නීති විරෝධී ගබ්සාව ගැහැනු ජීවිත විනාශ කරන හැටි
ස්වාභාවික ගබ්සාවීම් :
දරු ගැබක් ඇතිවෙලා සති දොළහක කාලයක් තුළ ස්වාභාවිකවම ඒ කළලය ගබ්සා වෙන්න පුළුවන්. මේ දේ හරි අහඹු සංසිද්ධියක්. ගැබ් ගන්න හැම කෙනෙක්ටම මෙහෙම වෙන්නේ නෑ. වෛද්‍ය විද්‍යාත්මකව නම් අම්මගේ ජීවිතය බේරා ගැනීමේ චේතනාවෙන් විතරයි ගබ්සාවක් සිදුකරන්නේ. දරුවෙක් ලැඛෙන්න ඉන්න අම්මා කෙනෙක් හෘද රෝගයකට ගොදුරු වෙලා නම් දරුවගෙත් අම්මගෙත් ජීවිත දෙකම අවදානම් නම් අම්මගේ ජීවිතය අවදානමින් මුදා ගන්න ගබ්සාවක් සිදුකරන්න වෛද්‍යවරු පෙලඹෙන්න පුළුවන්. නීතියේ කතාබහ මෙයට සාපේක්ෂව හෝ වෙනස් වෙන්නත් පුළුවන්. මේ ලංකාවේ පසුබිම. පිටරටක නම් මෙයට වඩා වෙනස් වෙන්න පුළුවන්. සමහර විට කුසේ ඉන්න දරුවා ප්‍රතික්ෂේප කර දිවි නහගන්න හැදුවොත් ඒ අවස්ථාවෙදි වෛද්‍යවරු ගබ්සාවට යොමු වෙනවා. ලංකාවේ ගබ්සාව තවමත් නීතිගත කරලා නැති නිසා වෛද්‍යවරුන් ප්‍රසිද්ධියේම ගබ්සාව සිදු කරන්නේ නැහැ. ඒ නිසාම නීති විරෝධී ගබ්සාව සිදුකරන්නේ හොර රහසේ. මේ විදියට නීති විරෝධීව ගබ්සා සිදු කරගන්නෙ මේ මේ තරාතිරම්වල පුද්ගලයෝ කියලා වෙන් කරලා දක්වන්න බැරි වුණත් සමාජයේ උසස් තලවල ඉන්න අය පවා හොර රහසේම තමන්ගේ කුසේ තියෙන කලලය ඉවත් කරනවා.
ගබ්සා කරන්නෙ ඇයි?
විවාහ වුණ අය නම් බැන්ද අලුත, ගෙයක් හැදුවෙ නෑ, තව ඉගෙන ගන්න ඕනේ, රස්සාව තාම ස්ථිර නෑ වගේ හේතු කියලා හදිසියේ ඇතිවුණු ගැබ නීති විරෝධීව විනාශ කර දානවා. ළමයි ඉන්න අම්මලා නම් බබාට තාම වැඩි වයසක් නෑ එහෙම නැත්නම් බබාලා වැඩියි කියලා ගබ්සා කරගන්නවා. අයථා සම්බන්ධතා පවත්වලා ගැබ් ගත්තාම සමාජයට බයෙන් ගැබ විනාශ කරගන්නවා. සමහර අය බඳින්න කලින්ම ලිංගිකව එක් වෙනවා. ඊට පසු ගැබ් ගත්තාම සමාජ අපවාද නිසා ගැබ විනාශ කරනවා.
අනාරක්ෂිත එක්වීමක් :
විවාහ වුණු අය නම් පවුල් සැලසුම් ක්‍රම භාවිත කිරීමෙන් දරු උපත් පමා කරගන්න පුළුවන්. අනාරක්ෂිත ලිංගික එක්වීමකදී පැය 72ක් ඇතුළත දරු ගැබක් ඇතිවීම වළක්වා ගැනීම සඳහා ඖෂධ ලබා ගත හැකිය. නමුත් මෙම ඖෂධය ලිංගිකව එක්වන සෑම වාරයකදීම භාවිත කිරීම එතරම් නුවණට හුරු නොවේ.
