ඔසප් වේදනාවට ඉඟුරුවලින් ප්‍රතිකාර
ආයුර්වේදයට අනුව ඉඟුරුවල ගුණ :
ඉඟුරු උෂ්ණ වීර්යයෙන් යුතු ඖෂධයක් වගේම සෙම සහ වාතය සමනය කරනවා. මේ නිසා ආහාර අරුචිය, මලබද්ධය, උදරය පුරවා දැමීම, උදර වේදනාව, වමනය හා ඔක්කාරය වැනි බොහෝ රෝග ගණනකට සහනය ලබා දෙන්න ඉඟුරුවලට පුළුවන් වෙනවා. මෙසේ ආහාර මාර්ගය උත්තේජනය කරනව වගේම ඉඟුරුවලින් වේදනාවද සමනය කරනවා. මේ නිසාම කාන්තාවන්ගේ ඔසප් වේදනාවටද, ඒ ආශ්‍රිත අධිකව රුධිරය වහනය වීමටද ඉඟුරු සුදුසු ඖෂධයකි. විශේෂයෙන්ම ගැබිනි මවුවරුන්ට ඇති වන වමනය හා ඔක්කාරය නතර කිරීමට ඉතා ප්‍රත්‍යක්ෂ ඖෂධයක් වශයෙන් ඉඟුරු හඳුනාගෙන තිබෙනවා. ඉඟුරුවලට උණ අඩු කරන්නත් පුළුවන්. ඒ වගේම හෘද රෝගවලට, රුධිරයේ අධිකව කොලෙස්ටරෝල් ඇති අයට, පෙණහලු ආශ්‍රිත රෝගවලට, අධික තරබාරු බවට වගේම සමහර පිළිකාවලටත් ඉඟුරු ගුණදායක බව පර්යේෂණවලින් සනාථ වෙලා තිබෙනවා.
තරුණ පෙනුම රකිනවා :
ඉඟුරුවල විටමින් ‘බී,’ වාෂ්පශීලී තෙල්, Gingirol, Shogoal, Paradol, Borneol, Zingerone Phellandrene වැනි රසායනික සංයෝග විශාල ප්‍රමාණයක් අන්තර්ගත වෙනව. මේ අතුරින් බොහොමයක්ම ෆිනෝලික සංයෝගයයි. මේවා ස්වාභාවික ප්‍රතිඔක්සිකාරක (Natural antioxidants) ලෙසත් හැඳින්වෙනවා. මේ නිසා නොකඩවා දිනපතාම ඉඟුරු කැබැල්ලක් ආහාරයට එකතු කර ගැනීමෙන් හෝ ඔබගේ තේ කෝප්පයට එක්කර පානයක් වශයෙන් ගැනීමෙන් ඔබට තරුණ පෙනුමක් ලබා ගන්න පුළුවන්. ඒ වගේම වයස්ගතවීමත් නිසා ඇතිවන අධිරුධිර පීඩනය, ආඝාතය, කිරීටක ධමනිගත රෝග සහ පිළිකා අවදානමෙන්ද ඔබව ආරක්ෂා කරනවා.
උදර රෝගවලට :
අන්ත්‍රවල හටගන්නා ප්‍රදාහ තත්ත්ව සුව කිරීමට ඉඟුරුවලට පුළුවන්. ආහාර මාර්ගයේ හටගන්නා බොහෝ පිළිකාවලට පූර්වගාමීව මෙවැනි ප්‍රදාහ හටගන්න පුළුවන්. එවැනි අවස්ථාවලදී ආහාර අරුචිය, උගුර වේදනාව, මලබද්ධය හා උදරය පුරවා දැමීමත් නැති වෙන්න පුළුවන්. ඉඟුරු අඩංගු ඖෂධයකින් මෙම රෝග ලක්ෂණ පහසුවෙන් සුවකර ගන්න පුළුවන්.
