ඔබට ඕනෑ සුදුපැහැ සමක්ද නැතිනම් පැහැපත් සමක්ද?
සියලු දේටම වඩා ලස්සන ගැන සිතන ඔබ ලස්සනට ඉන්න නම් සම කෙරෙහි විශේෂ අවධානය යෙමු කළ යුතුයි. ඒ සඳහා වෙළෙඳ පොළෙහි ඇති නොයෙක් ආලේපන ගැල්වීම ප්‍රමාණවත් නොවේ. වෙළෙද පොළෙහි ඇති ආලේපන මගින් ඔබට හොඳ ප්‍රතිඵල ඉක්මනින් ලැඛෙන බව සැබෑය. එහෙත් ඒවා ඔබේ සමට යම් ප්‍රමාණයක අනතුරක් ද කරන බව මතක තබා ගත යුතුවේ. රුව වඩවා ගැනීම සඳහා ඔබ පෙලඹෙන්නේ රූපය ඔබ අනෙකාගෙන් වෙන් කොට හඳුනා ගැනීමට ඇති සංඥාව වන බැවින්ය. විරූපී අය කෙරෙහි සමාජයේ අවධානය යොමු නොවේ. ඔබ අනෙකා වෙත ආකර්ෂණය කරවන රූමත් බව වඩවා ගැනීමට ඔබ නොයෙක් ආකාරයෙ සබන්, පවුඩර්, මෙන්ම ආලේපන වර්ග ද භාවිත කරනවා වන්නට ඇත. අයෙක් තවත් අයෙකුගේ රූපත් බවට ප්‍රශංසා කරද්දී ඔබ තුළ ද එවන් ආකර්ෂණීය බවක් ඇති කර ගැනීමට ඔබ සිතුවා වන්නට ඇත.
ඔබේ සුන්දරත්වයට ප්‍රබල ලෙස බලපෑම් කරන්නේ සමයි. පියකරු පිරිසුදු සමක් ඔබ සුන්දරව තබයි. පංච කල්‍යාණයෙන් අතරින් ඡවි කල්‍යාණයට විශේෂ තැනක් හිමිවන්නේ එබැවිනි. ඔබේ සම පැහැපත් නම් ඔබේ රුව ද ලස්සනය. පැහැපත් යනු සුදු නොවේ. ඔබ වෙහෙසෙන්නේ සම නීරෝගීව පැහැපත්ව තබා ගැනීමට ද එසේත් නැතිනම් සුදු පැහැ සමක් ලබාගැනීමට ද යන්න පිළිබඳ අවධාරණයෙන් සිතිය යුතුවේ. සමේ පැහැය අඩු වීම සමේ නීරෝගි බවට බාධාවක් නොවේ. පැහැය අඩු නීරෝගී සම මතුපිට රෝග හට ගැනීමේ ප්‍රවණතාව අඩුය. වර්තමාන සමාජයේ ජනයා සම නීරෝගීව පැහැපත්ව තබා ගැනීමට භාවිත කරන ආලේපන වර්ග ක්ෂණික ප්‍රතිඵල දෙන වාසි සහගත ගුණාත්මක බවින් යුතුයයි අපි සිතුවද බොහෝ විට එය එසේ නොවන්නට පුළුවන. එම රූපලාවණ්‍ය ද්‍රව්‍යයන්ගෙන් ලැඛෙන ප්‍රතිපල පුද්ගලයාගෙන් පුද්ගලයාට වෙනස් වේ. පුද්ගල රූපය ප්‍රසන්නව පෙන්වීම, තරුණ පෙනුමක් ගෙනහැර පෑම ඒවායේ වාසි වේ. ඒවායෙහි ඇති අවාසි අතර විවිධ අතුරු උපද්‍රවයන් ඇතිවීම දැක්විය හැකිය. රුව සුන්දර කරන ආලේපයන්හි අන්තර්ගත විෂ රසායනික කොටස් සම මතුපිට ඇති ස්වේද