ඔසප් කාලය තුළ ස්නානය කළාට කමක් නැද්ද?

ඔසප් කාලය තුළ ස්නානය සුදුසු නැත යන මතය අප සමාජයේ මුල් බැසගෙන තිබෙනවා. මෙය ඉතාම වැරදි මතයක් වෙනවා. මේ සඳහා මූලික හේතුව වී ඇත්තේ ඔසප් වීම යනු රෝගී වීමක් ලෙස සැලකීමයි. රෝගී වූ විට ස්නානය නුසුදුසු බවට අප සමාජයේ පවතින මතය මේ සඳහා හේතු වී තිබෙනවා. කෙසේ වුවත් ඔසප් වීම යනු රෝගී වීමක් නොවන බව අප මීට පෙරද පවසා තිබෙනවා. ඔසප් වීම යනු ස්වභාවික සංසිද්ධියකි. මේ කාලයේදී ක‍්‍රීඩා කිරීම, ගමන් බිමන් යාම, ගොවිතැන් කටයුතුවල නියැලීම හෝ වෙනත් කිසිදු කාර්යයක නිතරවීම වරදක් නොවෙයි. දිනපතාම ස්නානය කිරීමට කෙනෙකුට හැකියාව පවතී නම් එය ඉතාම හොඳ මෙන්ම නිරෝගී බවට ද ප‍්‍රධාන සාධකයක් වෙනවා. ආර්තව සමයේදී ආහාර ගැනීම පිළිබඳවද අප සමාජයේ බොහෝ මිත්‍යා මතයන් පැතිර තිබෙනවා. විශේෂයෙන්ම දැරියකගේ පළමු ආර්තවය (මල්වර වීම) සිදු වූ කාලයේදී තෙල් ආහාර හා මස්,මාංශ තෙලෙහි බැද ආහාරයට ගැනීම සුදුසු නොවන බවට මිත්‍යා මතයක් පවතී. මෙය ඉතා වැරදි සහගත මෙන්ම වෛද්‍ය විද්‍යානුකූලව කිසිදු පදනමක් නැති අදහසක් බව කිව යුතුයි. ඔබටත් මෙවැනි ගැටලූ ඇත්නම් වහාම වෛද්‍යවරයකු හමුවන්න.

ආර්තවය දින 07කට වඩා පවතී නම්
විශේෂ හේතුවක් නොමැතිව ආර්තවය අක‍්‍රමවත් නම්
ආර්තවය සිදුවීම් දෙකක් අතර කාලය දින 21 ට වඩා අඩු වූ විට හෝ දින 60 කට වඩා වැඩි නම්
ආර්තවය සිදුවන සාමාන්‍ය කාලයට අමතරව අතර මග නැවත රුධිරය පිටවන්නේ නම්
ආර්තව සමයේදී, ඊට පෙර හෝ පසු යටි බඬේ ඇතිවන වේදනාව දැරිය නොහැකි නම්
ලිංගික එක්වීමෙන් පසු රුධිර ගලනයක් සිදු වේ නම්
ආර්තවහරණය සිදු වී කලක් ගිය පසු නැවත රුධිර ගලනයක් සිදු වේ නම්

දැරියකගේ නව යොවුන් විය යනු ඇයගේ ශරීරය හොඳින්ම වැඞීම සිදුවන කාලයයි. මෙය වසර පහක් පමණ රඳා පවතිනවා. මේ කාලයේදී ඇයගේ පියයුරු මෙන්ම ශ්‍රෝණි ප‍්‍රදේශය හොඳින් වර්ධනය වීමට ශක්ති ජනක මෙන්ම මේදය සහිත ආහාර වැඩිපුර අවශ්‍යයි. අනාගතයේදී දරුවන් ලැබීමටද මේ කාලයේ ඇතිවන ශරීර වර්ධනය බෙහෙවින් ඉවහල් වෙනවා. එමෙන්ම ආර්තව කාලයේදී සීතල ආහාර ගැනීම, අන්නාසි, පැපොල් වැනි ආහාර ගැනීම, උෂ්ණ අධික ආහාර ගැනීම සුදුසු නොවන බවට මතයක් තිබෙනවා. මෙම ආහාර සහ ආර්තවය අතර කිසිදු සබඳතාවක් ඇත්තේ නැහැ. මේ නිසා ආර්තව කාලයේදී මේ ආහාර ගැනීම සුදුසු බව කිව යුතුයි. එමෙන්ම ආර්තව සමයේදී බිත්තර බැද කෑම සුදුසු නොවන බවත් එවිට තනිකං දෝස ඇතිවන බවත් පැවසෙනවා. තනිකං දෝස ඇති වන්නේ සිතේ මිස සිරුරේ නොවෙයි. මේ නිසා ආර්තව සමයේදී බිත්තර හෝ මස් මාංශ වර්ග බැද කෑවාට කිසිදු වරදක් හෝ රෝගී වීමක් සිදුවන්නේ නැහැ. ආර්තව සමයේදී පිහිනුම් තටාක භාවිතය පිළිබඳවද ගැටලූ පවතිනවා. එහිදී සාමාන්‍ය සනීපාරක්ෂක තුවා භාවිතා කරමින් පිහිනුම් තටාකයට යාම එතරම් සුදුසු නොවේ. නමුත් ඒ සඳහා විශේෂයෙන් සකසන ලද ඔසප් අවශෝෂකය වන ටැම්පෝන් භාවිතා කළ හැකියි. මේ මගින් යෝනි මාර්ගයෙන් පිටතට රුධිරය ගලායාම වළකී. ටැම්පෝනය පැළඳීමෙන් පසු පිහිනීම මෙන්ම වෙනත් ක‍්‍රීඩා කිරීමද පහසු කරවනවා. ටැම්පෝනය යෝනි මාර්ගයට ඇතුළත් කළ හැකි සේ තනා තිබෙන්නක්. මේ නිසා යෝනි මාර්ගය ඇතුළතදීම රුධිරය උරා ගැනීම සිදු වෙනවා. කෙසේ වුවත් ටැම්පෝනය පැය 06කට වරක් මාරුකළ යුතුයි. රාත‍්‍රී කාලයේදී ටැම්පෝනය භාවිතා කිරීමට වඩා සනීපාරක්ෂක තුවා භාවිතය වැදගත් වෙනවා. විශේෂයෙන්ම ටැම්පෝනය භාවිතා කිරීමේදී කන්‍යා පටලයට හානි සිදුවිය හැකියි. මේ නිසා ඒ පිළිබඳව ද සැලකිළිමත් වීම වැදගත් වෙනවා. එමෙන්ම සනීපාරක්ෂක තුවා ලෙස රෙදි කැබලි භාවිතා කිරීමද තවමත් ග‍්‍රාමීය පෙදෙස් තුළ දක්නට ලැබෙනවා. මෙහිදී රුධිරය පහසුවෙන් උරා ගැනීමට පහසු කපු මිශ‍්‍ර රෙදි භාවිතා කළ යුතු අතරම ඒවා හොඳින් සෝදා පිරිසුදු කළ යුතුයි. එමෙන්ම එම රෙදි කැබලි භාවිතයට පෙර හොඳින් මැද ගැනීමෙන් විෂබීජ ඉවත් කළ හැකියි.

දුමින්ද සම්පත්

උපුටා ගැනීම දිනමිණ පුවත් පත