පැහැපත් සමක් සදහා ආයුර්වේද රහස....
ඈත අතීතයේ සිට මිනිසුන් තම රුව සම්පත රැක ගැනීම සඳහා නොයෙකුත් උපක්‍රම භාවිතා කල බව ඉතිහාසයේ නොයෙකුත් සාක්ෂි ඇත. විශේෂයෙන් කාන්තාවන් මේ සඳහා දැඩි උද්යෝගයකින් කටයුතු කර ඇත. ස්වාභාවික ද්‍රව්‍ය උපයෝගී කරගෙන රූ සපුව රැක ගැනීම පිළිබඳව ඇති ඉතිහාසය ශතවර්ෂ ගණනාවක් ඈතට දිවේ. වර්තමානයේ මිනිසුන් තුල එම උනන්දුව තීව්‍ර වී ඇති නමුදු නොයෙකුත් කෘතිම රූපලාවණ්‍ය ප්‍රතිකාර කෙරෙහි යොමුවීමේ ප්‍රවණතාවය හේතුවෙන් අකාලයේ තම ස්වාභාවික රූප සම්පත්තිය නාස්ති කරගන්නා ආකාරයද දැක ගත හැක. රූපලාවණ්‍යයේ ඉතා වැදගත් අංගයක් ලෙස නිරෝගී සමක් සහිත වීම දැක්විය හැක. පැහැපත් සමකින් යුක්ත බව අනෙකුත් අඩුපාඩුකම් මකාලීමට සමත් ආභරණයකි. නිරෝගී බවේ සංඛේතයකි. පැහැපත් නිරෝගි සමක් යනු සුදු පැහැති සමක් නොවේ. සමේ වර්ණය කුමක් වුවත් එය නිරෝගී සමක් නම් රුව සම්පත වැඩිකර පෙන්වීමට සමත් වේ. හුදෙක් සම රැක ගැනීම සඳහා බාහිර ආලේප සහ බාහිර ප්‍රතිකාර ක්‍රම පමණක් යොග්‍ය නොවේ. ආයුර්වේදයේ දක්වා ඇති පරිදි ශරීර අභ්‍යන්තර පරිපචන ක්‍රියාව නිසි ලෙස සිදු නොවේ නම්, අග්නිය නිසි අයුරින් ක්‍රියා නොකරයි නම් සමෙන් එයට ප්‍රතිචාර දැක්වීම සිදුවේ. රක්තවහ ස්‍රෝතස හෙවත් රුධිර සංසරණ පද්ධතිය නිසි ලෙස ක්‍රියා නොකරන විට එම ස්ථානය අඳුරු පැහැ ගැන්වීම, රළු වීම, සම එල්ලා වැටීම, සම රැලි වැටීම සිදු වන්නේ සමට අවශ්‍ය පෝෂණය සහ රුධිර සැපයුම නිසි පරිදි නොලැබීම නිසාය. එම නිසා ශරීර අභ්‍යන්තර ක්‍රියාකාරීත්වය මනාව පවත්වා ගැනීම සඳහා සැලකිලිමත් වීම ඉතාම වැදගත්ය.
සාමාන්‍යයෙන් මිනිස් සිරුර අවුරුදු 25 දක්වා වර්ධනය වේ. ඉන්පසු අවුරුදු 30-40 දක්වා කෙමෙන් වයසට යන අතර අවුරුදු 40-55 දක්වා ඉක්මනින්ද අවුරුදු 55-65 දක්වා ඉතාම ඉක්මනින්ද වයසට යාම ඇරඹේ. නමුත් බොහෝ දෙනා තම වයසට වඩා තරුණ පෙනුම රැක ගන්නා බව නොරහසකි. තරුණ පෙනුම රැකගැනීම සඳහා අත්‍යාවශ්‍ය සාධකයක් වන සම රැක ගැනීම සඳහා ආයුර්වේදයෙන් මනා පිටුවහලක් ලැබේ. පහත සඳහන් ක්‍රියා පිළිවෙත් අනුගමනය කිරීම තුලින් ශරීර අභ්‍යන්තර ක්‍රියාකාරීත්වයේ වෙනස්කම් සිදුවන අතර සම රැක ගැනීමට ඉවහල් වේ.■ දිනකට ජලය ලීටර් හතරක් පමණ පානය කිරීම.