ග්‍රන්ථ හරහා සම අභයන්තරයට උරා ගනී. සම පිරිසුදු කරන ක්ලෙන්සින් ක්‍රීම් මගින් ස්වේද ග්‍රන්ථ හරහා සම මතු පි‍ටට පැමිණෙන විෂ ද්‍රව්‍ය හා මියගිය සෛල කොටස් ඉවත් කරයි. සිරුරේ තැවැරූ ආලේපන වර්ග ද ඉවත් කර දමයි. එමගින් සම පිරිසුදු කිරීමේ දී මතුපිට ඇති ස්නේහ ස්‍රාවී ග්‍රන්ථි හා ස්වේද ස්‍රාවී ග්‍රන්ථ විවෘත වී සම පිරිසුදු වීම යෝග්‍ය වූව ද සම මතුපිට සීරීම එමගින් සිදු නොවිය යුතු ය. ඔබේ මුහුණ හා සිරුර සුදු කරන සබන් වර්ග ආලේපන වර්ග මිලදී ගැනීමට පෙර ඒවායෙහි අඩංගු රසායනික ද්‍රව්‍ය කෙරෙහි ඔබේ අවධානය යොමු කළ යුතුය. ඒවායෙහි ඇති ඇතැම් රසායනික ද්‍රව්‍ය මතුපිට සම විනාශ කර දමන අතර සම සුදු පැහැ ගැන්විමක් නොකරයි. ඔබේ අත්යට (කිහිලි ප්‍රදෙශයේ) හා කකුලේ ආරම්භක ප්‍රදේශය වන (ඉකිලි ) ප්‍රදේශයේ ඇති තද පැහැය හා දුර්ගන්ධය ඉවත්කරගැනීමට ඒ සඳහා විශේෂිත ආලේපන වර්ග භාවිත කරනවා වන්නට ඇත. එවන් සබන් හා ආලේපනයන්හි අන්තර්ගත රසායන සම මතුපිට ඇති ස්වභාවික තෙල් ගතිය ඉවත් කරමින් සම රළු කරන බව මතක තබා ගත යුතුය. එම ප්‍රදේශ ආශ්‍රීතව වැඩෙන හිතකර ක්ෂුද්‍ර ජීවීන් ද විනාශ කර දමයි. ඒ හේතුවෙන් කාලයක් ගත වෙද්දී එම ප්‍රදේශ ආශ්‍රිත රෝග කාරක ජීවීන් වර්ධනය වී චර්ම රෝග ඇති කරවයි.
තද හිරු එළියේ ගමන්කිරීම සම දුර්වර්ණ වීමට මෙන්ම චර්ම රෝග ඇතිවීමට ද හේතුවේ. එබැවින් ඔබ අහිත කර සූර්ය කිරණ සමට අවශෝෂණය වීම වළක්වා ගැනීමට sun cream වර්ග භාවිත කරනවා වන්නට ඇත. එසේ නම් ඔබේ ගමන නිමවූ වහා ම සම සෝදා පිරිසුදු කරන්න. එසේ නො කළහොත් කාලයක් යද්දි ඔබේ සම රෝගී වීමට ඉඩ ඇත. ඇස් අලංකාර කර ගැනිමට ඇස් මත තවරන ආලේපන ද ඇස්වල කේෂ මූලයන්ගේ විවර වසා දමයි. ඉන් ඒ ආශ්‍රිත ස්නේහ ස්‍රාවී ග්‍රන්ථි ආසාදනයට ලක්වේ. ඇස් පිහාටු මතුපිට ආසාදන ඇත්වන්නේ නම් ඇස්මත ආලේප තැවරීම යෝග්‍ය නොවේ. එවන් අය අත්‍යවශ්‍ය ම අවස්ථාවක ආලේපන භාවිත කොට ඉවත් කර දැමිය යුතුවේ. කාන්තාවන් අතර බහුලව හාවිත කරන