ගර්භාෂයේ රෝග පිළිබඳ අනතුරු අඟවන සුදයෑම
සුද යෑම ලෙස හඳුන්වන්නේ කුමන ආකාරයේ රෝගී තත්ත්වයක්ද?
ආයුර්වේදයේ මූලික ත්‍රිදෝශ තත්ත්වයන් තිබේ. එනම් වා, පිත්, සෙම් යනුවෙනි. මෙම ත්‍රිදෝෂ කෝප වීම හරහා ලෙඩ රෝග ඇතිවන බව ආයුර්වේදයේ මූලික පිළිගැනීමයි. සුද යෑම යනු පිත් හා සෙම් යන ද්විදෝෂ කෝපවීම නිසා ඇතිවන රෝගයකි. එසේම ඇඟ උණුසුම් වීම නිසාද සුද යෑම ඇතිවිය හැකියි. ඇඟ උණුසුම් වීමත් විවිධ හේතු මත සිදුවිය හැකිය. ජලය පානය මඳ වීම, උෂ්ණාධික ආහාර එනම් “බල කරවල, තක්කාලි, අන්නාසි,” වැනි ආහාර භාවිත කිරීම නිසාද ශරීරය උෂ්ණ වීමට පුළුවන. මේ අනුව අධික ලෙස ශරීරය උෂ්ණ වීම නිසාද සුදයෑම සිදුවන නිසා ඒ ගැනත් සලකා බැලීම වටී.
පොදු වේ මේ තත්ත්වය බලපාන එක් පිරිසක් ඉන්නවද?
කාන්තාවන්ට තමයි මේ තත්ත්වය වැඩිපුරම බලපාන්නේ. එයට හේතුව සුද යෑම ගර්භාෂගත රෝග තත්ත්වයක්. බොහෝ වෙලාවට ආර්තවය අවස්ථාවේ විවිධ වේදනා කැක්කුම් ඇතිවීම වගේම ආර්තවය ප්‍රමාද වීම, මසකට දෙවතාවක් සිදුවීම වැනි බොහෝ ආර්තවමය විකෘතිභාවවලට හේතුවත් ගර්භාෂගත රෝග වෙන්න පුළුවන්. ඒ වගේම සුද යෑම වෙන්නත් පුළුවන්. මේ කියන සියලුම ගැටලු තිබෙන්නේ කාන්තාවන්ට නිසා අනිවාර්යයෙන්ම සුදයෑම කාන්තා රෝගයක් කියලා කියන්න පුළුවන්. නමුත් මෙහිදී වයස් බේදයක් නෑ. තරුණ, වැඩිහිටි කියන ඕනෑම වයසක ස්ත්‍රී පාර්ශ්වයට මේ රෝග තත්ත්වය වැලඳෙන්න පුළුවන්.
සුද යෑමට හේතු මොනවාද?
- මුලින්ම කිව්වා වගේ සුදුයෑමට ප්‍රධානම හේතුව ගර්භාෂ ගත රෝග වෙන්න පුළුවන්.
- විශේෂයෙන්ම පණු අමාරුව නිසා සුද යෑම වෙන්න පුළුවන්. පණු අමාරුව නිසා ඇතිවන පණු බිත්තර යෝනි මාර්ගය හරහා ගර්භාෂයට ඇතුළු වෙනවා. ඒ බිත්තර පුපුරලා ඇතිවන පණුවන් ගර්භාෂ බිත්ති කා දමන්න පටන් ගන්නවා. ඒ අවශේෂ තමයි සුදයාම ලෙස පිටට එන්නේ.
- ඒ වගේම මානසික ආතතිය නිසාත් සුදයෑම කියන තත්ත්වය ඇතිවෙනවා.
- මුලින් කීවා වගේ ඇඟ උණුසුම් වීමත් හේතුවක් වෙනවා සුදයෑමට. නමුත් මේ සුදයෑම කියන තත්ත්වය එක් එක් ශරීරවලට අනුව වෙනස් වෙන්න ඉඩ තියෙනවා. මන්ද ශරීර උෂ්ණත්වය කියන කාරණය විවිධ ශරීරවලට විවිධ විදියට දැනෙන නිසා.
කොහොමද මෙවැනි රෝගයක් තියෙනවා කියලා හඳුනාගන්නේ?