- මලබද්ධය හා උදරය පුරවා දැමීම ඇතිවීම වියළි ඉඟුරු, කරපිංච කොළ සහ අරළු තම්බා බීමෙන් එම රෝග ලක්ෂණ සුවවේ.
- ආහාර අරුචිය ඇතිවීම අරළු, වියළි ඉඟුරු සහ සහිඳලුණු තම්බා බීමෙන් ආහාර රුචිය වැඩිදියුණු වේ.
- ඉඟුරු තැම්බූ වතුරට දෙහි ඇඹුල් ස්වල්පයක් දමා පානය කිරීමෙන්ද ආහාර අරුචිය සුවවේ.
මස්පිඬුවලට වේදනාවට :
මහන්සි වී වැඩ කිරීමෙන් පසුව හෝ ව්‍යායාම කිරීමට පසුව ඇතිවන මස්පිඬුවල වේදනාව 25%ක් අඩු කරන බව පර්යේෂණවලින් තහවුරු වෙලා තිබෙනවා. ඉඟුරු තැම්බූ වතුරට සීනි ස්වල්පයක් මිශ්‍ර කර පානය කරන්න. නැතහොත් ඉඟුරු කැබැලි කිහිපයක් ඔබගේ තේ කෝප්පයට දමා පානය කරන්න. එවිට අතපය වේදනාව සුවවෙනවා.
වමනයට :
අජීර්ණය වැනි හුරුපුරුදු හේතුවක් නිසා ඇතිවන වමනයටත් විශේෂයෙන් ගර්භණී මවුවරුන්ට ඇතිවන වමනය සමනය කර ගැනීමටත් ඉඟුරු සරල එමෙන්ම ප්‍රත්‍යක්ෂ ඖෂධයකි.
- ඉඟුරු ඉස්ම මීපැණියෙන් දුන්නම වමනය නවතිනවා.
- ඉඟුරු, කරාබුනැටි සහ වළඟසාල් යන ඒවා සමව ගෙන කුඩුකර එයින් තේ හැඳි 1/2 ක් පමණ මීපැණියෙන් ගත්තම වමනය නතර වෙනවා.
උණටත් ගුණදායකයි :
- ඉඟුරු, කොත්තමල්ලි තම්බා බීමෙන් උණ සුවවෙනවා.
- විළඳවලට ඉඟුරු කුඩු ස්වල්පයක් දමා කපා උයා බොන්න දීමෙන් උණ සුවවෙනවා.
හෘදරෝග අවදානමත් අඩු කරනවා :
ඉඟුරුවල ඇති Gingerol, Shogoal සහ Paradol යන සංයෝගවලින් රුධිරයේ ඇති පට්ටිකා එකිනෙක ඇලීම නතර කරනවා. මේ නිසා රුධිරයේ ඇති කොලෙස්ටරෝල් මඟින් රුධිර නාළ අවහිර වීම (Atherosclerosis) වළක්වනවා. ඒ විතරක් නෙවේ, රුධිරයේ ඇති LDL, VLDL නම් ලිපෝප්‍රෝටීන සාන්ද්‍රණය අඩු කරනවා. මේ සියල්ලම නිසා යමකුට ඇතිවිය හැකි හෘදයාබාධ, කිරීටක ධමනි අවහිරවීම් ආදිය වළක්වනවා. අධිරුධිර පීඩනය පාලනයටත් ඉඟුරු හිතකරයි. දිනපතා ඉඟුරු ඉස්ම තේ හැන්දක් මීපැණි තේ හැන්දක් සමඟ මිශ්‍රකර පානය කිරීමෙන් මේ ප්‍රතිඵල ලබන්න පුළුවන්. එසේ නැතහොත් දවසේ එකවරක්වත් තම තේ කෝප්පයට ඉඟුරු ඉස්ම ටිකක් මිශ්‍රකර පානය කිරීමෙන්ද ඉහත ප්‍රතිඵල අත්විඳින්න පුළුවන් වෙනවා.