රූපලාවන්‍ය ද්‍රව්‍යක් ලෙස තොල් අලේපන දැක්විය හැකිය. තොල් මත ඇතිවන අසාත්මිකතාවන්ගෙන් මිදී ඔබේ රූසපුවද වඩවා ගැනීමට තොල් ආලේපන භාවිතයට පෙර ලිප්ස් බාම් එකක් ආලේප කිරීම උචිතය. දිගු කාලයක් තොල් මත ආලේපන තැවැරීමෙන් තොල් අවපැහැ ගැන්වීම සිදුවේ. එය වළක්වා ගැනීම සඳහා තොල් ආලේපන කඩින් කඩ භාවිතයට ගත යුතුවේ. සමේ පෝෂණය සඳහා බොහෝ තරුණ පිරිස් night cream භාවිත කරති. ඉන් මුහුණේ සමට පෝෂණය ලැඛෙන අතර සමේ තෙතමනය රැක දේ. මුහුණේ සම එල්ලා වැටීම නවතාගැනීමට ද එය උපකාරයකි. night cream වර්ගයක්තෝරා ගැනීමේ දි උකු ගතියෙන් අඩු, තෙල්ගතියෙන් අඩු ඉක්මනින් සමට උරා ගනිමින් මුහුනේ සමේ ග්‍රන්ථි විවරව තබන ආලේපයක් තොරා ගන්න. තරුණ පිරිස් බහුලව දක්නට ලැඛෙන කුරුලෑ සඳහා ආලේපන භාවිත කීරීමට පුරුදුව සිටිති. එහෙත් මුහුණට යොදන ආලේපන මගින් කුරුලෑ සුව කර ගත නොහැකිය. එම ආලේපන කුරලෑ සඳහා ප්‍රතිකාරයක් නොවේ. ඒ සඳහා කුරුලෑ හට ගැනීමට හේතුව සොයා ඊට පිළියම් යෙදිය යුතු ය. ඉස්හොරි හෝ ශරීරයේ දෝෂ තත්වයන්ගේ වෙනස් වීමක් ඊට හේතුවිය හැකිය. ඔබේ මුහුණේ බහුලව කුරුලෑ තිබේ නම් සුදුසුකම් ලත් වෛද්‍ය වරයෙකු හමුවී ප්‍රතිකාර ගත යුතුය. තෙල් යොදා සකසන ලද ආලේපන කුරුලෑ සඳහා යෝග්‍ය නොවේ. පිරිසුදුව සිටිම හා හිස් හොරි වළක්වා ගැනීම අත්‍යවශ්‍ය වේ.
විටමින් E භාවිතය අද බහුලව දක්නට ලැඛෙන්නකි. එහි අන්තර්ගත ප්‍රතිඔක්සිකාරක මගින් සිරුරේ ෙසෙල ඛෙදීයාමේ වේගය පාලනය කරයි. එය සමේ සාමාන්‍ය ක්‍රියාකාරීත්වයද හොඳින් පවත්වා ගැනීමට උපකාරීවේ. සම රැලිවැටිම පාලනය, වයසට යාමේ ලක්ෂණ පාලනය කිරීම එමගින් සිදුකරයි. කලබලකාරී සමාජ රටාව මත කාර්ය බහුල දිවියක් ගෙවන ජනයා තම ආහාර විහරණ කෙරෙහි අවධානය යොමු නොකරයි. එය චර්ම රෝග පැතිර යාමට බහුලව බලපෑම් කරයි. බොහෝ දෙනා කෘතිම ආහාර, රස කාරක යෙදූ ආහාර, කල් තබා ගැනීමට සැකසූ ආහාර භාවිතයට යොමු වී සිටිති. ඒවායෙහි අඩංගු රසකාරක, වර්ණක, රසායනික ද්‍රව්‍ය බොහෝ විට