පෙයාස් හැඩයට වඩා ඇපල් හැඩය රෝග අවදානම වැඩි කරවයි
මෙම ස්ථුලතාව Android Obesity ලෙසද Gynoid Obesity ලෙසින් කොටස් දෙකකි. මෙය ස්ත්‍රීන් සහ පුරුෂයන් සඳහා වෙන් වශයෙන් කතාබහට ලක්වන තත්ත්වයක් වුවද වර්තමානය වනවිට එහි පැහැදිලි වෙනසක් දැකගත නොහැකි පරිදි වෙනස් වී තිබේ. තවද මෙය වෙනත් ආකාරයකින් හැඳින්විය හැකි අතර එය ඇපල් සහ පෙයාස් හැඩැති ස්ථුලතාවෙන් යුතු සිරුර ලෙස කොටස් දෙකකට වර්ග කළ හැකිය. මෙහිදී Android Obesity යනු ඇපල් හැඩැති සිරුරක් හිමි පුද්ගලයන් හඳුන්වන ආකාරය හා Gynoid Obesity ලෙස පෙයාර්ස් හැඩැති සිරුරක් හිමි පුද්ගලයින් හඳුන්වනු ලැබේ. මේ අතරින් ඇපල් සිරුරක් හිමි අය බොහෝදුරට ශරීරයේ අනෙකුත් අංගෝපාංග වලට වඩා උදරය ආශි‍්‍රතව මහත් වීමට පටන් ගන්නා අතර එය පිරිමි පාර්ශවය සම්බන්ධව සුලබව දැක ගත හැකි වේ. දෙවන වර්ගය වන පෙයාර්ස් හැඩැති ස්ථුලතාවයක් සහිත අයගේ උදරයට වඩා උකුල කලවා ආදී ප්‍රදේශ ස්ථුල විය හැකියි. මේ තත්ත්වය බොහෝදුරට කතා බහ වන්නේ කාන්තාවන් සම්බන්ධයෙනි. කෙසේ වෙතත් මෙය ඇපල් හැඩැති ස්ථුලතාවයකට හිමිකම් කියන සිරුරකට වඩා පෙයාර්ස් හැඩැති සිරුරක් හිමි අයට ඉදිරියේදී රෝග අවදානම් ඇති වීමේ ප්‍රවණතාව අඩු වේ. ඇපල් හැඩැති සිරුරක් හිමි අය සඳහා පසුකාලීනව ඇතිවන රෝගී අවස්ථා ලෙස දියවැඩියාව, අධිරුධිර පීඩනය, කොලෙස්ටරෝල් පමණක් නොව පිළිකා ආදී තත්ත්වයන් පවා ඇතිවිය හැකිය. මෙහිදී බොහෝදුරට පිළිකා ඇති වීමට හේතුවන්නේ අක්මාවේ තෙල් තැම්පත් වීම වැනි ගැටලු කාලාන්තරයක් පුරා සිදු වී එය උග්‍ර අතට හැරීමයි.
ඕනෑම අයෙකුට කැඩපතක් ඉදිරියට ගොස් තමාගේ ශරීරය හැඩය පිළිබඳ ඉහත නිර්ණායක අනුව තීරණය කරගත හැකියි. මීට අමතරව කාන්තාවන්ට ස්ථුලත්වයත් සමඟ දෙවනුව ප්‍රධාන වශයෙන් බලපෑම් ඇතිවන තත්ත්වය ලෙස ඔසප් චක්‍රයේ අසාමාන්‍යතා පිළිබඳව හඳුනාගත හැකියි. මෙහිදී ප්‍රධාන වශයෙන් අපට ඇඟිල්ල දිගු කිරීමට සිදුවන්නේ දෙමාපියන්ටයි. විශේෂයෙන් ඔබ ගැහැනු දරුවෙක් සිටින මවක් නම් ඇය ගැන පුතෙකුට වඩා අවධානයක් යොමු කරවිය යුතුයි. ඊට හේතුව ඇය යම් දිනක මවක් බවට පත්වන නිසාවෙන් දරුවා මල්වර වූ පසුව ඇගේ ඔසප් චක්‍රය නිවැරදිව ක්‍රියාත්මක වන්නේ දැයි සැලකිල්ලෙන් පසුවිය යුතුයි. කුඩා කල සිට යම් දරුවෙක් තරබාරුයි නම් ඒ දරුවාව වහ වහා තරබාරුවෙන් නිදහස් කිරීමට කටයුතු කළ යුතු වේ. එසේ නොවුණහොත් සිරුරේ මේදය තැන්පත් වීම වැඩි වෙත්ම ඇගේ ඩිම්බ නිකුත් වීම ඇන හිටීමට හැකියි. එවැනි අවස්ථාවක ස්ථුලතාවය අඩුකර නොගෙන අනෙකුත් පිළියම් යෙදීමෙන් කිසිදු ප්‍රයෝජනයක් නොමැති වේ. ඒ නිසා පළමුව තමාගේ තරබාරුව අඩුකර ගෙන දෙවැනුව ඊට පිළියම් යෙදීමට කටයුතු කළ යුතු වේ.
නුවන්ති කුලරත්න
උපුටා ගැනීම දිනමිණ පුවත් පත
