කොතරම් උත්සාහ කළත් කෙට්ටු වෙන්න බැරි ඇයි?

තරබාරුකම පාලනය ගැන අප කොතරම් කතාබහ කළත් අදටත් එයින් නිසි ප්‍රයොජනයක් ලබා ගන්න නොහැකිව ඇතැමුන් පීඩා විඳිනවා. එලෙස ඔබේ අරමුණු අසාර්ථක වන්නට මේ කාරණා බලපාන්න ඇති.

පරම්පරානුගත ගැටලු : 

මවුපියන්ගෙන් ගෙනෙන රෝග කාරකයන් හා පරම්පරාගත තරබාරුකමත් අනාගත පරපුරට යා හැකියි. නමුත් ඔබ උත්සාහ කළහොත් තරබාරුකම තරමක් හෝ පාලනය කළ හැකියි.

• හෝමෝන ගැටලු
• ආහාර පාලනය කළ නොහැකි ගැටලු
• දියවැඩියාව, අධික රුධිර පීඩනය හා කොලෙස්ටරෝල් වැනි බෝ නොවන රෝග නිසාත් තරබාරුකම පාලනය කිරීම අසීරු විය හැකියි.

අන් අය අනුකරණය කිරීම : 

වෙනත් අයගේ diet ක්‍රම හා ව්‍යායාම් රටා ඔබ අත්හදා බැලුවද ඔබට ඉන් නිසි ප්‍රයෝජන ලබාගත නොහැකියි. ඇතැම් අය ජිම් එකට ගොස් අන්තර්ජාලයේ ඇති ව්‍යායාම් අත්හදා බැලීමද සිදුකරයි. නමුත් මෙයද වැරැදි ක්‍රියාවකි. තමාට සුදුසු ආහාර රටාව හා ව්‍යායාම් ක්‍රම තෝරාගත යුතු වන්නේ වෛද්‍ය විද්‍යාත්මකව සොයා බැලීමෙන් පසුවය. එය පුද්ගලයාගෙන් පුද්ගලයාට වෙනස්වන නිසා අන් අය අනුකරණය කිරීමෙන් නම් තරබාරුකමට පිළියම් සෙවිය නොහැකියි.

ජනප්‍රිය මතවාද : 

බොහෝ දෙනා සිතන්නේ නිරාහාරව සිටීමෙන් තරබාරුකම පාලනය කළ හැකි බවයි. එය ජනප්‍රිය මතයකි. දිනකට එක වේලක් නිරාහාරව සිටීම වැනි වැරැදි සෞඛ්‍ය පුරුදු නිසා ඔබ රෝගී වීමටද පුළුවන. තුන් වේලම සමබල ආහාර ලබාගෙන වෙහෙස වී වැඩ කරන්නේ නම් මහත පාලනය වී සෞඛ්‍ය සම්පන්නව සිටීමට හැකියි. නමුත් ව්‍යායාම් කරන්නේ නම් එයට සුදුසු වේලාවක් මෙන්ම ඇඳුමකින්ද සැරැසී කායිකව හා මානසිකවද එයට සූදානමක් ලබාගන්න. ගෘහණියක වශයෙන් ඔබ කරන කාර්යයන් මෙයට සහායක් නොවන්නේ කයෙන් මෙන්ම මනසින්ද සූදානම්ව ශරීරයට දැනෙන ලෙස එය සිදු නොවන නිසයි.

පහසු කෙටි ක්‍රම භාවිතය : 

තරබාරු අය විවාහයට ළංවන විට තම පෙනුම ගැන සැලකිලිමත් වන නිසා සිහින් වීමට කෙටි ක්‍රම සොයා යයි. එය ශරීරයට එතරම් හිතකර නොවන අතරම කෙටි කාලීන පිළියමක් පමණි. ඔබ කායිකව පමණක් නොව මනසින්ද එම තත්ත්වයට දැනෙන ලෙස ව්‍යායාම් නොකරන නිසා නැවතත් තරබාරු විය හැකියි. එම ක්‍රමවේද ශරීරය විසින්ම ප්‍රතික්ෂේප කිරීම එයට හේතුවයි.

කාන්තාවන්ගේ හෝමෝන ක්‍රියාකාරීත්වය : 

කාන්තාවන්ගේ මාස්පතා සිදුවන ඔසප් ක්‍රියාවලිය, විවාහ සබඳතා හා දරුවන් ලැබීමේදී වන හෝමෝන ක්‍රියාවලිය නිසාත් තරබාරු වෙයි. අවුරුදු 50 වනතෙක් කාන්තාවන්ගේ ශරීරයේ හෝමෝන ක්‍රියාවලිය දස වතාවක් පමණ වෙනස් වීමට ලක්වෙයි. තයිරොයිඩ් ග්‍රන්ථියේ බලපෑමෙන් බෙල්ල, අත් ආදිය මහත් වෙයි. මෙය පාලනය කිරීමටද අපහසු විය හැකියි.

එක්සත් රාජධානියේ රාජකීය වෛද්‍ය සභාවේ විශේෂඥ වෙද්‍ය අසංග විජයරත්න

උපුටා ගැනීම මව්බිම