ගැබ්ගෙන ටික දිනකින් ගබ්සා වනවා
වෛද්‍යතුමනි, මාගේ වයස අවුරුදු 39කි. මාගේ සැමියා මට වඩා මාස 6ක් පමණ වයසින් අඩු ය. අප විවාහ වී දැනට වසර 4ක් පමණ වෙනවා. එහෙත් තවම අප හට දරුවන් නොමැත. මීට වසර 2කට පමණ පෙර මා ගැබ් ගත් නමුත් ගබ්සා වීමකට ලක් වූණා. එසේම මීට මාස 2කට පමණ පෙර ගැබ් ගන්නා ලදී. එහිදී ද පෙර සේම ගබ්සාවට ලක්වුණි. ඒ නිසා ගර්භාෂය සේදීමකට ලක් කළා. ඒ අවස්ථාවේ රුධිර වහනයක් ඇති වූ නිසා ප‍්‍රතිකාර ද ලබා ගත්තෙමි. වෛද්‍යතුමනි, මේ ආකාරයට ගැබ්ගෙන පසුව ගබ්සා වන්නේ ඇයි? එය වළක්වාගත හැකි ද?
ඔබ පවසන ආකාරයට ගබ්සා වන්නේ නම් එය ඔබගේ වයස ඉක්මගොස් ඇති නිසා සිදුවන්නක් විය හැකියි. එසේම ඔබ හට නිදන්ගත රෝග තිබෙනවා දැයි සොයා බැලීම අවශ්‍යයි. ඒ අනුව, දියවැඩියාව, කොලෙස්ටරෝල් වැනි රෝග තිබෙනවාදැයි නිශ්චය කරගත යුතුයි. ඒ අනුව ගබ්සාවීම වළක්වා ගැනීමට ප‍්‍රතිකර්ම යෙදිය යුතුයි. ඒ සඳහා ඖෂධමය ප‍්‍රතිකාර කළ යුතුයි. මේ පිළිබඳ ඔබ වෛද්‍ය උපදෙස් ලබාගෙන ඒ අනුව කටයුතු කළ යුතුයි. ඒ නිසා ළගම ඇති රෝහලේ ප‍්‍රසව හා නාරි විශේෂඥ වෛද්‍යවරයා හමු වී උපදෙස් හා ප‍්‍රතිකාර ලබා ගන්න.
ද සොයිසා කාන්තා රෝහලේ ප‍්‍රසව හා නාරි විශේෂඥ වෛද්‍ය ජ්‍යෙෂ්ඨ කථිකාචාර්ය හේමන්ත දොඩම්පහල
උපුටා ගැනීම දිනමිණ පුවත් පත