නීතියට හොරෙන් :
ගබ්සාව නීතිමය වශයෙන් ආරක්ෂා නොකරන නිසා ගබ්සාව සිදු කරන්නේ හොර රහසේය. සමහර විටෙක පාළු පාරක හෝ වෙරළ කොනක නවතා ඇති ත්‍රිරෝද රථයකය. එසේත් නොමැති නම් ගරා වැටුණු, පාළුවට ගිය ගෙවල්වල හෝ සුපිරි තරු හෝටල් තුළය. කෙසේ කුමන ආකාරයකින් ගබ්සාව සිදු කළද එය එතරම් සෞඛ්‍යාරක්ෂිත නොවේ. නීති විරෝධීව ගබ්සාව සිදු කරගන්නා අයට තරාතිරමක් නැතිවා සේම ගබ්සාව සිදුකරන අයටද තරාතිරමක් නැත. වින්නඹු අම්මලාගේ සිට ඖෂධ අලෙවිසල්වල රෝහල්වල සේවය කරන්නන්ද, හොර පාරෙන් වෛද්‍ය සහතික ලබාගත් අය මෙන්ම රජයේ රෝහල්වල සේවය කරන වෛද්‍යවරුන්ද නීති විරෝධීව ගබ්සා සිදු කරයි.
ගබ්සාව කරන්නේ කවුද?
මේ සියලු දෙනා මේ කාර්යය සඳහා දක්ෂතාවක් ඇති අය නොවේ. ගබ්සාව සිදු කරන්නට පටන් ගන්නා මොහොතේ පටන් එය අවසන් වන තුරුම තම කාර්යය සිදු කරනුයේ ගැහෙන හදවතින්ය. පොලිසියේ වැටලීම්වලට බියෙනි. සුළු අත්වැරැදීමකින් පවා මවගේ ජීවිතය විනාශ වී යා හැකිය. අනෙක් කාරණය වනුයේ ගබ්සාව සිදුකරන ස්ථානයයි. කෙතරම් පළපුරුදු වෛද්‍යවරයකුට වුවද අනාරක්ෂිතව, අවම පහසුකම් යටතේ සිදුකරන ගබ්සාව හානිදායක විය හැකිය. යම් හෙයකින් ගබ්සාව කිරීම සඳහා භාවිත කරන උපකරණ නිසා ගර්භාෂයට තුවාල සිදුවුවහොත් එය ජීවිත කාලයටම බලපෑම් එල්ල කළ හැකිය. යම් හෙයකින් පසුකාලීනව ගැබ් ගතහොත් නීති විරෝධීව සිදු කරගත් ගබ්සාව නිසා තුවාල වුණු ගර්භාෂය පිපිරී යා හැකිය. එය ගැබ තුළ සිටින දරුවාගේ මෙන්ම මවගේ ජීවිතයද අවදානමට ලක්වීමක් විය හැකිය. ගබ්සාව සිදු කරන්නේ නීති විරෝධීව නිසා එයට භාවිත කරන උපකරණයන්ගේද සම්මතයක් නැත. එය සිදුකරන්නාට තමන් කැමැති දෙයක් භාවිත කර ගබ්සාව සිදු කළ හැකිය. බොහෝ තැන්වලදී සිදුවනුයේ ගැබ තුළ ඇති කලලය පිටතට ඇද දැමීමයි. මෙය බොහෝ විට උරා ගැනීමට හෝ උරාබීමකට සමාන වේ. සමහර විට ගර්භාෂය තුළ ඇති දේට අමතරව බඩවැල්ද මෙසේ ශරීරයෙන් පිටතට පැමිණිය හැකිය.
