අවුරුදු 35 ඉක්මවූ සෑම විවාහක කාන්තාවක්ම පැප් පරීක්ෂණය කළ යුතුයි

කාන්තාවකගේ ජීවිතයේ ඇය ගත කරන කාලසීමා විවිධ පරාසයන්හි විහිදී යයි. විටෙක ඉතාම සුරතල් දැරියක් ලෙසද තවත් වරෙක සුන්දර තරුණියක් ලෙසද තවත් වරෙක දයාබර මවක් ලෙසද ඇය ගත කරන ජීවිතය, කාලයෙන් කාලයට යම් යම් වෙනස්කම් වලට ලක් වේ. මෙසේ ඇය ක්‍රමයෙන් වර්ධනය වන විට ජීවිතයේ විවිධ අවධි දක්වා පරිවර්ථනය වන්නේ ප්‍රධාන වශයෙන් විශේෂිත වූ ක්‍රියාවලියක ප්‍රතිඵලයක් වශයෙනි. මේ ක්‍රියාවලියේදී ස්ත්‍රීයකගේ ප්‍රජනක පද්ධතිය මූලිකත්වයක් ගෙන කටයුතු කරන අතර එම පද්ධති ආශි‍්‍රතව ඇති වන වෙනස්කම් යහපත්ව ඇති වනවා මෙන්ම ක්‍රමයෙන් වයසට යනවිට ඇතිවිය හැකි රෝග පිළිබඳව විශේෂ අවධානයකින්ද කටයුතු කළ යුතුයි. ඒ අනුව මෙවර අපගේ සූදානම ප්‍රසව හා නාරිවේදය පිළිබඳව විශේෂඥ වෛද්‍ය ප්‍රසන්ත ගංගේ මහතා සමඟ ගැබ්ගෙල පිළිකාව හා එය කල්තබා හඳුනා ගැනීමට සිදු කෙරෙන පැප් පරීක්ෂණය පිළිබඳව ඔබව දැනුවත් කිරීමටයි.

පැප් ටෙස්ට් එක ලෙසින් හඳුන්වන්නේ කුමක්ද?

පැප් ටෙස්ට් එක ලෙසින් හඳුන්වන්නේ කාන්තාවන්ගේ ගැබ් ගෙල ආශි‍්‍රතව ඇතිවන පිළිකා තත්ත්වයන් හඳුනා ගැනීමට සිදු කෙරෙන පරීක්ෂණයයි.

මෙම පරීක්ෂණය සඳහා අපි බියක් ඇති කරගත යුත්තේ ඇයි?

කාන්තාවන් අතර සුලබව පවතින පිළිකා අතුරින් මෙම පිළිකාව දෙවැනි වන්නේ පියයුරු පිළිකාවට පමණි. ඒ නිසා රෝගය කල්තබා හඳුනා ගැනීම ඉතා වැදගත්.

ගැබ්ගෙල පිළිකාවට හේතු වන්නේ කුමක්ද?

ගැබ්ගෙල පිළිකාව සඳහා හේතු වන්නේ HPV නැමැති වෛරසයක්. මෙය හියුමන් පැපිලෝමා වෛරස් යන නමින්ද හඳුන්වනු ලැබේ.

මෙම වෛරසය ආසාදනය වන්නේ කෙසේද?

මෙම වෛරසය බහුලව ඇතිවන්නේ ලිංගික වශයෙන් සක්‍රීය කාන්තාවන්ටයි. යම් කාන්තාවක් විවාහක නම් හෝ ලිංගික වශයෙන් සක්‍රීය නම් වෛරසයකට ගොදුරු වීමේ වැඩි ඉඩකඩක් පවතී.

මෙය හඳුනාගැනීම වැදගත් වන්නේ ඇයි?

