පිරිමින්ට වගේම ගැහැනුන්ටත් සිරෝසිස් හැදෙනවා

මිනිස් සිරුර කියන්නේ ස්වභාව ධර්මයෙන් නිර්මාණය කළ අපූරු නිමැවුමක්. මෙම සිරුරේ සියලු පද්ධති ක්‍රියාත්මක වන්නේ එකිනෙකට සම්බන්ධ වෙමිනි. මින් එක් පද්ධතියක හෝ අකර්මණ්‍යතාවක් ඇතිවුවහොත් මුළු සිරුරම වුවත් අඩපණ කිරීමට සමත් වේ. අක්මාව කියන්නෙත් ශරීරයේ විශාල කාර්යභාරයක් සිදුකරන ප්‍රධානතම ඉන්ද්‍රියක්. අක්මාව ආශ්‍රිත රෝග පිළිබඳ කතා කරන විට අපට නිතැතින්ම සිහියට එන්නේ සිරෝසිස් රෝගයයි. බොහෝ දෙනාගේ මතය වන්නේ අක්මාව ආශි්‍රත මෙවන් රෝග ඇති වන්නේ පුරුෂයන්ට පමණක් වන බවය. නමුත් Non Alcoholic Fatty Liver රෝගය දැන් කාන්තාවන්ටත් බහුලවම වැලඬෙන බව ඔබ දන්නවාද? මධ්‍යසාර භාවිතයෙන් තොරව අක්මාවේ තෙල් තැන්පත් වීම මෙයට හේතු වේ. අක්මාව යනු ඔබේ සිරුරේ පවතින විශාලතම අවයව අතර එකකි. ජීවිතය පවත්වා ගැනීම සඳහා වූ අත්‍යවශ්‍ය කාර්යයක් මේ හරහා සිදුවේ. අක්මාවේ මූලික ක්‍රියාවලිය අතර,

ආහාර ගබඩා කිරීම.
විටමින් නිපදවීම.
ප්‍රෝටීන් නිපදවීම.
ලේවලට ඇතුළු වන විස ද්‍රව්‍ය ඉවත් කිරීම.
ඖෂධ සම්බන්ධ පරිවෘත්තීය ක්‍රියා.

මෙවන් විශාල කාර්යභාරයක් සිදුකරන අක්මාව විවිධ හේතු නිසා රෝග තත්ත්වයන්ටද ගොදුරු වේ. ප්‍රධාන වශයෙන් එවන් අවස්ථා කිහිපයකි.

අක්මා ප්‍රදාහය (හෙපටයිටීස්) නිසා ඇතිවන රෝග (උදා - සෙංගමාලය)
සිරෝසිස් තත්ත්වය.
මත්පැන් මගිින් ඇති කරන අක්මා අකර්මණ්‍යතාව.
Non Alcoholic Fatty Liver මත්පැන් භාවිතයෙන් තොරව ඇතිවන අක්මාවේ මේදය තැන්පත් වීම.

මින් අද අපගේ අවධානයට වැඩි වශයෙන් යොමු වන්නේ Non Alcoholic Fatty Liver යන තත්ත්වයයි. මෙය අද වන විට කාන්තාවන් අතරත් පැතිර යෑම දක්නට ලැබිය හැකිය. නමුත් මෙය බොහෝ දෙනා නොදන්නා කාරණයකි. අක්මාවේ මෙම රෝගය කල්තියා හඳුනාගැනීමට නම් තරමක් අපහසුයි. රෝගයක් වශයෙන් කිසිදු ලක්ෂණයක් මෙහිදී පෙන්නුම් නොකරයි. මෙම රෝගය බොහෝවිට හඳුනා ගැනීම සිදුවන්නේ වෙනත් රෝග සඳහා වෛද්‍ය පරීක්ෂණ කරන විටය. මේ නිසා වසරකට වරක්වත් වෛද්‍ය පරීක්ෂණයක් කර ගැනීම වැදගත්. එසේ නොමැතිව මෙම තත්ත්වය හඳුනාගත නොහැකිය. අක්මාවේ රෝග ඇති බවට හඳුනාගත හැකි ලක්ෂණ සෘජුවම පෙන්වන්නේ නම් ඉන් අදහස් වන්නේ ඔබ Fatty Liver තත්ත්වයෙන් සිරෝසිස් රෝගයට ගොදුරුව ඇති බවය. මෙය නම් තරමක් අවදානම් සහගත තත්ත්වයකි. මන්ද Fatty Liver තත්ත්වය සුවකළ හැකි වුවද සිරෝසිස් රෝගය සුව කළ නොහැකි බැවිනි. Non Alcoholic Fatty Liver යනු, මෙහිදී සිදුවන්නේ අක්මා ෙසෙල අතර තෙල් තැන්පත් වීමය. අනතුරුව මෙය සිරෝසිස් තත්ත්වය තෙක් වර්ධනය වීමටද හැකිය.

