සිළුමිණ