අධික රුධිර වහනයක් :
ගබ්සාව සිදු කරන විට අධිකව ලේ වහනය වීමද මවගේ ජීවිතය අවදානමකට ඇද දමන්නක් විය හැකිය. ගබ්සාව සිදු කරන්නේ අවම පහසුකම් යටතේ නිසා ගබ්සාව කිරීමෙන් පසු ඒ මවට ඇතිවන පසු තත්ත්වයන්ට පිළියම් යෙදීම එතරම් පහසු නොවේ. ලංකාවේ සිදුවන මාතෘ මරණවලට ප්‍රධාන හේතුවක් ලෙස නීති විරෝධී ගබ්සාව දැක්වේ. ලෝකය පුරාම සෑම විනාඩි 8කට වරක්ම එක් අයකු නීති විරෝධීව සිදු කරගන්නා ගබ්සාව නිසා ජීවිතයෙන් සමුගනියි. මුල් කාලයේදී ගබ්සා සිදු කිරීම සඳහා යොදා ගත්තේ එඬරු නැටිය. පසුකාලීනව තාක්ෂණයේ දියුණුවත් සමඟම විවිධ දේ වෙළෙඳපොළට පැමිණියේය. ඒ අතරින් ගබ්සා වීම සඳහා නිපදවුණු පෙතිද වේ. මෙය ඉතා සරල ක්‍රමයකි. එය කාලය, අනාරක්ෂිත බව සුරක්ෂිත කරවයි. නමුත් පාවිච්චියෙන් අනතුරුව එතරම් හිතකර නොවේ. ගැබ කැබැලි ලෙස ශරීරයෙන් පිටකිරීම මේ පෙත්තේ කාර්යයයි. එය එසේ නොවුණහොත් හටගත් කලලය කැබැලි ලෙස ගර්භාෂයේ ඉතිරි වීම පසුකාලීනව බොහෝ ගැටලු ඇතිකරවන්නකි. ගබ්සා වීමෙන් පසුව අධිකව රුධිරය වහනය විය හැකිය. සමස්ත ගැබම මෙසේ ශරීරයෙන් පිට නොවී ඉතිරිවීම ගර්භාෂය තුළ බැක්ටීරියා වර්ධනයට හිතකර පරිසරයක් ඇති කරයි. ශරීරය තුළම ඇතිවන විසබීජවලින් මරණය පවා සිදුවිය හැකිය.
දරු සම්පත් අහිමි වෙනවා :
එක එක හේතු නිසා නීති විරෝධීවම තමන්ගේ දරුගැබ විනාශ කර දමන කාන්තාවන්ට පසු කාලයක දරු ගැබක් ඇතිවුණත් ගැබ් ගෙලට හානිවෙලා නම් දරු ගැබ විනාශ වෙලා යන්න පුළුවන්. එහෙමත් නැත්නම් සදාකාලයටම දරුවෝ අහිමි වෙලාම යන්න පුළුවන්. ලාංකික සමාජ ක්‍රම ඇතුළේ විවාහයට පෙර ලිංගික එක්වීම ප්‍රතික්ෂේප කරනවා වගේම ඉපදෙන්න ඉන්න බබාටත් ජීවත් වෙන්න අයිතියක් තියෙනවා කියලත් අම්මට ඒ අයිතිය විනාශ කරන්න බෑ කියලත් පිළිගන්නවා. ඒ නිසාම ගබ්සාව සමාජය ප්‍රතික්ෂේප කරනවා. නීති විරෝධීවම ගබ්සාව සිදු කරගන්න බොහෝ කාන්තාවෝ ඒ සඳහා පෙලඹෙන්නේ තමන්ගේ සැමියාගේ, අනියම් පෙම්වතාගේ හෝ පෙම්වතාගේ බලපෑමෙන්. සමහර විට බලපෑම්වලින් තොරවත් මේ දේ සිදුවෙනවා. කොහොම නමුත් කාන්තාව තුළ වරදකාරී චේතනාවක් ඇතිවීම වළක්වන්න බෑ. තමන්ගේම දරුවෙක්ගේ මිනීමරුවා තමන් කියන සිතුවිල්ලත් එක්ක මේ අම්මා මානසිකව විඳවනවා. ආතතියට ලක්වෙනවා. ඒ එක පැත්තක්. අනෙක් පැත්තෙන් ගර්භාෂයට වෙන හානිය නිසා පසු කාලයක දරුවො නැතිව යන්න පුළුවන්. ගබ්සාවෙන් පසු අධික රුධිර වහනය නිසා ජීවිතය පවා නැතිවෙන්න පුළුවන්. ඒ කොහොම වුණත් නිතර නිතර බඩේ කැක්කුම් ඇතිවීම, ලිංගිකව එක්වීම අතිශය වේදනාකාරී වීම එතරම් ශරීර සෞඛ්‍යයට නම් හිතකර වෙන්නෙ නෑ. නිතර නිතර උණ හැදෙනවා නම්, බඩේ කැක්කුමයි නම් තවදුරටත් ඇත්ත සඟවාගෙන ඉන්නෙ නැතිව ළඟම තියෙන රජයේ රෝහල කරා යන්න අද දවසේ ඔබ ගන්න තීරණයෙන් හෙට දවසෙදි ඔබේ ජීවිතය රැකේවි.
විශේෂඥ වෛද්‍ය රුවන් පතිරණ ප්‍රසව හා නාරිවේද අංශය ද සොයිසා කාන්තා රෝහල
සවනි ශේෂාධි හර්ෂා
උපුටා ගැනීම මව්බිම පුවත් පත
