පිරිමින්ට වඩා කාන්තාවන්ට ආයුෂ වැඩියි

ලෝක වැඩිහිටි ජනගහනය ශීඝ්‍රයෙන් වර්ධනය වෙමින් පවතී. මෙම වැඩිහිටි ජනගහනයේ බහුතරය කාන්තාවන්ය. මෙම තත්ත්වයට හේතු වන්නේ ලොව බොහෝ රටවල ජනතාවගේ පරමායුෂ (Life Expectuncy) වර්ධනය වීමයි.

වැඩිහිටි ජනගහනය :

වර්ෂ 1990දී ලොව ජීවත් වූ වයස අවුරුදු 65ට වැඩි වැඩිහිටි කාන්තා ජනගහනය මිලියන 330ක් වූ අතර මේ ප්‍රමාණය වර්ෂ 2015 වන විට මිලියන 600ක් වන බව ලෝක සෞඛ්‍ය සංවිධානය විසින් ගණන් බලා ඇත.

ලෙඩත් වැඩි :

මෙම කාන්තාවන්ගේ බහුතරය දියුණුවෙමින් පවතින රටවල ජීවත්වන අතර ඔවුන් මන්දපෝෂණය, ප්‍රජනන සෞඛ්‍යය ආශි්‍රත රෝග සහ ජීවන රටාව පදනම් වූ රෝගවලින් පීඩා විඳිනු ඇත. එමෙන්ම ඔවුන් ප්‍රචණ්ඩත්වයට මුහුණ දෙනවා පමණක් නොව අනාරක්ෂිත සේවාවල නියැළෙමින් සිටිනු ඇත. මේ තත්ත්වය වඩාත් තීව්‍ර වන්නේ ඔවුන් වැඩිහිටි වයසේදී අත්විඳිනු ලබන ආර්තවභාවය (Menopause) කරණකොටගෙන ඇතිවන අස්ථි දිරාපත් වීම (Osteoporosis) සන්ධි ආශි්‍රත රෝග මෙන්ම විවිධ පිළිකාවන්ටද භාජන වීම නිසාය.

නිරෝගී බව :

ලෝක සෞඛ්‍ය සංවිධානයට අනුව නිරෝගී බවේ නිර්වචනය වන්නේ ප්‍රශස්ත කායික, මානසික හා සමාජයීය යන පැවැත්මයි. වයසට යෑමත් සමග කාන්තාවන්ගේ මෙම සෞඛ්‍ය අංශ ක්‍රමයෙන් පිරිහීමට පත්වේ. කාන්තාවක් වයසට යෑම බොහෝ විට ආර්තවභාවය (Menopauje) සමග ගළපා කතා කරනු ලැබේ. මාස් ශුද්ධිය නතර වී ඇත්නම් ඇය වයස්ගත බවට සාමාන්‍ය පිළිගැනීමක් පවතී. තවත් සමහර විටෙක රැකියාවෙන් විශ්‍රාම ගැනීම වයස්ගත වීමේ සලකුණක් ලෙසත් සමහර විටෙක පළමු මුනුබුරා හෝ මිනිපිරිය දැකීම වයස්ගත වීම ලෙසත් සමාජය විසින් සලකනු ලබයි.

කාන්තාවන්ට ආයුෂ වැඩි :

වර්තමානය වන විට කාන්තාවන් පිරිමින්ට වඩා වැඩි කලක් ජීවත් වේ. චීනයේ කාන්තාවක් අවුරුදු 71ක් ජිවත් වන විට පිරිමියකු ජීවත් වන්නේ අවුරුදු 67කි. ලොව වැඩිම කලක් ජීවත්වන පුරවැසියන් ජීවත් වන්නේ ජපානයේය. එහි කාන්තාවක් උපරිම වශයෙන් අවුරුදු 84ක් ජීවත් වන අතර පිරිමියකු ජීවත් වන්නේ අවුරුදු 76කි. කාන්තාවන් වැඩි කලක් ජීවත්වන බැවින් ඔවුන්ටම ආවේණික වූ සෞඛ්‍ය ගැටලුවලට මුහුණදීමට සිදුවේ. ඒ නිසාම ලෝක සෞඛ්‍ය සංවිධානය වැඩිහිටි කාන්තාවන්ගේ සෞඛ්‍ය කෙරෙහි විශේෂ අවධානයක් යොමු කරයි.

