ඉපදෙන්නත් කළින් හදවත් සැත්කමක්
ඇමරිකාවේ ලොස් ඇන්ජලීස් නුවර ශල්‍ය වෛද්‍යවරු පිරිසක් විසින් පසුගිය දිනකදී ප්‍රථමවරට සති විසිපහක් වයසැති කළලයකට සාර්ථක ලෙස හෘද සැත්කමක් සිදු කොට එහි අවහිරව තිබූ කපාටයක් යළි සාමාන්‍ය තත්ත්වයට පත් කිරිමට සමත් වූහ. ලොස් ඇන්ජලීස් හි C H A හොලිවුඩ් ප්‍රෙස්බෙටේරියන් වෛද්‍ය මධ්‍යස්ථානයේ සිදු කෙරුණු එබදු ඝණයේ පළමු සැත්කම වූ මේ සඳහා ශල්‍ය වෛද්‍ය කණ්ඩායම විසින් පෙර පුහුණුවක් ලබාගෙන තිබුණේ මිදිගෙඩියක් මත අදාල සැත්කම සිදු කරමිනි. මවගේ ශරීර‍ය ලෙස යොදා ගන්නා ලද්දේ ජල්ලිමය ද්‍රව්‍යකින් නිමවන ලද ආකෘතියකි. කුඩා වෝල්කට් ගෙඩියක ප්‍රමාණයේ වූ කළලයේ හෘදයේ වූ එක් කපාටයක් බොහෝ සේ පටුව වර්ධනය වීම නිසාවෙන් හෘදයට ලැබිය යුතු රුධිර ප්‍රමාණය බොහෝ සේ සීමා වී තිබූ අතර කපාටයේ වූ එම අවහිරතාව පිළිසකර කිරීම සඳහා වෛද්‍ය කණ්ඩායමක් විසින් කෙස් ගසක ප්‍රමාණයෙන් වූ සියුම් තන්තුවක්, සියුම් ඉදිකටුවක්, කුඩා බැලුනයක් හා කැතීටරයක් යොදාගෙන තිබිණ. යම් හෙයකින් මෙම සැත්කම සිදු නොකළේ නම් හෘදයේ වර්ධනය සඳහා අවශ්‍ය රුධිරය නිසි ලෙස නොලැබීයාමෙන් Hypoplastic Left Heart Syndrome නම් වූ මාරාන්තික සංකූලතාව සහිතව උපදින දරුවා මිය යෑම වැළැක්විය නොහැකිවනු ඇත.
රුක්ලන්ති පෙරේරා
උපුටා ගැනීම ලක්බිම පුවත්පත
