තුවාලයක් තිබියදී මල ගෙදර ගියොත් කිලි අහුවෙනවාද?
ඉෂාර සායනයට ආවේ නොන්ඩි ගසමින්. මොකද.... වුණේ? බලන්න ඩොක්ටර් මගේ කකුලේ තුවාලයක් තිබුණා. පසුගිය දවසක මල ගෙදරකට ගියා. ඒකේ වැඩ කටයුතු වලටත් සහභාගි වුණා. පස්සේ බලනකොට තුවාලය හොඳටම පැසවලා. මම හිතන්නේ "කිල්ලට" අහුවුණ නිසා වෙන්න ඇති. ඒ ඉෂාරගේ උත්තරයයි. මල ගෙදරකට සහභාගී වු නිසා තුවාල පැසවනවාද? අද අපි ඒ පිළිබඳව විමසා බලමු. මල ගෙදරක තැන්පත් කර තිබෙන මියගිය පුද්ගලයාගේ දේහය රෝග කාරක විෂබීජ වලින් පිරුණු එකක් බව බොහෝදෙනෙකු විශ්වාස කරන දෙයක්. රෝග කාරක බැක්ටීරියා හා විෂබීජ වලට ක‍්‍රියාකිරීමට ජීවී සිරුරක් හෙවත් ජීවත්වෙන සිරුරක් අවශ්‍ය වෙනවා. එහි ඇති ඔක්සිජන් ග්ලූකෝස් හා අනිකුත් පෝෂ්‍ය පසුබිම තුළ රෝග කාරක විෂබීජ බැක්ටීරියා ක‍්‍රියාකර ලෙඩ රෝග සාදනු ලබනවා. නමුත් මියගිය සිරුරක් තුළ ක‍්‍රියාකාරී වන්නේ "වියෝජක බැක්ටීරියා” නමින් හඳුන්වන ජීවීන් කොට්ඨාශයකුයි. මේ මගින් සිරුර ජීර්ණය කර දිරාපත් වීමට සලස්වනු ලබනවා. පොළව මත ජීවත් වන සත්ත්ව ගහනය සලකා බලන විට මෙලෙස මියගිය පසු දිරාපත් වීම හෙවත් නරක් වී කුණුවීම පරිසරයේ පැවැත්මට වැදගත් ක‍්‍රියාවක් වනවා. ඉතිං මේ ආකාරයට මියගිය සිරුරක් මත ක‍්‍රියාකරන වියෝජක බැක්ටීරියාවන්ට සජීවි සිරුරක් හෙවත් ජීවත්වන සිරුරක් මත ක‍්‍රියාකිරීමක් සිදුවන්නේ නැහැ. සිරුරේ ප‍්‍රතිශක්තිය මඟින් එවැන්නක කිසියම් උත්සාහයක් හෝ වළකනු ලබනවා. අනික් අතට මස් කඩයක කොකුවල එල්ලා ඇත්තේද මියගිය සතකුගේ සිරුරකි. මෙහිදී අපට කිල්ල පිළිබඳව එවැනි අනියත බියක් ඇතිවන්නේ නැති බව ඔබට වැටහෙනවා ඇති. ඒ වගේම මස් කඩය අසළට මස් මිළදී ගැනීමට යන පුද්ගලයාගේ තුවාල පැසවිමක් ගැන බිය වීමක් ඇතිවන්නේ නැති බවත් ඔබට දැනෙනවා ඇති. එවැනි ස්ථානයක "කිල්ල" ගැන කතා කරනවාත් ඔබ අසා නැතිව ඇති. අනිත් අතට මල ගෙදරක "කිල්ල" පිළිබඳව ඇති සැකය, ඊට යාබද හෝ අල්ලපු ගෙවල්වල වසනා අයට හා ඒවාට යන එන අයට නැතිබව ජනාකීර්ණ නිවාස ඇති ප‍්‍රදේශවල වාසය කරනා පුද්ගලයන් අත් දකින දෙයක්. "කිල්ල" හෙවත් විෂබීජ ඇති ප‍්‍රදේශයේ සීමා පිළිබඳව ඇත්තේ මානසික රීතියක් බව මේ අනුව ඉතා පැහැදිලි කාරණයක්. සරලව සඳහන් කළ හැක්කේ මෘත දේහයේ ඇති විෂබීජ, ජීවත්වන පුද්ගලයන් තුළ රෝග කාරක ලෙස ක‍්‍රියා කළ නොහැකි බවයි.
තුවාලයක් පැසවීම හෝ සුවවීම සඳහා බලපාන කරුණු කාරණා ගැන කෙටියෙන් විමසමු.
මෙහිදී තුවාලය සිදු වූ ආකාරයත්, තුවාල සිදුවූ ස්ථානයත්, තුවාල සිදු වූ පුද්ගලයාත්, පැසවීම සිදු කළ බැක්ටීරියා විෂබීජයත් ආදී කාරණා කිහිපයක් මත තුවාල සුවවීම රඳා පවතිනවා. අපගේ ජන ජීවිතය හා බැඳුණු වචනයක් වන "කිල්ල" හා තුවාල පැසවීම අතර ඍජු සම්බන්ධයක් නොමැති බව පාඨක ඔබට දැන් වැටහෙනවා ඇති.
උපුටා ගැනීම දිනමිණ පුවත් පත
