කාන්තාවන්ගේ සෞඛ්‍යයට අභියෝග කරන සාධක
මවකගේ, ගෘහණියකගේ සෞඛ්‍යය මුළු පවුලේම සෞඛ්‍යය හඟවන කැඩපතක් බව සැලකිය හැකිය. එහෙත් කාන්තාවකගේ සෞඛ්‍යය බිඳවැටීම නිසා ඇයගේ සෞඛ්‍යය පමණක් නොව මුළු පවුලේම නැතිනම් සමාජයේම සෞඛ්‍යය අවුල් කිරීමට සමත් වන බව ලෝක සෞඛ්‍ය සංවිධානය දක්වයි. ලෝක සෞඛ්‍ය සංවිධාන වාර්තාවලට අනුව කාන්තාවකගේ සෞඛ්‍යයට අභියෝගාත්මක වන සාධක කිහිපයක් මෙසේය.
මන්දපෝෂණය හා අධි පෝෂණය :
ශ්‍රී ලංකාව වැනි රටවල කාන්තාවන් අතරින් සැලකිය යුතු සංඛ්‍යාවක්, අඩු තරමින් සෑම තුන්දෙනෙකුගෙන් එක් අයෙකුම මන්දපෝෂණයෙන් පෙළෙති. ඔවුන් ශරීර ස්කන්ධ දර්ශකය 18.5 වඩා පහළය. ප්‍රමාණවත් තරම් ආහාර නැතිකම පමණක් නොව තම ආහාර ගැන නොසලකා පවුලේ අනෙක් සාමාජිකයන්ගේ අවශ්‍යතා ගැන පමණ ඉක්මවා කටයුතු කිරීම මෙයට දායක වන ප්‍රබල සාධකයකි. නීරක්තිය නැතිනම් ලේ අඩුකමද කාන්තාවන් ඉතා වැඩි සංඛ්‍යාවකට තර්ජනාත්මකව බලපායි. යකඩ වලින් පෝෂිත ආහාර (මාළු, මස්, පලා, එළවළු හා පලතුරු) ගැනීමේ මදකම, කොකු පණු රෝගය පැවතීම, මැලේරියාව වැනි රෝග තිබීම මත තම ජීවන චක්‍රයේ ස්වභාවික තත්ත්වයන් (ඔසප් වීම) ආදිය හේතුකොට මෙම තර්ජනය ඇතිවෙයි. කාන්තා මන්දපෝෂණයේ ප්‍රතිඵල අතර අඩු බරින් යුත් හා රෝග ආසාදනයට ලක්වෙන දරුවන් ලැබීම, දරුවන්ගේ වර්ධනය බාලවීම මෙන්ම කාන්තාවන්ද නිතර ලෙඩ රෝග හා ආසාදනයන්ට පාත්‍රවීම දැක්විය හැකිය. මේ අතර කාන්තාවන් අතරින් සුළු ප්‍රතිශතයක් අධි පෝෂණයට ලක්ව සිටිති. තරබාරු බව දක්වන ඔවූහු දියවැඩියාව, අධික රුධිර පීඩනය, හෘදය රෝග මෙන්ම ආතරයිටීස් (පර්වද්‍රහය) වැනි රෝග වැළඳී පීඩා විඳිති. තම ආහාර නිසිලෙස පාලනය කර ගැනීම හා කය වෙහෙසීම මගින් තරුණ වයසේ සිට කටයුතු කළේ නම් මෙම විපරිතයට ඔවුන් ගොදුරු නොවන්නට තිබිණ.
මානසික පීඩා :
පිරිමින්ට වඩා ඉතා වැඩි සංඛ්‍යාවක් ගැහැණු මානසික රෝග වලින් විශේෂයෙන්ම විෂාදය හෙවත් මානසික අවපීඩන තත්ත්වයෙන් පෙළෙති. බැලු බැල්මට අවබෝධ නොවෙතත් තම ජීවිතය ගැන විශේෂයෙන්ම තම පවුල් ජීවිතයේ දුක් ගැහැට ගැන සිතමින් මානසිකව පීඩා විඳින කාන්තාවන්ගේ සංඛ්‍යාව අති විශාලය. පන්සල් - පල්ලි - කෝවිල් යනාදිය නොතිඛෙන්නට මෙම තත්ත්වය කොතරම් සුවිශාල ගැටළුවක් වේද යන්න සිතීමටවත් නොහැකි තරම්ය. තම දුක් ගැහැට තුන්සරණයට, දෙවිඳුන්ට පවසා ගැහැණුන් යම් මානසික පිළිසරණක් ලබති. මනෝ වෛද්‍යවරුන් වෙත උපදේශනයට යන කාන්තාවන් සංඛ්‍යාව අඩුය. ජීවිතාපේක්ෂක කාලය අනුව බලන විට කාන්තාවන් පිරිමින්ට වඩා වැඩි කාලයක් ජීවත් වෙති. ලෝකයේ හැම රටකම සීයලාට වඩා ආච්චිලා වෙසෙති. එහෙත් ජීවිතයේ අවසන් කාලය සෞඛ්‍යමත්ව සහ ගුණාත්මකව ජීවත්විය නොහැකි නම් මෙම වැඩි ආයුෂ නරකක් මිස හොඳක් උරුම නොකරයි. අවශ්‍යව ඇත්නේ "දිවියට ආයුෂ" නොව "ආයුෂයට දිවිය"
පිළිකා තර්ජනය පැවතීම :