සෞඛ්‍ය ගැටලු :

වැඩිහිටි කාන්තාවන් ආබාධිත තත්ත්වයට හෝ මරණයට පත් කරන සෞඛ්‍ය ගැටලු බොහොමයක් පවතී. ඒ අතර හෘදරෝග, ආඝාතය (Stroke) පිළිකා, සන්ධි රෝග, අධික තරබාරුව, දියවැඩියාව සහ අධි රුධිර පීඩනය ආදිය විශේෂයෙන් සඳහන් කළ හැකිය. වැඩිහිටි කාන්තා මරණවලින් 60%කටම හේතුවන්නේ හෘද රෝගයන්ය. මෙම රෝග බොහොමයකටම හේතුවන්නේ ඇයගේ ආහාර හා ජීවන රටාවය.

පිළිකා රෝග :

කාන්තාවන් අතර බහුලව ඇතිවන පිළිකා වන්නේ ගැබ්ගෙල පිළිකා හා පියයුරු පිළිකාය. සෑම වසරකම ලෝකය පුරා වැඩිහිටි කාන්තාවන් අතුරින් ලක්ෂ 5ක් ගැබ්ගෙල පිළිකා රෝගීන් හඳුනාගන්නා බව වාර්තා වේ. පියයුරු පිළිකාද වසරකදී ලක්ෂ 6ක් පමණ අලුතෙන් හඳුනාගන්නා බව කියයි. මීට අමතරව කාලීන වශයෙන් වැඩිහිටි කාන්තාවන් ආබාධිත තත්ත්වයට පත් කරන රෝග අවස්ථා කිහිපයක්ම හමුවේ. මේ අතුරින් සන්ධි ආශි්‍රතව ඇතිවන සන්ධිගත වාත (Osteoarthritis) රෝගය හා අස්ථි දිරාපත් වීම කාන්තාවන්ගේ මානසික හා සමාජයීය යහ පැවැත්මට මෙන්ම ජීවන තත්ත්වය (Quality of life) කෙරෙහිද බලපායි. මැදිවිය කාන්තාවන් මුහුණ දෙන තවත් විශේෂ අවස්ථාවක් වන්නේ විවිධ මානසික රෝග තත්ත්වයන්ය. මේ අතුරින් මානසික අවපීඩනය (Depression) හා ආතතිය (Stroke) හා සම්බන්ධ රෝග තත්ත්වයන් බහුලව හමුවේ.

පෝෂණය :

මේ සියලුම රෝග අවස්ථා සලකා බැලීමේදී වැටහෙන කාරණයක් වන්නේ පිරිහී යන පෝෂණ තත්ත්වයන් හා ශරීරයේ විවිධ දිරාපත් වීම් මේවාට හේතු වන බවයි. මේ රෝග අවස්ථා වළක්වා ගැනීමට නම් ඒ ඒ රෝගය සඳහා බලපාන අවදානම් සාධක හඳුනාගෙන ඒවා වළක්වා ගැනීමත්, යහපත් මානසික සෞඛ්‍යය පවත්වා ගැනීම හා නිසි ලෙස පෝෂණ මට්ටම පවත්වා ගැනීමත්ය. මෙම වැඩිහිටි වයසේ ඇතිවන සියලු රෝග අවස්ථාවලට එකසේ ප්‍රතිඵල ලැබිය හැකි ප්‍රධාන අංශ දෙකක් ආයුර්වේද වෛද්‍ය ක්‍රමයේ හා ආශි්‍රත වෙනස් මූලාශ්‍රවල දක්වා ඇත. ඒවා නම් ආයුර්වේදීය රසායන ඖෂධ සහ යෝග අභ්‍යාස ප්‍රගුණ කිරීමය.

