කුරුලෑ වර්ධනයට සම අපිරිසුදු වීම බලපානවා
ඇත්තටම පියකරු මුහුණකට කුරුලෑ එන එක ප්‍රශ්නයක් තමයි. ඕනම කෙනෙක් දිහා බැලුවම මුලින්ම අපට පෙනෙන්නේ මුහුණ. කෙනකුට උත්පත්තියෙන් හිමිවන මේ මුහුණේ පියකරු බව, සුන්දරත්වය නැති කරන දෙයක් විදියට අපට කුරුලෑ හඳුන්වන්න පුළුවන්. හැබැයි මේ තත්ත්වයෙන් මිදිය නොහැකියි කියා කවුරුත් කනස්සල්ලට පත් විය යුතු නැහැ. අපේ උපදෙස් පිළිපදිනවා නම් ඉතා පහසුවෙන් ඔබට මේ තත්ත්වයෙන් මිදිය හැකියි. මේ තත්ත්වයෙන් ඈත්වන්නට නම් ඔබටත් ඉතාම හොඳ ඉවසීමක්, පාලනයක් තිබිය යුතුයි. විශේෂයෙන් ඉවසීම හා පාලනය පිළිබඳ සඳහන් කළේ මේ ප්‍රශ්නයේ දී ඔබ ඔබගේ කට පාලනය කර ගැනීම අතිශයින්ම වැදගත් වන නිසා. අපි කවුරුත් කටට රසට කෑම කන්න හරි කැමැතියි. විශේෂයෙන් අන්නාසි, අච්චාරු, සොසේජස් වැනි දේවල් එක්ක ආහාර ගනිත්දි ඒ රසයේ ප්‍රියතාවයට ලොල් වීම සාමාන්‍ය දෙයක්. එහෙත් අන්නාසි, අච්චාරු, සොසේජස්, චොක්ලට් වර්ග, විවිධ පැණි බීම වර්ග, බර්ගර් වැනි දේ ආහාරයට නිතර නිතර එක්කර ගැනීම කුරුලෑ වර්ධනය වන්නට හේතුවක් බව ඔබ දැන සිටියා ද? ඇත්තටම අපි කාටත් තමන් ප්‍රිය කරන මේ ආහාර කෑමට ගනිත්දී කුරුලෑ ගැනවත්, වෙනත් රෝග තත්ත්වය ගැනවත් මතකයට එන්නේ නෑ. නමුත් අද පටන්වත් ඔබ දැඩි සේම මතක තබාගෙන කුරුලෑ තත්ත්වයෙන් මිදෙන්න අවශ්‍ය නම් මේ ආහාර ප්‍රතික්ෂේප කරන්න. තව සමහරුන්ට කුරුලෑ ඇතිවීම උත්පත්තියෙන් හිමි වන ලක්ෂණයක් බවටත් පත්වෙලා තිඛෙනවා. ඒකට හේතු වෙන්නේ ජානමය බලපෑම. අම්මාට හෝ තාත්තාට මෙවැනි තත්ත්වයක් දැඩි ලෙස බලපෑවා නම් ඒ ජානමය තත්ත්වය ඔහුගේ හෝ ඇයගේ දියණියට හෝ පුතාට එන්නට හැකියාව තිඛෙනවා.
කුරුලෑ වර්ධනය වීමට සහ ඇතිවීමට ප්‍රධාන වශයෙන්ම සමේ අපිරිසුදුතාවයත් බලපානවා.