මූලික නාඩි අල්ලා බැලීමකින් අපට හඳුනා ගන්න පුළුවන්. නාඩි බැලීම අත්‍යවශ්‍යයි. එයට හේතුව සාමාන්‍ය ශ්වේත ප්‍රදරය කියලා තත්ත්වයක් තියෙන නිසා. එය සාමාන්‍ය තත්ත්වයක්. ආර්තවයට දින පහකට පමණ පෙර සුදු පැහැති ශ්‍රාවයක් වශයෙන් පිට වෙන මේ ශ්වේතප්‍රදරය සාමාන්‍ය තත්ත්වයක්. එම නිසා මෙම සාමාන්‍ය තත්ත්වයෙන් එම රෝගය වෙන්කර හඳුනා ගැනීම සඳහා නාඩි අල්ලා බැලීමක් කරනවා.
මූලික රෝග ලක්ෂණ තිබෙනවද?
මූලික රෝග ලක්ෂණ ලෙස ඇඟ කෙට්ටුවීම, ඇඟ තෙහෙට්ටු වීම, මුත්‍රා පිටකරන විට වේදනාව, යටි බඩ කොරවීම, මල බද්ධය, මුත්‍රා දැවිල්ල මූලිකව සිදුවෙනවා. මේ ශ්වේත කහ පැහැයක් ගන්නවා. එයට හේතුව පිත සහ සෙම එකට මිශ්‍රව පිටවීම. එසේම කැදලි කැදලි වශයෙන් පිට වෙනවා. යට ඇඳුම්වල මිදිලා තියෙනවා දකින්න පුළුවන්. ගන්ධයක් දැනෙනවා. ආර්තවය වන විට දැනෙනවා වගේ අධික තෙත් බවක් දැනෙනවා. එසේම රෝගියාට අධික නිදිමත දැනීම, බඩට යමකින් අනිනවා වැනි ගතියක් දැනීම, ආදී රෝග ලක්ෂණත් තියෙනවා. එසේම ලිංගේන්ද්‍රිය අධිකව කසන්න ගන්නවා.
ඖෂධ ප්‍රතිකාර
ඖෂධ ප්‍රතිකාර ගැන කියනවා නම් කිසිම විටෙක කෘත්‍රිම ඖෂධ කෙරෙහි යොමුවෙන්න එපා. ඒක භයානකයි. ඒ වගේම සිංහල බෙහෙත් වුණත් කඩවල තියෙන්නේ විකුණලා මුදල් හම්බකරන්න මිසක රෝගීන්ගේ යහපත තකා නොවේ. මේ නිසා බාල ඖෂධ වර්ගවලට ඔබ හසුවෙන්න පුළුවන්. මේ නිසා ප්‍රධානම දේ සුදුසුකම් ලත් ආයුර්වේද හෝ බටහිර වෛද්‍යවරයන් ලවා ප්‍රතිකාර ලබා ගැනීමයි.
ලැජ්ජාව හෝ අපහසුතාව නිසා රෝග ලක්ෂණ සැඟවීමක් භයානකයි.
නිතරම උෂ්ණත්වය අඩුවෙලා ඇඟ නිවෙන ආහාර, පාන වර්ග ගන්න. එවැනි ආහාර පාන ලෙස “හාතවාරිය කැඳ, ඉරමුසු කැඳ” ගන්න පුළුවන්. “කළු උක්, දෙළුම්, නෙල්ලි” වගේ දේවල් ආහාරයට ගැනීමත් හොඳයි. වතුර දවසට ලීටර් 6ක් 8ක් වත් බොන්න පුළුවන් නම් ඒක ශරීරයේ තිබෙන ඕනෑම රෝගයකට හොඳ ප්‍රතිකාරයක්.
අතුරු ආබාධ තිබෙනවාද?
ඇත්තෙන්ම ඔව්. ගර්භාෂය තුවාල වෙනවා කිරිපණු රෝගය නිසා ශ්වේත ප්‍රදරය වෙනවා නම් ඇවිදීමට අපහසු වීම, ඇඟට පණ නැති ගතිය, අකලට වයසට යෑම, දරුවන් නොලැබීමටත් හේතුවක්. විශේෂයෙන්ම සඳහන් කරන්න ඕන. තයිරොයිඩ් ආබාධ වැනි රෝග නිසාත් භාවිතයට ගන්නා ඖෂධවල තිබෙන සැර ගතිය නිසාත්, ශ්වේත ප්‍රදරය හෙවත් සුදයෑම සිදුවෙනවා. එම නිසා සුළුවෙන් හිතලා අත ඇරලා දාන්න පුළුවන් රෝග තත්ත්වයක් නෙවෙයි කියලා කියන එක විශේෂයෙන්ම කියන්න ඕන.
උපුටා ගැනීම මව්බිම පුවත්පත
