පෙත්තක් වෙනුවට පාවිච්චි කළ හැකි ස්වභාවික වේදනා නාශක

විටින් විට ඇති වන හිසරදයට හා සිරුරේ ඇතිවන වේදනාවටත් ක්ෂණික සහනයක් ගෙන දෙන්නට පැරසිටමෝල් පෙත්තක් ප්‍රමාණවත් වුණත් එහි සෞඛ්‍යාරක්ෂිත බව ගැන නම් ඔබ දෙවරක් සිතා බැලිය යුතුමයි. මේ නිසා ඒ වෙනුවට දේශීය ඖෂධීය සාරය අඩංගු සෞඛ්‍යයට හිතකර මෙවැනි ආදේශක භාවිතයට ගැනීම කළ හැකි නම් එය ඔබට සෞඛ්‍යසම්පන්න ජීවිතයක් ලබා දේවි. වාත වේදනා සහ කොඳු පෙදෙසේ ඇතිවන වේදනාවන් සමනය කිරීමට මෙන්ම සිරුරේ ඇතිවන වේදනාවන්ටත් මෙවැනි ඖෂධීය පානයක් සකසා ගන්න පුළුවන්. ආයුර්වේද ඖෂධීය වෙළෙඳසලකින් මිලදී ගන්නා බැබිල මුල් සහ උළුහාල් ඇට කිහිපයක් මුට්ටියකට දමන්න. එයට වතුර කෝප්ප 4ක් පමණ දමා එය කෝප්ප 2ක් වන සේ සිඳගෙන උදය හා සවස් වේලාවකට කෝප්ප 1 බැගින් පානය කිරීමෙන් ඔබට හොඳ සුවයක් ලබා ගන්නට හැකියාව තිබෙනවා. මෙම ඖෂධීය පානය හකුරු සමඟ රස බලන්නට පුළුවන්.

සුදුලූනු හා උළුහාල් ඇට කිහිපයක් එකට දමා වතුර කෝප්ප 4ක් පමණ දමා එය කෝප්ප 2ක් පමණ වන සේ සිඳගෙන පෙර පරිදිම උදේ සවස කෝප්ප 1 බැගින් පානය කිරීම වඩාත් සුදුසුයි.

කොන්දෙ වේදනාවටඅද බොහෝ දෙනාට වැරැදි ඉරියව්වෙන් සිටීම නිසා කොන්දෙ වේදනාවන් ඇති වන්නේ වයස් භේදයක් නොමැතිවයි. මෙවැනි වේදනා සමනය කර ගැනීමට වේදනා නාශක පෙති ලබාගැනීමට බොහෝ දෙනෙක් හුරුවී සිටිනවා. නමුත් තරුණ වියේ පටන්ම මෙලෙස සුළු වේදනාවන්ට එවැනි වේදනා නාශක පෙති ලබා ගැනීම නම් සුදුසු වන්නේ නැහැ. ඒ වෙනුවට ඖෂධීය ශාකසාර අඩංගු පානයක් සකසා ගැනීමෙන් ඔබේ වේදනාව සමනය කරන අතරම අමතර පෝෂණයක්ද සිරුරට ගෙන දෙනවා.

විශේෂයෙන්ම කොඳු පෙදෙසෙහි ඇති වන වේදනාවන්ට නික කොළවලින් සකසා ගත් කැඳ පානය වඩාත් ගුණදායකයි. මේ සඳහා ලබා ගන්නේ නික දලු කිහිපයක්.

හිසරදයඅවිවේකී ජීවන රටාව නිසා හිසරදය වැනි අපහසුතාවන්ටත් බොහෝ දෙනා මුහුණපානවා. ඉඟුරු කියන්නේ හිසරදය සමනය කරන්නට සුදුසු කදිම ඖෂධයක්. වියළි ඉඟුරු සමඟ තිප්පිලි දමා වතුර කෝප්ප 4ක් දමා එය කෝප්ප 2ක් වන සේ සිඳුවා ගන්න. දැන් මේ පානය උදයට සහ සවසට කෝප්ප 1 බැගින් පානය කරන්න.

සුදු හඳුන් මවුකිරි ස්වල්පයක් සමඟ මිශ්‍ර කර පල්ප් එකක් සකසා ගන්න. මේ මිශ්‍රණය නළල මත ආලේප කර මඳ වේලාවක් සිටින්න. හිසරදය සමනය කර ගන්නට මෙය හොඳ ප්‍රතිකාරයක්.
බෙලි කොළ තම්බාගත් ජලයෙන් දිනකට දෙවරක් හෝ තුන් වරක් දුම් ඇල්ලීමත් හිසරදයට වඩාත් සැහැල්ලු සුවදායී බවක් ලබාගන්න පුළුවන්.
වෙළෙඳසලෙන් මිලදී ගත හැකි පස්පංගුව පැකැට්ටුව පෙර පරිදිම තම්බා උදේ-සවස පානය කිරීමත් වඩාත් පහසුයි.

ශරීරයේ වේදනාවන්ටශරීරයේ ඇතිවන තැල්ම හෝ වේදනාවන්ට වෙනිවැල්ගැට පානය කර සුවය ලබා ගන්නටත් ඇතැම් දෙනා හුරුවී සිටිනවා. එමෙන්ම ගොනිකා දලුවලින් සකසා ගත් කැඳ පානයත් තැල්ම සුව කර ගැනීමට වඩාත් සුදුසුයි. තැල්ම සහිත ස්ථානවලට එම කොළ අඹරා ආලේප කිරීමටත් හැකියි.

බඩේ අමාරුවලටදෙහි ගැට ගෙන ගෙඩිය 4ට පළා වතුර කෝප්ප 4කට දමා තම්බා ගන්න. එය කෝප්ප 2කට හිඳගෙන උදේ සවස පානය කරන්න.

මුත්‍රා දැවිල්ලටමුත්‍රා පිටවීමේදී දැඩි වේදනාවක් ඇති අයට නිරමුල්ලිය හා පොල්පලා තම්බා පානය කළ හැකියි. පඩවැල් තම්බා පානය කිරීම මුත්‍රා ගල් නිසා ඇතිවන වේදනාවන් සමනය කිරීමටත් කදිම ඔසුවක්.

බඩේ දැවිල්ලටඅනිසි ආහාර රටාව නිසා ඇතිවන අම්ල පිත්ත රෝගයේදී උදරයේ ඉහළට පැමිණෙමින් ඇතිවන දැවිල්ලට මේ සත්කාරය වඩාත් සුදුසුයි.

මුං ඇට රැයක් වතුරේ පෙඟෙන්නට හරින්න. පසු දින කෝමාරිකා පෙත්තක් කඩා එය හොඳින් සෝදා එම පිත්ත දෙකට කපා එය තුළට පෙඟවූ මුං ඇට දමා එය steamer එකේ තම්බා ගන්න. ඉන්පසු එහි මදය සූරා ආහාරයට ගන්න. දියබත් දින කිහිපයක් උදෑසනම ආහාරයට ගැනීමත් අම්ල පිත්ත රෝගීන්ට වඩාත් ගුණදායකයි.

ශාලිකා රංගනී සමරදිවාකරඋපුටා ගැනීම මව්බිම