කාන්තාවන් අතර බහුලම පිළිකා තත්ත්ව දෙකක් කල් තබා හඳුනාගැනීමේ පහසුකම් තිබියදීත් අදත් කාන්තාවන් අතර වැඩියෙන්ම ඇතිවන්නේ එම පිළිකා දෙකමය. ඉන් එකක් පියයුරු පිළිකාවය. නිසි ආකාරයෙන් ස්වයං පියයුරු පරීක්ෂාවේ නිරත වුවහොත් හා එය මසකට වරක්වත් සිදු කිරිමට හුරු වුවහොත් මුල් අවස්ථාවේදීම දැන හඳුනාගෙන ප්‍රතිකාර මගින් ජීවිත අවදානම දුරැලිය හැකිය. අනෙක් බරපතල ස්ත්‍රී පිළිකා තත්ත්වය වන ගැබ්ගෙළ පිළිකාව ඇති වීමේ අවදානම ගව්ගානක් තබා හඳුනා ගැනීමට "පැප් පරීක්ෂාව" ලෙස නම් කර ඇති ගැබ් ගෙල ස්‍රාව පරීක්ෂාව සමත්ය. සෑම ප්‍රදේශයකම ඇති "සුවනාරී සායන" මගින් නොමිලයේම සිදු කරන මෙම පරීක්ෂාවෙන් ප්‍රයෝජන නොගැනීම නිසා අදත් සැලකිය යුතු කාන්තාවන් සංඛ්‍යාවක් මැදි හා වැඩිහිටි වයසේදි ගැබ් ගෙළ පිළිකා ගොදුරු බවට පත්වෙති. කෘත්‍රිම හා පෙර සකස් කළ ආහාර වලින් මිදී අපගේ දෙමාපියන් හුරුව සිටි නිවුඩ්ඩ සහ රොඩ්ඩ සහිත ආහාර ගැනීමට හුරුවීම මගින් ආහාර මාර්ගයේ පහළ කොටසේ හා ගුද මාර්ගයේ පිළිකාවලින්ද, බුලත් විට සැපීම හා බුලත් හපය බොහෝවේලා මුඛය තුළ රඳවාගෙන සිටීමෙන් වැළකීම මඟින් මුඛ පිළිකාවද බොහෝදුරට ඈත්කළ හැකි බව දැන සිටීම වැදගත්ය. ලාබාල වියේදී විවාහවීම හා දරුවන් ලැබීම තවමත් මෙරට කාන්තා සෞඛ්‍යයට බරපතළ අභියෝගයක්ව පවතියි. මෙම අවාසනාවන්ත තත්ත්වය නිසා පෝෂණ දුර්වලතා වලට ලක්ව ඇග කෙට්ටු වීම, වෙහෙසා වැඩ කළ නොහැකිවීම හා දරිද්‍රතාවය නැංවීමටත් ආධාරයක් වෙයි. මානසික පීඩනයට ලක් වීමද නොසලකා සිටිය නොහැකිය. නීරක්තිය ඇතිවීමට මෙන්ම ගර්භාෂය පහත් වීම, ෆිස්ටියුලා ඇතිවීම ආදී තත්ත්වයේද මෙහිදී කාන්තා සෞඛ්‍යයට තර්ජනාත්මකය.
කාන්තා හිංසනය :
බොහෝදෙනා සිතනුයේ මෙය පිරිමින්ට පමණක් අයිති ලෝකයක් ලෙසය. එසේම ගැහැණිය ඔවුන්ගේ මනදොළ සපුරන ලිංගික භාණ්ඩයක් ලෙසය. මෙම අදහස තිඛෙන තාක් කල් කාන්තා හිංසනය රජ කරනු ඇත. මේ නිසා අතපය කඩාගෙන, තුවාල සීරීම් කරගෙන ප්‍රතිකාර පතා එන කාන්තාවන්ට වඩා වැඩි සංඛ්‍යාවක් දිනපතා කනස්සල්ලෙන් හා දුර්වල වූ මානසිකත්වයෙන් දිවි ගෙවන බව තේරුම් ගත යුතුය.
ලිංගික ආපදා වැඩිවෙයි :
එසේම ලාබාල වියේදී ලිංගික කාර්යයට යොමුවීම ගැබ්ගෙල පිළිකා සඳහා ආරාධනා කරන්නකි. කිහිපදෙනෙකු සමඟ ලිංගික සබඳතා පැවැත්වීම නිසා ගැබ්ගෙළ පිළිකා ඇතිවීම පමණක් නොව එච්.අයි. වී. - ඒඩ්ස් ඇතුළු, ලිංගික සම්බන්ධතා නිසා ඇතිවන රෝග ආසාදනවලටද කාන්තාව පහසු ගොදුරක් බවට පත්වෙයි. ලිංගික මාර්ගයේ ස්වභාවික පිහිටීම හේතුකොට ජෛවීය වශයෙන්ම පිරිමියෙකුට වඩා පහසුවෙන් කාන්තාවන් ලිංගිකව සම්ප්‍රේෂණය වන රෝගවලට ගොදුරු වීමට හේතුවෙන බව අවධාරනය කළ හැකිය. උපත් පාලන ක්‍රම භාවිතය, ආරක්ෂිත ලිංගික උපක්‍රම භාවිතය වැනි වර්තමානයෙහි සංවර්ධනය කර ඇති ක්‍රියාමාර්ග සහාය කර ගැනීම ලිංගික ආපදා ඉවත් කරගැනීමට මාර්ගයකි.
උපුටා ගැනීම දිනමිණ පුවත් පත
