නිතරම ඇග රිදෙනවා වැඩක් කරන්නම බැහැ
ඇතැම්විට වියපත් වීම නිසාම පමණක් නොව ශරීර අභ්‍යන්තරයේ වන විවිධ අපහසුතා නිසාද වේදනාකාරි තත්ත්වයන්ට ඔබත් මුහුණ දී ඇතුවාට සැකයක් නැත. මෙම වේදනාවන් ඇතිවීමට විවිධ හේතූන් රාශියක් බලපායි. එවන් අවස්ථා කිහිපයක් හා ඒ සඳහා ