ඔසප් වේදනාවට හොඳම ඛෙහෙත වතුර

මාස් ශුද්ධියේ ලක්‍ෂණ :

මාස් ශුද්ධිය ආරම්භය කිට්ටු වෙන විටම බොහෝ දෙනකුට යම් යම් වේදනා කැක්කුම් ඇතිවෙන්න පුළුවන්. විශේෂයෙන් බොහෝ දෙනකුට ආර්තවයට සතියකට කලින් ඉඳලම මේ තත්ත්වය ඇති වෙන්න පුළුවන්. බඩ කොරවීම, අධික කොන්දෙ කැක්කුම, මස් පිඬු වේදනා මූලිකව ඇති වෙන්න පුළුවන්. ඒ හැරෙන්න මාස් ශුද්ධි දිනයට බඩේ අධික වේදනාව, පෙකණියට පහළ ප්‍රදේශයේ ඇතිවන කැක්කුම, ක්ලාන්තය, කෑම අප්‍රිය වීම, සාමාන්‍ය දෛනික ක්‍රියාකාරකම් කෙරෙහි දක්වන නොසැලකිල්ල වගේ ලක්‍ෂණ පෙන්වන්න පුළුවන්. දෛනික ක්‍රියාකරකම්වලින් ඈත්වෙලා අලසව ඉන්න ප්‍රධානම හේතුව මේ අධිකව ඇතිවන වේදනාව.

රක්ත හීනතාව :

ඒ වගේම ප්‍රතිකාර ලබා ගැනීමට පැමිණෙන දියණියන් විශාල ප්‍රමාණයක් කියන්නේ ක්ලාන්ත ගතිය, දෑස් නිලංකාර වීම වගේ ලක්‍ෂණත් මේ කාලය තුළ තියෙනවා කියලයි. බොහෝ විට මෙවැනි රෝග ලක්‍ෂණ ඇතිවීමට මූලිකව හේතුව නම් රක්තහීනතාව වෙන්න පුළුවන්. එයට හේතුව රුධිරය පිටවීම සිදුවීමත් සමඟ රුධිරයෙහි ඇති පෝෂ්‍ය කොටස්ද පිටවන නිසා මෙසේ පිටවන රුධිරයට නැවැත රුධිරය ලැබීමක් සිදු නොවන නිසා මෙවැනි ලක්‍ෂණ ඇති වෙන්න පුළුවන්.

වේදනාවට හේතු :

ඒ වගේම ඉහතින් සඳහන් කළ බඩේ කැක්කුමට, මස් පිඬු වේදනාවට, කොන්දේ කැක්කුමට ප්‍රධාන හේතු තිඛෙනවා.

බඩේ කැක්කුමට :

ගර්භාෂ බිත්තිවල සිවියක් ඇති වෙනවා. මේ සිවිය ගැලවීමෙන් තමයි මාස් ශුද්ධිය හෙවත් ආර්තවය ඇතිවෙන්නේ. මේ වෙලාවේ කැබලි, කෑලි ලෙස රුධිරය පිටවනවා. එවැනි කැබලි සහිත රුධිරය පිටවීමේදී ඇතිවන තෙරපීම නිසා හිරවීමක් සිද්ධ වෙනවා රුධිරය ඉවත්වන යෝනි නාළ තුළ. අන්න ඒ නිසා තමයි මේ වේදනාව ඇතිවෙන්නේ.

මස්පිඬු වේදනා :

හෝර්මෝන අධික ලෙස ක්‍රියාත්මක වීම නිසා තමයි මස්පිඬුවල වේදනා ඇති වෙන්නේ. අත්වල, කලව සහ යටි බඩේ මස්පිඬු වේදනාව මේ අනුව ඇති වෙන්න පුළුවන්.

කොන්දෙ කැක්කුම :

කොන්දේ ඇතිවන තදබල කැක්කුමට හේතුව මේ ඊස්ට්‍රජන්, ප්‍රොජෙස්ට්‍රන් හෝර්මෝනවල අධික ක්‍රියාකාරීත්වයම තමයි. මේ හෝර්මෝනවලට සම්බන්ධ ස්නායු මණ්ඩලවල ඇතිවන තෙරපුම හා ක්‍රියාකාරීත්වය නිසා කොන්දෙ කැක්කුම ඇතිවෙන්න පුළුවන්.

ක්ලාන්තය, කෑම අරුචිය සහ වමනය :

මේ රෝග ලක්‍ෂණවලට ප්‍රධානම හේතුව තමයි ආමාශය ක්‍රියාකාරී වීමේදී ඇතිවන දුර්වලතා. ගැබිනි මවකට නම් මේ ලක්‍ෂණ සාමාන්‍යයයි. නමුත් ආර්තවය ඇති වන විට ඉහත ලක්‍ෂණ පහළ වන්නේ ආමාශයේ ආමාශයික අම්ලවල ක්‍රියාත්මක වීමේ අඩුපාඩු නිසයි.

මානසික බලපෑම් :

ඒ වගේම තමයි බොහෝ රෝග ලක්‍ෂණවලට මනස බලපානවා. මානසිකව සිතන සිතුවිලි බොහෝ විට විවිධ රෝගාබාධවලට හේතුවක්. ඒ වගේම තමයි ආර්තවයට කල් තියාම බය වීම නිසා මෙවැනි වේදනාවන් ඇති වෙන්න පුළුවන්. බොහෝ වේලාවට තරුණ දියණියන් අන් අයට සිදුවන දේ තමන්ටත් සිදුවෙතැයි බියට පත් වෙනවා. ඒ වගේම සාමාන්‍යයෙන් ආර්තවයට දින ළංවන විට, විශේෂ උත්සවවලට සහභාගි වීමට සිදුවීම, විභාග සහ වෙනත් විශේෂ ගමන් බිමන් යෙදීම ආදී කටයුතු නිසා දියණියන් සිතින් බියට පත්වීම හේතුවෙන් ආර්තව වේදනා වැඩියෙන් ඇතිවීමට පුළුවන්. මේ නිසා හැම අවස්ථාවකම මනස සුවපත්ව තියා ගන්න එක වඩා වැදගත්. එයට හේතුව මේක රෝග තත්ත්වයක් නොවේ. දින දෙකක් තුනක් තිබිලා සුවපත් වන ජීව විද්‍යාත්මක සිදුවීමක් නිසා. ඒ වගේම තවත් කරුණක් ගැන සැලකිලිමත් වීම වැදගත්. අප ඉහතින් සඳහන් කළ බඩ රුදාව, කරකැවිල්ල, වමනය, කොන්දේ වේදනාව ආදී රෝග වෙනත් හඳුනා නොගත් ශරීර අභ්‍යන්තර රෝග තත්ත්ව නිසාත් ඇති වෙනවා. එම නිසා අප තේරුම් ගත යුතුයි ආර්තවය නොමැතිව මෙවැනි ලක්‍ෂණ පහළ වුණොත් වෛද්‍ය උපදෙස් පැතීම වැදගත් කියන කරුණ.

ආහාර :

ඒ වගේම තරුණ දූවරුන් භාවිතයට ගන්නා ආහාර වර්ගත් මේ මාස්ශුද්ධි වේදනාවට හේතු වෙනවා. විශේෂයෙන් අධික තෙල් සහිත ආහාර භාවිත කරන විට ශරීරය අනවශ්‍ය පමණට මහත්වීම වගේ හේතු නිසා ගර්භාෂය උස් වීමෙන් මාසික වේදනාව වැඩිවෙන්න පුළුවන්. ගර්භාෂය උස වීම නිසා ඉක්මනින් සිවිය ගැලවී යෑම, කැබලි සහිත රුධිරය පිටවීම වේගවත් වීම ආදී හේතු නිසා වේදනාව වැඩි වෙනවා.

දින චර්යාව :

ඒ වගේම තද ඇඳුම් පැලඳුම් පැය පහකට වඩා එක දිගට ඇඳගෙන සිටීම, ජීවත්වන පරිසරය එනම් කාර්යබහුල රැකියාවල නිරත වීම, එක දිගට සිටගෙන සිටීම, මනස ව්‍යාකූල වන සිදුවීම් ආදියත් මාසික වේදනාව වැඩි වීමට හේතු වෙනවා. නිතර ක්‍රීඩාවල නිරත වන අයටත් මාසික වේදනාව වැඩියෙන් දැනෙනවා. ජලය හරි ආකාරව පානය නොකිරීම, මුත්‍රා පහවීම අක්‍රමවත් වීම ආදී කරුණුත් හේතු වෙනවා මාස් ශුද්ධියේ වේදනාවත් ඇතිවීමට.

තයිරොයිඩ් ගැටලු :

එසේම තයිරොයිඩ් ගැටලු තිඛෙන අයගේ මාස් ශුද්ධියේ වෙනස් වීම් සිදු වෙනවා. අප මුලින් සඳහන් කළ වේදනා, කැක්කුම් අධිකව දැනෙන්න ගන්නවා. ඒ වගේම ආර්තවය අක්‍රමවත් වෙනවා. ඒ වගේම වැඩියෙන් රුධිරය පිටවීම, එකම මාසයේ දෙවතාවක් ආර්තවයට පත්වීම වගේ ලක්‍ෂණ ඇති වෙනවා. මේ නිසා මෙවැනි ලක්‍ෂණ තිඛෙන අය වෛද්‍ය උපදෙස් ගැනීම වඩා වැදගත්. 

ඒ වගේම මේ වේදනාවලට ප්‍රතිකාර, පිළියම් ආයුර්වේදයේ තිඛෙනවා. මේවා නිවෙසේදී වුණත් කරගන්න පුළුවන් සාමාන්‍ය ප්‍රතිකාර.

වතුර වැඩිපුර බොන්න :

විශේෂයෙන් වැඩියෙන් ජලය පානය කිරීම වැදගත්. නිතර ජලය පානය කිරීම තුළින් සිරුරේ වියළි වීම පාලනය කර ගන්න පුළුවන්. ඒ වගේම ශරීරය ශක්තිමත් වෙන්නත් ඒක හේතුවක්. දියර ආහාර කොමඩු, කැකිරි, පිපිඤ්ඤා වැනි ආහාර නිතර භාවිත කිරීමත් වැදගත්. ඉන් ශරීරය වියළීම වළක්වා ගන්න පුළුවන්.

1. නිරමුල්ලිය, පොල්පලා එකට තම්බා බීමට ගැනීම.

2. කොත්මල්ලි තළා වතුරේ දමා උදෑසනම හිස් බඩ පානය කිරීම.

3. කස කසා ඇට වතුරේ දමා උදෑසන හිස් බඩ පානය කිරීම.

දිනට වතුර ලීටර් 2ක්වත් පානය කිරීම වඩා වැදගත්. ඒ වගේම තමයි වැදගත්ම කරුණ බොහෝ දෙනෙක් පුරුදු වෙලා ඉන්නවා මෙවැනි සුළු වේදනාවලදී කෘත්‍රිම වේදනානාශක භාවිත කිරීමට. කෘත්‍රිම වේදනානාශක භාවිතය නිසා අතුරු ආබාධ ඇති වෙන්න පුළුවන්.

හංසි ආටිගල 

උපුටා ගැනීම මව්බිම පුවත් පත