■ නැවුම් පළතුරු, එළවළු, පලා වර්ග සහ සලාද වැඩි වශයෙන් ආහාරයට එකතු කර ගැනීම.
■ කෘතිම සහ ක්ෂණික ආහාර පාන, පැණි රස දෑ, තෙල් සහිත දේවල් අඩු කිරීම.
■ මලබද්ධය වලක්වා ගැනීම.
■ මානසික සුවයෙන් සිටීම.
■ ක්‍රමවත්ව ව්‍යායාම වල යෙදීම.
■ දිනකට පැය හයක් පමණ විධිමත් නින්දක් ලැබීම.
මීට අමතරව බාහිර වශයෙන් සම ආරක්ෂා කර ගැනීම සදහා :
■ දිනකට දෙවරක් ස්වාභාවික ද්‍රව්‍යක් භාවිතයෙන් මුහුණ සේදීම. උදා:- පිපිඤ්ඤා යුෂ, දෙහි යුෂ, කැරට් යුෂ.
■ හිරු එළියට නිරාවරණය නොවීම, දූවිලි සහ අපද්‍රව්‍ය වලින් සම ආරක්ෂා කර ගැනීම.
■ දිනපතා ස්නානය කිරීම.
■ සතියකට වරක් වත් සමට ඖෂධීය සත්කාරයක් ලබාදීම.
බොහෝ අය තම මුහුණ කෙරෙහි පමණක් අවධානය යොමු කරන නමුදු එය වැරදි සහගත ක්‍රියාවකි. මුහුණ යනු ශරීරයේ වැදගත් අංගයක් වුවත් මුළු ශරීරයම එක ලෙස නිරෝගීව එක ලෙස නිරෝගීව තබා ගැනීම තුළින් රුව සම්පත තව තවත් ලස්සන කරගත හැක. මෙහිදී දෙඅත් දෙපා ඇතුළු මුළු ශරීරය කෙරෙහිම විශේෂ සැලකිල්ලක් දැකිය යුතුය. සමේ පවතින කුරුලෑ, කළු ලප හා ලප කැලැල් ආදීය නිසා සමේ අලංකාර බව දුරු වේ. එම රෝග තත්ත්ව කෙරෙහි දැඩි අවධානය යොමු කිරීම රූපලාවන්‍යයේදී ඉතා වැදගත් වේ. විශේෂයෙන් මුහුණ දූවිලි, විෂබීජ ඉතා ඉක්මනින් රැදෙන තැනකි. මුහුණ අතගෑමෙන් දෙඅත් වල ඇති විෂබීජ එකතු වේ. තවද කුරුලෑ නියපොතු වලින් කැඩීම නිසා ලප කැලැල් ඇතිවේ. මේ සියල්ල මුහුණේ අවලස්සනට හේතුවේ. මේවායින් සම ආරක්ෂා කර ගැනීම සඳහා ආයුර්වේදයේ විවිධ ප්‍රතිකාර ක්‍රම දක්වා ඇත. එහිදි බාහිර ආලේප සඳහා විශේෂ තැනක් ලැබේ. ස්වාභාවික ඖෂධ මෙන්ම එදිනෙදා ගෙදර දොරේදී භාවිතයෙන් සිදුකල හැකි මෙම ප්‍රතිකාර මගින් දිගුකාලීන ප්‍රතිඵල ලබාගත හැකි අතරම කිසිදු අතුරු උපද්‍රවයක් ඇති නොවේ. මෙම ආලේප හෝ ස්වාභාවික ද්‍රව්‍ය භාවිතයේ දී වුවද තමාගේ සම කුමන වර්ගයට අයත් දැයි හඳුනාගැනීම අත්‍යාවශ්‍ය වේ. සාමාන්‍ය සම, තෙල් බහුල සම, වියළි සම, සංවේදී සම මෙන්ම මේ සියල්ල මිශ්‍ර වූ මිශ්‍ර සමකින් යුක්ත විය හැක. මේ පිළිබඳව ඔබ දැනුවත් වීම ඉතාම වැදගත්ය. තෙල් බහුල සමට භාවිතා කරන ක්‍රීම්(Cream) සහ පැක් (Pack) වර්ග ආදීය වියළි සමට කිසිවිටකත් යෝග්‍ය නොවේ. එසේම කුරුලෑ සහිත සංවේදී සමට ආලේප යොදන විට ඉතාම සැළකිලිමත් විය යුතුය.
