ඔසප්වීමේදී අධික රුධිරය වහනය හෙවත් රක්‌ත ප්‍රදරය

විවාහක අවිවාහක වුව දරුවන් ඇති හෝ නැති වුව වර්තමානයේ බහුතරයක්‌ කාන්තාවන් පෙළෙන රෝගයක්‌ බවට ඔසප්වීමේදී අධික ලෙස රුධිරය පිටවීම පත්ව තිබේ. ආයුර්වේද වෛද්‍ය විද්‍යාවේදී මෙය රක්‌තප්‍රදර ලෙස හඳුන්වයි. මෙහි රෝග ලක්‌ෂණ වනුයේ ඔසප්වීමේදී සාමාන්‍යයෙන් දින 3 ක්‌ හෝ 5 ක්‌ පමණ කාලයක්‌ පිටවන රුධිර ප්‍රමාණයට වඩා වැඩි කාලයක්‌ රුධිරය පිටවීමය. එය දින 10 ක්‌ 15 ක්‌ පමණ පැවතිය හැකිය. ඇතැම් කාන්තාවන්ගේ ඔසප්වීම අතරමැද කාලයේදී මෙය මතුවිය හැකිය. තවත් පිරිසකට ඔසප්වීම මාස තුනක්‌ හෝ ඊට වැඩි කාලයක්‌ සිදු නොවී තිබී අධික ලෙස රුධිරය පිටවෙමින් ඔසප්වීමක්‌ සිදුවේ. මෙලෙස අධික ලෙස රුධිරය පිටවීමත් සමග යටි බඩ ප්‍රදේශයේ අධික වේදනාවක්‌ ද මතුවේ. 

රක්‌ත ප්‍රදරයට හේතු : 

රක්‌තර ප්‍රදරය හෙවත් ඔසප් වීමේදී අධික ලෙස රුධිරය පිටවීමට බලපාන හේතු රැසක්‌ ඇත. ඉන් ප්‍රධාන වශයෙන්ම හේතුවන්නේ කාන්තා හෝමෝන අසමතුලිතතාවයයි. සාමාන්‍යයෙන් කාන්තාවකගේ වයස අවුරුදු 35 පමණ විට ඊස්‌ට්‍රජන් හෝමෝනය අඩුවීමට පටන් ගනී. එහිදීද හෝමෝන අසමතුලිතතාවයන් මතුවේ. නමුත් වර්තමානයේ බොහෝ කාන්තාවන්ගේ කාන්තා හෝමෝන අසමතුලිතතාවයට බලපා ඇත්තේ ඔවුන් දැඩි මානසික පීඩනයට පත්වීමය. අධික වෙහෙස අවිවේකී බව, දරුවන් නොමැති බව, සැමියා බිරිඳ අතර අසමගිය, දූ දරුවන් පිළිබඳව මතුවන ගැටලු රැකියාවේදී මතුවන ගැටලු ආදිය නිසා වර්තමානයේ බොහෝ කාන්තාවෝ දැඩි ලෙස මානසික පීඩනයට ලක්‌ව සිටිති. මෙවැනි ගැටලු නිසා කාන්තා හෝමෝන අසමතුලිත වීමෙන් ඔසප්වීමේදී පිටවිය යුතු රුධිරය ඩිම්බ කෝෂ ආශ්‍රිතව තැන්පත්වේ. එවිට ඔසප්වීමේදී අධික ලෙස රුධිරය පිටවීමක්‌ සහ අධික වේදනාවක්‌ මතුවේ. මෙය එන්ඩෝ මෙටි්‍රයෝසිස්‌ ලෙසද හඳුන්වයි. 

කාන්තා හෝමෝන අසමතුලිතතාවය දිගු කලක්‌ පැවතීමෙන් ඇතැම් කාන්තාවන්ගේ වයස අවුරුදු 35 පමණ වන විට ගර්භාෂ ඇතුළත ස්‌ථරය ගර්භාෂ බිත්තියට කි¹ බැසීම නිසා ඔසප්වීමේදී එම ස්‌ථානවලින් අධික ලෙස රුධිරය පිටවේ. මෙය දිගු කාලයක්‌ පැවතීම නිසා ගර්භාෂ බිත්ති රළුවේ. එවිට ගර්භාෂ හැකිලීම දිග හැරීම යාන්ත්‍රණය නිසි ලෙස සිදු නොවේ. එහි ප්‍රතිඵලය වන්නේ ඔසප්වීමේදී පිටවන රුධිරය පාලනය කින් තොරව පිටවීමය. මෙය ඇඩිනොමයොසිස්‌ ලෙසද හඳුන්වයි. කාන්තාවන්ගේ සිරුරේ පෝෂණ උෂ්ණතාවය නිසාද ඔසප්වීමේදී අධික ලෙස රුධිරය පිටවේ. එය සිදුවන්නේ පෝෂණ ඌණතාවය නිසා රුධිරය කැටි ගැසීම සඳහා තිබිය යුතු සංඝටකවල ඇතිවන ඌණතාවයයි. එවිට රුධිරය කැටි ගැසීම නිසි ලෙස සිදු නොවීමෙන් ඔසප්වීමේදී අධික ලෙස රුධිරය පිටව යයි. මීට අමතරව ගර්භාෂ ගෙඩි ගැබ්ගෙල පිළිකා, ගර්භාෂයේ පිළිකා හෝ ඩිම්බ කෝෂය ආශ්‍රිතව ඇතිවන පිළිකා නිසාද ඔසප්වීම නතර වීමට ආසන්න වන විටදීද (ආර්තවහරණය) ඔසප් අධික ලෙස රුධිරය පිටවේ. 

ඔසප්වීමේදී පිටවන රුධිරය :

ඔසප්වීමේදී අධික ලෙස පිටවන රුධිරය සම්බන්ධව ඇතැම් කාන්තාවන් සිතා සිටින්නේ එය අපිරිසිදු රුධිරය ලෙසය. නමුත් මෙලෙස අධික ලෙස පිටවන්නේ පිරිසිදු රුධිරයයි. එබැවින් සිරුරින් අධික ලෙස රුධිරය පිටවීම නිසා සිරුර දුර්වලවේ. රක්‌ත හීනතාවය ඇතිවේ. 

ප්‍රතිකාර කළ යුතු ආකාරය : 

යම් කාන්තාවකගේ ඔසප්වීමේදී අධික ලෙස රුධිරය පිටවේ නම් අධිකවේදනාවක්‌ පවතී නම් ඇය අනිවාර්යයෙන්ම මානසික අසහනයෙන් පෙළෙන්නීය. නිතර නිතර කෝපයට පත්වන්නීය. එබැවින් ප්‍රථමයෙන්ම කළ යුත්තේ මනස සන්සුන් කිරීමය. දෙවනුව ඇයට මතුව ඇති රෝග තත්ත්වය නිවැරදිව හඳුනාගෙන ප්‍රතිකාර ලබාදිය යුතුය.

උපුටා ගැනීම දිවයින පුවත්පත