කාන්තාවන් ජලය පානය කිරීමේ වැදගත්කම.
අපේ ශරීරයෙන් 70%ක්ම ඇත්තේ ජලයයි. මිනිස් සිරුරේ ක්‍රියාකාරීත්වයට ජලය අත්‍යවශ්‍යම සාධකයකි. කාන්තාවගේ ශරීරය විවිධ අවධීන්වලදී වෙනස්වීම්වලට ලක්වන නිසා ජලයේ අවශ්‍යතාව ගැන ඔබ වඩාත් දැනුවත් විය යුතුයි.
අස්ථි රෝග වැළැක්වීමට :
අස්ථිවල 25%ක්ම ජලය පවතින නිසා එහි නිසි ක්‍රියාකාරිත්වයට එය බෙහෙවින් වැදගත් වන්නකි. වයස් ගතවන විට විවිධ අස්ථි රෝග ඇතිවීමේ අවදානම කාන්තාවන්ට වැඩි නිසා ඔබ ඒ ගැන වැඩි අවධානයක් යොමු කළ යුතුමයි. කැල්සියම් අඩංගු කිරි වැනි පාන වර්ග, කැඳ වර්ගවල පෝෂණය අඩංගු වුවත් උණුකර නිවාගත් පිරිසුදු මිනරල් වතුර කෝප්ප 8ක්වත් පානය කිරීමට හුරුවන්න. දිනකට ලීටර් 2ක්වත් පානය කිරීම වඩාත් සුදුසුයි. සිරුරට අවශ්‍ය ජලය නොලැබී ගිය විට විජලනය වී විවිධ රෝග ඇතිවිය හැකියි.
සමේ තෙතමනයට :
කාන්තා සිරුරේ අභ්‍යන්තරය ක්‍රියාවලියට පමණක් නොව සම, නිය හා හිසකෙස්වල නිරෝගී බවටත් ජලය අත්‍යවශ්‍යයි. සමේ තෙතමනය රඳවන ආලේපන ගැල්වුවත් ශරීරය ඇතුළතින්ම ලබාදෙන පෝෂණය වඩාත් වැදගත්. සම රැලි වැටීම වළක්වා දිදුලන නිරෝගී බවක් ලබා ගැනීමට නම් ජලය පානයට වැඩි අවධානයක් ලබා දිය යුතුමයි. නියපොතු අවර්ණ වී කැඩී යමින් සම අඳුරු වීමටත් විජලනය බලපායි. මේ නිසා රූපලාවණ්‍ය ගැන සිතන ඔබත් පිටත ආලේපනවලට වඩා අභ්‍යන්තර පෝෂණය ගැන සැලකිලිමත් වන්න.
බෝ නොවන රෝග අවදානම වැළැක්වීම :
කොලෙස්ටරෝල්, අධික රුධිර පීඩනය හා දියවැඩියාව වැනි බෝ නොවන රෝග අවදානමින් මිදෙන්න ජලය කදිම ඔෟෂධයක්. දියවැඩියා රෝගීන්ගේ සිරුරින් ජලය නිතර පිටවන නිසාත් වැඩිපුර ජලය පානය කළ යුතුමයි. හෝමෝන ගැටලු ඇතිවීමෙන් මතුවන ආතතිය පාලනයටද ජලය සුදුසුම පානයකි.
ශරීර උෂ්ණත්වය අඩු කිරීමට :
ඇතැම් කාන්තාවන්ගේ ශරීරයේ උෂ්ණත්වය වැඩි නිසා ජලය හොඳින් පානය කිරීමෙන් එය තරමක් දුරට හෝ මැඬපැවැත්විය හැකියි. ගර්භාෂයේ දරුවන් පිළිසිඳ ගැනීමේදී ගැටලු ඇතිවන්නේද ශරීර උෂ්ණත්වය නිසයි. හොඳින් ජලය පානය කරමින් සිරුර සිසිල්ව තබා ගන්නේ නම් මෙවැනි අවදානම්වලින් අත්මිදිය හැකියි.
තිබහට වතුර බොන්න එපා :
වතුර පිපාසය ඇති වනතෙක් නොසිටින්න. ඉන් හැඟවෙන්නේ සිරුරට අවශ්‍ය ජල ප්‍රමාණය හිඟ බවයි. මේ නිසා පිපාසය ඇති වීමට පෙර වතුර පානය කිරීමේ පුරද්ද ඇති කර ගන්න. පැය දෙකකට වරක් වතුර කෝප්පයක්වත් පානය කරන්න. ප්‍රධාන ආහාර වේලට පසු නින්දට පෙර වැඩිපුර වතුර පානය නොකරන්න. නමුත් දිවා කාලයේ විටින් විට වතුර පානය කරමින් ශරීරයේ උෂ්ණත්වය පාලනය කර ගන්න උත්සාහ ගන්න. අධික උෂ්ණත්වය ඇති විට අවම වශයෙන් වතුර ලීටර 1/2ක්වත් පානය කරන්න.
මානසික සුවයට :
නව යොවුන් වියේදී තරුණියකගේ ශරීරය ඇතුළතින් මෙන්ම පිටතින්ද විශාල වෙනසකට ලක් වෙයි. මේ ක්‍රියාවලියේදී සිරුර නිසි ලෙස ක්‍රියාත්මක වීමට හා නිරෝගී වීමට ජලය හොඳම ආදේශකයක්. මනසද මේ අවධියේදී විශාල වෙනසකට ලක්වන නිසා එම ආතතියෙන් මිදීමට හොඳින් ජලය පානය පුරුද්දක් කර ගන්න.
උපුටා ගැනීම මව්බිම
