ඇහි බැම සැකසීමේ දී මේ ගැනත් හිතන්න

අපේ විශේෂ අවධානය යොමු වෙන්නේ ඇස් දෙ‍ෙක් බාහිර අලංකරණය සඳහා ඔබ පාවිච්චි කරන නොයෙකුත් අලංකරණ දේ සම්බන්ධවයි. බොහෝ විට තරුණියන් තමන්ට උපතින් පිහිටා ඇති ඇහි පිල්ලම් (eye lashes) සඳහා කෘත්‍රිම ඇහි පිල්ලම් භාවිතා කරනු අපි දැක තිබෙනවා. ටිකක් දිගු ඇහිපිල්ලමක් තිබෙන විට ඒ ඇස් දෙක ඇත්තටම කැපී පෙනෙනවා තමයි. එහෙත් ඇහි පිල්ලම් සවි කිරීමේදී ඔබේ ඇසේ ආරක්ෂාව, පරිස්සම ගැන ඉතා තදින්ම සිතිය යුතුයි. eye lashes නොයෙකුත් ආකාරයෙන් වෙළෙඳ පො‍ෙළ් අපට දක්නට ලැබෙනවා. නමුත් අතට අසුවන මේ හැම ඇහිපිල්ලමක්ම හිතුමතේ අරගෙන පාවිච්චි කරන්නේ පරිස්සමින්. සමහර අවස්ථාවල ඉතාමත් අඩු මිලටත් මේවා ගන්නට තිබෙනවා. එහෙත් ලාභය බැලුවා වගේ නොවෙයි ඔබේ ඇසට ඉන් සිදුවන බලපෑම ගැන ඔබ අවධානයෙන් සිතිය යුතුයි. (eye lashes) ඇහි පිල්ලම් මිලදී ගැනීමේදී ඔබ වඩාත් සැලකිලිමත් විය යුත්තේ එහි ප්‍රමිතිය හා Brand එක පිළිබඳවයි. අනෙක් සුවිශේෂම කාරණය තමයි මේ ඇහිපිල්ලම් ඇලවීම සඳහා පාවිච්චි කරන ගම් වර්ගය ඉතා පරිස්සමින් පාවිච්චි කළ යුතුයි. මේ ගම් වර්ග ඔබේ ඇසට වැටුණොත් ඇසේ පෙනීම දුර්වල වීමට ද ඉඩ තිබෙනවා. මේ නිසා මේ විලාසිතාවට ඔබ වඩාත්ම ප්‍රිය කරනවා නම් හරිම පරිස්සමින් නිසි ප්‍රමිතියකින් යුතුව, සියුම් ලෙස එය කරගත යුතුයි. එසේම පැලඳූ ඇහි පිල්ලම් ඔබේ ගමන හෝ උත්සවය අවසන් වූ සැණින් ඇහෙන් ඉවත් කරන්නටත් වගබලා ගත යුතුයි. 

අපේ තරුණියන් අතර ඉතාම සුලබ විලාසිතාවක් ලෙස ඇහි බැම සැකසීම හඳුන්වන්න පුළුවන්. බොහෝ විට මේ සඳහා දැන් භාවිතා කරන්නේ threading ක්‍රමයයි. මේ ක්‍රමය අනෙක් ක්‍රමවලට සාපේක්ෂව සෞඛ්‍ය ආරක්ෂිතයි. නමුත් සමහරු පුරුද්දක් විදියට නිතර නිතර මේ ක්‍රමයෙන් සිය ඇහිබැම සකසා ගන්නවා. එහෙත් ඇහිබැම විශේෂ අවස්ථාවන් සඳහා සහභාගිවීමේදී සකසා ගතහොත් ඇති නේද? අනෙක් අවස්ථාවන්වලදී හැකි තරම් තම ස්වභාවික ඇහි බැම ඒ ආකාරයෙන්ම තබාගන්න බලන්න. මීට අමතරව සමහරු ඇහිබැම සකස් කරන්න ‘plucker’ එකx භාවිතා කරනවා. බොහෝ වෙලාවට plucker එක නිසා skin එක පළුදු වෙන්නට ඉඩ තිබෙනවා. ත්‍රෙඩින් (threading) කිරීමේදීත් අපි ක්‍රම දෙකක් මේ සඳහා භාවිතා කරනවා. සමහර සැලුන් වල නූල අතින් අල්ලාගෙන කරත් සමහරු එය කටින් අල්ලාගෙන කරන අවස්ථා අපි දැක තිබෙනවා. සාමාන්‍යයෙන් රූපලාවණ්‍ය ක්ෂේත්‍රයේ ලොව පුරා ප්‍රචලිත ක්‍රමය වන්නේ අතින් අල්ලා ගෙන threading කිරීමයි. එහෙත් කටින් අල්ලා ගෙන threading කිරීම සෞඛ්‍යාරක්ෂිත නැහැ. ඒ නිසා එවැනි ක්‍රමයක් ඔබ වෙනුවෙන් භාවිතා කළොත් ඒ සඳහා විරුද්ධ වීමේ අයිතියක් ද ඔබ සතුවේ. 

උපදෙස් ප්‍රවීන ‍‍රූපලාවන්‍ය ශිල්පිනී දමයන්ති විමලවීර ගෙනි 

උපුටා ගැනීම සිළුමිණ