විශේෂයෙන් අපි සඳහන් කළා කුරුලෑ ඇතිවීමේ වැඩි ප්‍රවණතාවයක් දකින්න ලැඛෙන්නේ තෙල් සහිත සමක කියලා. වැඩියෙන් කුණු දූවිලි තැන්පත් වෙන්නෙත් තෙල් සහිත සමක බව ඔබ දන්නවා නේද? සම මතුපිට මේ ආකාරයෙන් කුණු දූවිලි තැන්පත් වීම වළක්වා ගැනීමට ඔබ හැම විටම ප්‍රවේසම් විය යුතුය. එසේම මැරුණු සමේ සෛල තැන්පත් වුණාමත් සම අපිරිසුදු තත්ත්වයට පත්වෙනවා. එවැනි අවස්ථාවලත් කුඩා කුඩා කුරුලෑ එන්න පුළුවන්. සමහරුන් අනුගමනය කරන අයහපත් සනීපාරක්ෂක පුරුදුත් මේකට හේතුවක් වෙන්න පුළුවන්. කෙනකුට කොයි තරම් හොඳින් පිරිසුදුවට ඉන්න අවස්ථාව සහ පහසුකම් තිබුණත් තමන් පුරුදු වී සිටින අන්දමට එය එසේ සිදු නොවන අවස්ථා අපි ඕනෑතරම් දැක තිඛෙනවා, අසා තිඛෙනවා. අපේ ශරීරයෙන් පිටවන දහදිය පිටවීම සඳහා සමේ ඇති සියුම් සිදුරු නිරන්තව විවෘතව පිරිසුදුව තබා ගත යුතුයි. ඒවා කුණු දූවිලි වලින් වැසී තිබුණහොත් දහදිය පිටවීමට ඉඩක් නොමැති වේ. අනෙක් පැත්තෙන් කුරුලෑ වැඩියෙන් ඇතිවන පුද්ගලයන් අතර නිතර මහ පාරේ වැඩ කරන දූවිලි සහිත පරිසරයක වැඩ කරන, කර්මාන්ත ශාලාවල වැඩ කරන පිරිස් බහුලව දැකිය හැකිය. කර්මාන්ත ශාලාවලින් පිටවන දුම්, මෙන්ම පාරේ දූවිලි ආදිය නිසාවෙන් සම අපිරිසුදු වීම නිසා කුරුලෑ ඇතිවිය හැකිවීම මීට හේතුවයි. තවත් සමහරු ඉන්නවා තමන්ගේ සමට නොයෙකුත් රසායනික නිෂ්පාදන සහිත ක්‍රීම් වර්ග ආදිය පාවිච්චි කරන, එසේම කොණ්ඩය ඩයි කිරීම සඳහා භාවිත කරන ඩයි වර්ග ද මේ තත්ත්වයට බොහෝ සෙයින් බලපානවා. ඒ නිසා ඔබ කොණ්ඩය ඩයි කරන කෙනෙක් නම් ඒ සඳහාත් නියමිත ප්‍රමිතියකින් යුතු ඩයි වර්ගයක් භාවිත කරන්නට සැලකිලිමත් වෙන්න. මන්ද ඒ ඩයි වර්ගය නිසාත් ඔබේ මුහුණේ කුරුලෑ මතු වීමට ඉඩ ඇති බැවින්.
අපේ රටේ පවතින විවිධාකාර දේශගුණික තත්ත්වයන් ද මේ සඳහා බලපානවා.
විශේෂයෙන් කුරුලෑ සඳහා බලපාන්නේ උෂ්ණ සහිත දේශගුණ තත්ත්වයන්. ඒ නිසා එවැනි පළාත්වල ජීවත්වන අයටත් මේ තත්ත්වය බහුලව ඇතිවෙන්න පුළුවන්. එසේම වෛද්‍ය නිර්දේශයන්ගෙන් තොරව විවිධ ආකාරයේ පෙති වර්ග, හෝමෝන වර්ග ලබා ගැනීමත් කුරුලෑ ඇති වීමට හේතුවක්. තවත් සමහරු රසදිය අඩංගු ආලේපන වර්ග භාවිත කරනවා. මෙවැනි ආලේපන වර්ග වෛද්‍ය උපදෙස් හෝ රූපලාවණ්‍ය උපදෙස් වලින් තොරව භාවිත කිරීමත් කුරුලෑ ඇති වීමට හේතුවක් වෙනවා.
උපුටා ගැනීම සිළුමිණ පුවත් පත