සිරුරට අහිතකර වේ. ඒ ද්‍රව්‍ය ශරීරගත වූ වහා සම කැසීම, පළු දැමීම, රතුවීම, තොල් පැළීම, තොල් ඉදිමීම, වමනය,උණ ගැනීම, වැඩි වාර ගණනක් මලපහවීම ආදී ලක්ෂණ මතුවේ. එවැනි ලක්ෂණ සියලු දෙනාටම ඇති නොවූවද එවන් අසාත්මිකතා ඇති අයෙකු නම් එවන් ආහාර වර්ග කිසිසේත්ම භාවිත නොකළ යුතුවේ. බොහෝ විට ආහාර ගත් සැණින් ප්‍රති විරෝධතා මතු නොවුණ ද එම ආහාර ද්‍රව්‍ය සිරුරට උරාගැනීමෙන් අනතුරුව එහි අතුරු පල ලෙස චර්ම රෝග ඇතිවේ. ස්වභවික ආහාර අතරින් යම් ආහාර ද්‍රව්‍ය ඇතැම් පුද්ගලයන් ට අසාත්මික විය හැකිවේ. එවන් ආහාර ද්‍රවයයන්ගෙන් ඈත්වී සිටීම යෝග්‍ය වේ. ඒ අතර අන්නාසි, තක්කාලි, බලමාළු, ඉස්සන්, දැල්ලන්, විනාකිරි, කකුලුවන් ආදී ද්‍රව්‍ය වේ. ආහාර දිරවීමේඅපහසුතා පවතිද්දීත් දිගින් දිගටම ආහාර ගැනීමෙන් රස, රක්ත, මාංශ පෝෂණය නොවී දූෂණය වීමෙන් චර්ම රෝග ඇති කරයි. සමේ රෝගි බවට හේතුවන විහරණ ලෙස තද අව්වේ සිටීම, අධික ව්‍යායාමයන්ගෙන් පසු එසැණින් ඇල් දිය ස්නානය හේතුවේ. නිසි ලෙස සිදු නොකරන පංචකර්ම චිකිත්සාව ද චර්ම රෝග ඇති කරවයි.
සුන්දරත්වය පිළිබඳ කතා කරද්දි සිරුරේ නිරාවරණය වූ කොටස් කෙරෙහි අප වැඩි සැලකිල්ලක් දැක්වූවද සිරුරෙහි ආවරණය වූ කොටස් කෙරෙහි වැඩි අවධානයක් යොමු කළ යුතුවේ. කෘතිම රෙදිවලින් සැකැසු යට ඇඳුම් දිගු වේලාවක් ඇඳ සිටිම හේතුවෙන් ලිංගාශ්‍රිත ප්‍රදේශයන්හි අසාත්මිකතා ඇතිවේ. දහදිය උරා ගන්නා රෙදි වර්ගයට ඇඳුම් සඳහා භාවිතයට යොමු විය යුතුය. සමෙහි ඇති වියළි බව හා රළු බව හේතුවෙන් බොහෝ චර්ම රෝග හට ගනී. සම මතුපිට රූපාලංකරණයට භාවිත කරන ආලේපන මගින් ද ස්වභාවිකව සමෙහි පවත්නා තෙල් ගතිය ඉවත් කර දමයි. ජීවිත කාලය තුළ ඕනෑ ම අවස්ථාවක චර්ම රෝගයක් ඇතිවීමේ ඉඩ කඩ පවතී. දියවැඩියාව, හතිය, පීනස ඇතිඅය චර්ම රෝගයන්ට ප්‍රතිකාර කිරීමේදී වෛද්‍ය උපදෙස් පිළිපැදිය යුතුවේ. ආයුර්වේද ප්‍රතිකර්ම මගින් රෝග තත්වයන් උත්සන්නවන බවට හා පාදයේ පැළීම් සුව වීමේ දී හිසේ කැක්කුම