විසඳුම් :

"රසායන" යනු ආයුර්වේදයට අයත් අංග අටෙන් ඉතා වැදගත් අංගයකි. මෙහි මූලික අරමුණ වන්නේ ශරීරයේ පෝෂණය නියමාකාරයෙන් පවත්වා ගනිමින් වයසත් සමග දිරාපත් වන ශරීර පටක නැවැත යථා තත්ත්වයට පත් කිරීමයි. විශේෂයෙන්ම තරුණ කාලයේ මෙන් නිරෝගී සහ සක්‍රිය දිවිපෙවෙතක් ලබා ගැනීමයි. රසායන ඖෂධ මගින් ශරීරයේ විවිධ ධාතු පෝෂණය කර දිර්ඝායුෂ ලබාදෙයි. ශරීර ශක්තිය මෙන්ම සමෙහි පැහැපත් බව තරුණ වයසේදී මෙන් ස්ථාවරව පවත්වා ගනී. වෙනත් අයුරකින් පවසන්නේ නම් රසායන ප්‍රතිකාර යනු වයසට යෑමේ ක්‍රියාවලිය මඳකට ප්‍රමාද කර, තරුණ බව රැක ගැනීමේ මහගු ප්‍රතිකාර විධියකි. රසායන ඖෂධ ප්‍රතිශක්තිය වර්ධනය කරයි. ශරීරයේ ඇස් කන් ආදී පංචේන්ද්‍රිය අකර්මණ්‍ය නොවී පවත්වා ගැනීමේ හැකියාව රසායන ඖෂධ සතුය.

මැදිවියේ කාන්තාවන්ට :

ආර්තවභාවය මෙන්ම මැදිවිය කාන්තාවන්ට වැලඬෙන ඉහත සඳහන් කළ විවිධ රෝග වළක්වා ගැනීමට නම් මෙම රසායන ඖෂධ ක්‍රමානුකූලව භාවිත කළ යුතුයි. රසායන ගුණැති ඖෂධ බොහෝ ගණනක් ආයුර්වේදයේ සඳහන් වේ. ඒවා නිෂ්පාදනයට ගන්නා අමුද්‍රව්‍ය අතුරින් ආමලකී (නෙල්ලි), හරිතකී (අරළු), ශතාවරි (හාතවාරිය), අශ්වගන්ධ (අමුක්කරා), ගුඩුචී (සකිඳ), ගුගුල් (මැලියම් විශේෂයකි), බ්‍රාහ්මී (ලුනුවිල්), මණ්ඩුකපර්ණි (ගොටුකොළ) සහ පුණර්නවා (සාරණ), කිරි, ගිතෙල් ආදිය ප්‍රධාන තැනක් ගනී. වයසත් සමග අඩපණ වන මතක ශක්තිය නැවත යථා තත්ත්වයට පත්කිරීමට හැකියාව ඇති ඖෂධ ලමේධ්‍ය රසායනල ලෙස හැඳින්වේ.

යෝග අභ්‍යාස :

මීට අමතරව මැදිවයසේ ඇතිවන විවිධ කායික මානසික රෝග අවස්ථා පාලනය කිරීම සඳහා යෝග අභ්‍යාසවලද විශාල උපයෝගීතාවන් පවතී. විශේෂයෙන්ම යෝග දර්ශනයේ සඳහන් විවිධ යෝගාසන හා ප්‍රාණයාම ක්‍රම මගින් කායික රෝගවලට මෙන්ම මානසික රෝගවලටද මහ පිටිවහලක් ලැබේ. යෝගාසන යනු ඉරියව් සමූහයකි. මේවා ක්‍රමානුකූලව ප්‍රගුණ කිරීමෙන් කායික හා මානසික සමබරතාව මෙන්ම ආධ්‍යාත්මික යහ පැවැත්මද ඇතිවේ. ශරීරයේ නම්‍යතාව ඇතිවේ. මානසික ආතතිය අඩු කිරීමේ හැකියාව පවතී. මතක ශක්තිය වැඩිදියුණු වීම මෙන්ම හොඳ නින්දක්ද ලැබේ. ශරීර සමබරතාව හා නම්‍යශීලීතාවය සඳහා පාද හස්තාසන, හලාසන, පවන මුක්තාසන සහ මත්සේන්ද්‍රාසන, ආදියද සර්වාංගසන සහ පශ්චිමොන්නානාසනද ප්‍රගුණ කළ හැකිය. කායික මානසික ලිහිල්භාවය සඳහා ශ්වසන, මකරාසන ආදිය යෝග්‍ය වේ. මීට අමතරව ප්‍රාණායාම විධි මගින් ශ්වසන ක්‍රියාවලිය නියන්ත්‍රණය කරයි. ඒ තුළින් ආතතිය අඩුවීමත්, මානසික ඒකාග්‍රතාවත් ඇතිවේ.

උපුටා ගැනීම මව්බිම පුවත් පත ඇසුරෙනි