ස්වභාවික ෆෙෂල් එකක් ගෙදරදීම හදාගන්න

දවසින් දවස අපි වියපත් වෙනවා. රැලි වැටෙන මුහුණේ හම අපේ රූපයට අවලස්සනක් එක් කරනවා. ඇස් යට කළුවීම වගේම මුහුණේ රැලි වැටීම පාලනය කර ඔබේ වියපත් වෙන ලකුණු මකලා දාන්න සම්බාහනයට පුළුවන්. මේ පිළිවෙත් අත්හදා බලන්න. ඔබේ සමට සිනිඳු බවක් එක් කරනවා. 

• මුලින්ම ඔබේ මුහුණ පිරිසුදු කරගන්න.
• ගස්ලබු, පිපිඤ්ඤා, කැරට්, කොමඩු වතුර පමණක් එකතු කර හොඳින් බ්ලෙන්ඩර් කරගන්න.
• මෙසේ සකසා ගත් ක්ලෙන්සර වර්ගය හොඳින් මුහුණේ තවරා විනාඩි දෙකක් පමණ තබා සෝදා ඉවත් කරන්න.
• නැවැත වරක් සාදාගත් ක්ලෙන්සර් වර්ගය මුහුණේ හා ඛෙල්ලේ ආලේප කර පිපිඤ්ඤා පෙති දෙකක් හෝ පුළුන් කැබැල්ලක් ඇස් දෙක මත තබන්න.
• විනාඩි 3ක් හෝ 4ක් මුහුණ හොඳින් ස්ටීම් කරගන්න (ස්ටීමරයක් ආධාරයෙන් හෝ උණුවතුර පෙඟවූ රෙදි කැබැල්ලකින් මුහුණ තවන්න.)
• ඉන්පසු විනාඩි 5ක් පමණ නිදහසේ සිටින්න. රත්වුණ මුහුණ සිසිල් වූ පසු ඇස් මත තැබූ පුළුන් කැබලි ඉවත් කරන්න.
• ටිෂූ එකකින් මුහුණ හොඳින් තෙත මාත්තු කරන්න.
• ඇඟිලි තුඩුවලින් සෙමින් මුහුණට තට්ටු කරන්න.
• දැන් මුහුණ මසාජ් කිරීමට හැකිය.
• ඒ සඳහා ඔලිව් තෙල්, තල තෙල් හෝ කෝමාරිකා යුෂ භාවිත කළ හැකිය.
• මසාජ් කිරීමට ගන්නා දේ මුහුණේ ආලේප කර විනාඩි විස්සක් පමණ කවාකාරව මුහුණ සම්බාහනය කරන්න.
• ඔබ මේ සඳහා තව කෙනකුගේ සහය ලබා ගන්නේ නම් පමණක් මුහුණේ නිල ස්ථාන තෙරපන්න. එසේත් නොමැති නම් ඔබ මෙම සත්කාරය කරන්නේ තනිවම නම් නිල තෙරපීම අවශ්‍ය නොවේ.
• අත් හොඳින් එකිනෙක පිරිමැද රත්වූ අල්ල තත්පර 30ක් පමණ ඇස් දෙක මත තබන්න. මෙසේ තුන්වාරයක් සිදුකරන්න.
• පුළුන් කැබැලි දෙකක් ඇස් දෙක මත තබා නිදහසේ සිටින්න.
• මද රස්නය ඇති උණු වතුර පෙඟවූ පුළුන් කැබැල්ලකින් මුහුණ හොඳින් පිස දමන්න.

මේ සත්කාරයට පසු අව්වේ යනවා නම් පමණක් හිරු ආවරණ ආලේපන වර්ගයක් මුහුණේ ආලේප කරන්න. වියළි සමකට නම් සම්බාහනය කිරීමේදී තෙල් වර්ග භාවිත කළ හැකි වුවත් තෙල් සහිත සමකට නම් කෝමාරිකා භාවිත කිරීම වඩාත් සුදුසුය. උදේ 8ත් 10ත් අතර කාලයේ හෝ දහවල් 12න් පසු මේ සත්කාරය කළ හැකිය. එදින මද රස්නය ඇති උණුවතුරෙන් පමණක් මුහුණ සේදිය යුතුය. පසු දිනයේ සිට සුපුරුදු පරිදි සබන් හෝ ෆෙෂ් වොෂ් ආධාරයෙන් මුහුණ සෝදන්න. 

උපුටා ගැනීම මව්බිම