ඔසප් කාලයට සුදුසු නුසුදුසු ආහාර

මාසිකව සිදුවන ආර්තවයේදී බොහෝ කාන්තාවන් අපහසුතාවට පත් වෙනවා. මාංස පේශිවල වේදනාව, රුධිරය පිටවීම හා සම වියැළීම වැනි අපහසුතා පාලනය කර ගැනීමට ඔබේ ආහාර රටාව ගැන සැලකිලිමත් වීම වැදගත්.

කැල්සියම් - දෛනික ආහාර වේලට එක් වරක් හෝ කැල්සියම් අඩංගු ආහාරයක් එක් කර ගැනීම වඩාත් සුදුසුයි. සෝයා කිරි වීරුදුරුවක් හෝ මී කිරි මෙයට කදිම ආදේශකයක්. ඔබේ අස්ථි ශක්තිමත් කරමින් ප්‍රබෝධයක් මින් ලබාගත හැකිය.

කාබෝහයිඩ්‍රේට් - ධාන්‍යමය හා කෙඳි සහිත නැවුම් පලතුරු වැනි ආහාර ගැනීම ඔබට ප්‍රමාණවත් වන අතරම කාබෝහයිඩ්‍රේට් සහිත ආහාර සිරුරේ විජලනය පාලනය කරයි.

ජලය - ආර්තවය සමයේදී ඔබේ ශරීරයෙන් දියර අධිකව පිටවෙයි. මේ නිසා හොඳින් ජලය පානය කිරීමද වැදගත්ය.

ඛනිජලවණ - ලෙමන් හා අන්නාසි ඛනිජ ලවණ අඩංගු පලතුරුය. මැග්නීසියම් තරබාරුකම පාලනය කරවයි. කජු හා බෝංචි ද මැග්නීසියම් අඩංගු ආහාර වෙයි. මේවාද ඔබේ ආහාර වේලට එක් කර ගැනීමට උනන්දුවන්න.

ප්‍රෝටීන් - ආර්තව සමයේදී සිරුරට ශක්තිය ලබා ගැනීමට ප්‍රෝටීන් සහිත ආහාර ලබා ගැනීම වැදගත්. කිරි හා කුකුළු මස්වල මේවා බහුලව අඩංගුය.

විටමින් - විටමින් ආතතිය සමනය කිරීමට සමත්ය. කෙසෙල් වැනි ආහාරවල මේවා අඩංගු වන නිසා උදෑසන ආහාරයට මෙවැනි පෝෂණීය ආහාර හැම විටම එක් කරගන්න.

යකඩ - දින 5ක් පමණ ශරීරයෙන් රුධිරය පිටවන නිසා යකඩ අඩංගු රටඉඳි, බෝංචි හා මස් වර්ග සෑහෙන ලෙස ආහාරයට ගන්න.

නුසුදුසු ආහාර - කැෆේන් - ශරීරයේ ඊස්ට්‍රජන් මට්ටම මින් වැඩි කරවයි.

සීනි - පැණි රස ආහාර නිතර ගැනීම අලස බව ඇති කරවයි. මේ නිසා කේක් හා කෝලා වැනි පැණි රස බීම වර්ගවලින් ඈත් වන්න.

ලුණු - ලුණු සහිත ආහාර පිපාසය ඇති කරවයි. ක්ෂණික ආහාරවල ලුණු අධිකව අඩංගු වන නිසා එවැනි ආහාර ගැනීම පාලනය කරන්න.

ඔබත් ආර්තව සමයේදී හැමවිටම සමබල ආහාර වේලක් ලබාගෙන නිරෝගීව සිටීමට උත්සාහ ගන්න.

ශාලිකා රංගනී සමරදිවාකර
උපුටා ගැනීම මව්බිම