ඇතිවන බවට ඇති අදහස් මෙන්ම චර්ම රෝග සුවවීමේ දි හතිය ,මහන්සිය, හෝ මානසික රෝග ඇතිවන බවට ඇති මත සාවද්‍ය වේ. දේශීය වෛද්‍ය ක්‍රමය මගින් චර්ම රෝග අතුරු ආබාධයන්ගෙන් තොරව සුවකර ගත හැකිය. ඔබ චර්ම රෝගියෙකු නම් පිරිසුදුව සිටීම ඇඳුම්, කොට්ට, මෙට්ට, ඇඳ ඇතිරිලි උණුවතුරෙන් සෝදා ගැනීම කළ යුතුවේ. නෑමට හා තුවාල සේදීම සඳහා කොහොඹ හා කොළ අමුකහ තම්බා ගත් වතුර ද හීන් නිදිකුම්බා තම්බා ගත් වතුර ද සුදුසු වේ. ගංසූරිය කොළ පොතු තම්බා ගත් වතුර ද චර්ම රෝගයට ගුණදායී ඖෂධයකි. කිහිලි හා ඉකිලි ආශ්‍රිත දුර්ගන්ධය හා අවපැහැ ගැන්වීම මඟ හරවා ගැනීමට ඛෙලිකොළ සිහින්ව අඹරා එම ස්ථානවල ආලේප කොට මඳ වේලාවකින් සෝදා හරින්න. එය විවිධ ආලේප ගල්වනවාට වඩා විශ්වාසදායක හා නිශ්චිත ප්‍රතිඵල ලබා දේ. වැඩි ජලය ප්‍රමණයක් පානය කිරීම එළවළු පලතුරු වැඩි ප්‍රමණයක් ආහාරයට ගැනිම වැදගත් ය. කහ පැහැති එළවළු පලතුරු වැඩිපුර ආහාරයට ගැනීමෙන් සමෙහි නීරෝගී බව වැඩි කරයි . චර්ම රෝගීහු කිරි සහ කිරි ආහාර පාලනයකින් යුතුව ගැනීම වැදගත්ය. සමෙහි පැහැපත් බව වඩන ආලේපන ආයුර්වේදයෙහි ඇත. රත් හදුන්, වැල්මදට, ලොධු, නුගකරටි හා පුවඟු හා පරිප්පු ඇල්දියෙන් සිහින්ව අඹරා මුහුණෙහි ආලේප කර සෝදා හරින්න. සමෙහි කාන්තිය වැඩේ. ඔබට කුරුලෑ වදයක් නම් අබ, වදකහ, සහිඳලුණු, ලෝධූ සමව ගෙන ඇල්දියෙන් අඹරා මුහුණෙ හි ආලේප කිරීමෙන් කුරුලෑ නැසී සම කාන්තිමත් වේ. ලොධු, කොත්තමල්ලි, වද කහ, සමව ගෙන ඇල්දියෙන් අඹරා ගෑම කුරුලෑ ඉවත් කර ගැනීමට මඟකි.
ඔබේ සම දූවිල්ලට අධික හිරැ එළියට නිරවරණය වීම මෙන්ම, සමේ රළු වියළි ගතිය පාලනයට භාවිත කරන ආලේප වැඩි වේලාවක් සම මත තබා ගැනීමෙන් ද චර්ම රෝග හට ගනී. ස්වභාවික ආහාර වැඩි ප්‍රමාණයක් ද, ජලය වැඩි පුර ගැනිම ද, අවශ්‍ය පමණට නින්ද, පිරිසුදු කම ද, ඔබ චර්ම රෝගයන්ගෙන් මුදා දුටුවන් මනබඳින රූසපුවකින් යුත් අයෙකු බවට පත් කරනු ඇත.
උපුටා ගැනීම සිළුමිණ
.jpg "ස්‌ත්‍රී නලල කියන රහස්‌")