සම පිරිසිදු කිරීම සඳහා :
■ පැහැපත් සමක් ලබාගනීමට නම් සම පිරිසිදු කිරීම අත්‍යාවශ්‍ය කරුනකි. උදෑසන මෙන්ම රාත්‍රී නින්දට පෙරත් වඩා ක්‍රමවත් පිරිසිදු කිරීමක් කළ යුතුය. දහවල් කාලය තුළ රැස්වන දූවිලි මේකප් ආලේප ආදිය ඉවත් කිරීම සඳහා වතුරෙන් පමණක් මුහුණ සේදීම ප්‍රමාණවත් නොවේ. ඒ සඳහා භාවිතා කරන Face wash, Cleanser වෙනුවට එදිනෙදා ගෙදර දොරේදී හමුවන දෙහි යුෂ, පිපිඤ්ඤා යුෂ, අර්තාපල් යුෂ ආදිය භාවිතා කළ හැක.
■ සමට පෝෂණය ලබාදීම සඳහා සතියකට දෙවරක් වත් ස්වාභාවික ඔසු ද්‍රව්‍ය වලින් සාදන පැක් වර්ගයක් භාවිතා කිරීම ඉතා යෝග්‍යය. එසේම පළතුරු වලින් සාදාගන්නා ආලේප ද ඉතා සුදුසුය. මේ සඳහා අලිගැටපේර(Avocado), පැපොළ්(Papaya), කොමඩු(Water melon) සහ ඇඹුල් දොඩම්(Orange) ඉස්ම යොග්‍ය වේ.
■ සුදු හඳුන් ඇල් දියෙන් ගලගා ශරීරයේ ආලේප කර මිනිත්තු විස්සෙන් පමණ පිරිසුදු ජලයෙන් සෝදා හරින්න. කොකුම් පොතු, වැල්මී, වදකහ ඇල් දියෙන් මිශ්‍ර කර ගාන්න. සම පැහැපත් වේවි.
■ දෙහි යුෂ සහ පිපිඤ්ඤා යුෂ තේ හැඳි ½ බැගින් මිශ්‍ර කර ගාන්න. මිනිත්තු දහයකට පසු පිරිසිදු ජලයෙන් සෝදා හරින්න. තෙල් සහිත සමට සුදුසුයි.
■ බිත්තර කහ මදය, ඔලිව් තෙල් හා දෙහි ඉස්ම තේ හැන්දක් බැගින් මිශ්‍ර කර මුහුණේ ආලේප කර මිනිත්තු විස්සකින් පමණ සෝදා හරින්න. මෙය වියළි හමට ඉතාම සුදුසු සත්කාරයකි.
■ කඩල පිටි ස්වල්පයක් දෙහි ඇඹුලින් අඹරා තලපයක් මෙන් ගා ඇල් දියෙන් අඹරා ගා මිනිත්තු දහයකින් පමණ සෝදා හරින්න. කළු සහ සුදු ලප නැතිවේ.
■ රත් හඳුන් මී පැණියෙන් ගලගා ගාන්න. ලොත්සුඹුල් සහ කොත්තමල්ලි ඇල් දියෙන් අඹරා ගාන්න. කුරුලෑ සඳහා ඉතා යොග්‍යයි.
මීට අමතරව විවිධ රූපලාවන්‍ය ගැටළු සඳහා ආයුර්වේද වෛද්‍ය ක්‍රමයේ ප්‍රත්‍යක්ෂ ප්‍රතිකාර පවතින අතර පළපුරුදු වෛද්‍යවරයෙකු හමුවී ඔබගේ රූපලාවන්‍ය ගැටළුව විසඳා ගත හැක.