ඔසප් වේදනාව අඩු කිරීමට :
තරුණ කාන්තාවන්ගේ ඔසප් වේදනාව සමනය කර ගැනීමටත් ඉඟුරු ඉතාම හොඳ ඖෂධයකි. ඉඟුරු ඖෂධයක් වශයෙන් ගැනීමෙන් ඔසප් වේදනාව 80 - 85% ප්‍රමාණයකින් අඩුවන බව තහවුරු වෙලා තිබෙනවා. ඉඟුරු කැබැල්ලක් තම්බා පෙරා එම වතුර කෝප්ප භාගයකට සීනි තේහැඳි 1ක් මිශ්‍රකර පානය කරන්න. එවිට එම වේදනාව ක්‍රමක්‍රමයෙන් අඩුවෙනවා.
පිළිකා සුවකරනව වගේම වයසට යෑමත් ප්‍රමාද කරනව :
ඉඟුරුවල තිබෙන ප්‍රතිඔක්සිකාරක නිසා වයසට යෑමේදී ශරීරයේ ඇතිවන වෙනස්කම් ප්‍රමාද කරනවා. මේ නිසා සම රැලි වැටීම, සන්ධි ආශ්‍රිත රෝග ඇතිවීම, ආදිය ප්‍රමාද කරනවා වගේම එම රෝග ලක්ෂණවලට සහනයක්ද ලබා දෙනවා. ඔබේ දණහිස් වැනි සන්ධිවල නිතර නිතර වේදනාව හා අත්වල ඇඟිලිවල හිරිය පවතීනම් දිනපතා කුමන හෝ කැමැති ක්‍රමයකට ඉඟුරු ඉස්ම තේ හැන්දක් පමණ නොකඩවා පාවිච්චියට ගන්න. එවිට අදාළ රෝග ලක්ෂණ ක්‍රමක්‍රමයෙන් අඩුවේවි. පිළිකා අතුරින් කාන්තාවන්ගේ ඩිම්බකෝෂ ගත පිළිකා සහ ආහාර මාර්ගය ආශ්‍රිත පිළිකාවල ප්‍රමාණයත් ඒවායේ පැතිරීමේ වේගයත් ඉඟුරු මඟින් අඩු කරන බව සොයා ගෙන තිබෙනවා.
ශ්වසන මාර්ගය ආශ්‍රිත රෝගවලටත් :
ඉඟුරුවලින් ශ්වාසනාලවල ඇති සිනිඳු පේශි ලිහිල් කරනව වගේම සෙම කැඩී ඉවත් කිරීම පහසු කරනවා. මේ නිසා හතිය, කැස්ස, සෙම්ප්‍රතිශ්‍යාව වැනි රෝගත්, ශ්වාසනාලවල ප්‍රදාහිත තත්ත්වය සුවකරනවා. ඉඟුරු, කරාබු නැටි, ගම්මිරිස් සමව ගෙන කුඩුකර එම කුඩුවලින් තේ හැඳි 1/2ක් පමණ දිනපතා උදේ - සවස උණුවතුරින් පානය කිරීමෙන් ඉහත රෝග ලක්ෂණවලින් සහනයක් ලැබේ. විවිධ හේතු නිසා සිදුවන අක්මා සෛලවලට හානිවීම මඟහරවා ගැනීමට ඉඟුරු හොඳ ඖෂධයකි. විශේෂයෙන්ම අනවශ්‍ය ලෙස පැරසිටමෝල් යන වේදනා නාශකය කාලයක් තිස්සේ ගැනීමෙන් මෙවැනි හානි අක්මාවට ඇතිවෙන්න පුළුවන්. මෙම හානිය අවම කිරීමට ඉඟුරුවලට හැකිබව පර්යේෂණ මඟින් තහවුරු වී ඇත.
උපුටා ගැනීම මව්බිම පුවත්පත