කල්තියා හඳුනාගැනීම :

මෙය කල්තියා හඳුනාගැනීම වඩා වැදගත්ය. මෙය කාන්තාවන් අතර පැවතීමට හේතුවනුයේ තරබාරුකමය. එමෙන්ම දියවැඩියා හා අධිරුධිර පීඩනය වැනි රෝගයන් ඇත්නම් ඔවුනට මෙම රෝගය ඇතිවීමේ වැඩි අවදානමක් පවතියි. දියවැඩියාව වැනි රෝග පාරම්පරිකව පැවත එන නිසා තම මවට, පියාට එවන් රෝග පවතී නම් ඔබද මේ පිළිබඳ සැලකිලිමත් විය යුතු වේ.

හඳුනා ගැනීම :

මෙය කල්තියා හඳුනාගැනීම අපහසුය. එම නිසා රෝග ලක්ෂණ වැඩි වශයෙන් පෙන්නුම් කරන්නේද නැත. නමුත් සිරෝසිස් තත්ත්වයට පත්වූ පසු රෝග ලක්ෂණ පැහැදිලිවම හඳුනාගත හැකිය.

කෑම අරුචිය.
වමනය යෑම.
මුත්‍රා තද පැහැයෙන් පිටවීම.
මලපහ පැහැය අඩුවීම.
ලේ වමනය.
අතපය උදරය ඉදිමීම.

වළක්වා ගැනීම :

නමුත් මෙය සිරෝසිස් තත්ත්වයට යෑමට පෙර වළක්වා ගැනීමට ඔබට පුළුවන. අප පෙර සඳහන් කළ පරිදි අධික තරබාරු බව, දියවැඩියාව හා අධි රුධිර පීඩනය වැනි රෝගයන් Non Alcoholic Fatty Liver තත්ත්වයට මුල්විය හැකිය. මේ නිසා ඔබේ ආහාර රටාව පිළිබද ඔබ ප්‍රථමයෙන් සැලැකිලිමත් විය යුතුය. මෙම රෝගයට වයස් සීමාවක් නිශ්චිතව සඳහන් කළ නොහැකි නිසා කුඩා කල සිටම නිසි ආහාර රටාවකට හුරුවීමත් වඩාත් වැදගත්ය.එහිදී,

කෙඳි සහිත ආහාර ගැනීම.
කාබෝහයිඩ්‍රේට් සහ ප්‍රෝටීන් අඩු සමබල ආහාර ගැනීම.
තෙල් අඩු ආහාර භාවිතය.
නැවුම් එළවළු, පලතුරු ආහාරයට ගැනීම.
ක්ෂණික ආහාරයන්ගෙන් ඈත්වීම.
පැණි බීම පානය නොකිරීම.
ජලය හොඳින් පානය කිරීම.

වැනි නිසි ආහාර රටාවකට අනුගත විය යුතුය. අනෙක් කරුණ නම් ඔබේ සිරුරේ උසට අනුව බර පාලනය කිරීමයි. කාන්තාවන්ට මෙම රෝගය ඇතිවීමට බලපාන මූලිකම හේතුව වන්නේ තරබාරුකමය. එහෙයින් මේ පිළිබඳ අවධානය යොමුකළ යුතුමය. ඔබ ස්ථුල අයෙක් නම් බර අඩුකර ගතයුතු වන්නේ ක්‍රමානුකූලවය. මේ සඳහා වෛද්‍යවරයකුගේ සහාය ඔබට ලබාගත හැකිය. එහිදී මාස 6කට හෝ වසරකට ආදී වශයෙන් සැලැසුම් සහගතව බර ක්‍රමයෙන් අඩුකර ගැනීමට උපදෙස් ලැබිය හැකිවේ.

වළක්වන්න පුළුවන් : Non Alcoholic Fatty Liver වළකාගත හැකි රෝගයකි. නමුත් ඒ සඳහා ඔබේ කැපවීම නම් අත්‍යවශ්‍යය. මුලින්ම ඔබේ අලස ජීවිතයෙන් මඳක් ඈත්ව ව්‍යායාම් කිරීමෙහි දිනපතා නිරත වන්න. අවම වශයෙන් සතියට දින 4ක් වත් මේ සඳහා කාලය වෙන්කර ගන්න. වැඩි වශයෙන් කෙඳි සහිත ආහාර ගනිමින් මේදය අඩු ආහාර අවශ්‍ය පමණට භාවිතයට ගන්න. මෙහිදී විශේෂයෙන් සඳහන් කළ යුතු වන්නේ මද්‍යසාර (Alcohol) භාවිතයෙන් සම්පූර්ණ වැළකී සිටිය යුතු බවයි.

උපුටා ගැනීම මව්බිම