මෙම රෝග තත්ත්වය මූලිකව හඳුනාගත හැක්කේ රෝගය පැතිරී යන්නට පෙර ඉන් වැළකීමටයි. ඒ වගේම වඩාත් පහසුවෙන් ගැබ්ගෙල පිළිකාව හඳුනාගත හැකි අතර ඒ සඳහා ඉතා සරල පරීක්ෂණයකට පමණක් මුහුණ දිය යුතුයි. ඒ වගේම කල්තබා හඳුනා ගැනීමෙන් 100%ක් රෝගයෙන් වැළකී සිටීමේ හැකියාවක්ද පවතියි.

මෙම පරීක්ෂණයේදී සිදු කෙරෙන්නේ කුමක්ද?

මෙහිදී පරීක්ෂණයට යොමුවන කාන්තාවගේ යෝනි මාර්ග හරහා ඇතුල් කරන උපකරණයක් මාර්ගයෙන් ලබා ගන්නා සෛල කොටසක් වීදුරු කදාවකට ලබාගෙන රසායනාගාරයක් තුළදී පරීක්ෂා කරනු ලබයි.

පැප් පරීක්ෂණය වේදනාකාරීද?

පැප් පරීක්ෂණය සිදු කරන ආකාරය නිසා කාන්තාවන් ඒ පිළිබඳව යම් බියකින් පසු වේ. නමුත් ඉන් කිසිදු වේදනාවක් ඇති නොවන අතර එම පරීක්ෂණයට යොමු වීමට බියක් ඇති කර ගත යුතු නැත.

මෙවැනි පරීක්ෂණයට යොමු වූ පමණින්ම බියක් විය යුතුද?

ඕනෑම කාන්තාවක් පැප් පරීක්ෂණයක් කළ පමණින් බයක් ඇති කරගත යුතු නොවේ. නමුත් එම පරීක්ෂණයේදී ඩ්ර්‍ථඍ වෛරසය තිබෙනවා යැයි හඳුනාගත හොත් පමණක් තරමක අවධානයකින් කටයුතු කළ යුතු අතර නොපමාව වෛද්‍ය ප්‍රතිකාර ලබා ගැනීමට පෙළඹිය යුතුයි.

පැප් පරීක්ෂණයකදී නරක සෛල තිබේදැයි හඳුනා ගතහොත්?

එසේ නරක සෛල තිබෙන බවට හඳුනාගත හොත් කුඩා ශල්‍යකර්මයක් මාර්ගයෙන් ඒවා ඉවත් කරනු ලබයි. මේ සඳහා බියක් ඇති කර ගත යුතු නොවන අතර ඉදිරියේදී නැවත වැළඳීමේ හැකියාවද අවම වේ.

පැප් පරීක්ෂණය සිදු කළ යුත්තේ වයස අවුරුදු කීයේදීද?

වයස අවුරුදු 35 ට පසුව සෑම විවාහ පත් කාන්තාවක්ම එසේත් නැත්නම් ලිංගිකව සක්‍රීය සෑම කාන්තාවක්ම මෙම පරීක්ෂණයට යොමුවිය යුතුයි. ලංකාවේදී නම් සුවනාරි සායනයකදී මෙම පරීක්ෂණය සිදු කරගත හැකියි.

පැප් පරීක්ෂණය එක වතාවක් පමණක් කර බැලීම ප්‍රමාණවත්ද?

එම පරීක්ෂණය එක් වතාවක් පමණක් කිරීම ප්‍රමාණවත් නොවේ. විවිධ රටවල මෙම පරීක්ෂණයට යොමුවිය යුතු කාලසීමාවන් වෙනස් වන අතර ලාංකික කාන්තාවන් අවම වශයෙන් වසර 5 කට වතාවක් පැප් පරීක්ෂණයට යොමුවිය යුතුයි. ඇත්තෙන්ම රෝගය කල්තබා හඳුනාගැනීම ඉතා වැදගත් වන අතර තත්ත්වය බරපතළ වූවොත් සුවකිරීම අපහසුවේ. ඒ නිසා කල් ඇතිව හඳුනා ගෙන 100%ක් සාර්ථක ප්‍රතිකාර මේ සඳහා ලබාදිය හැකියි.

උපුටා ගැනීම දිනමිණ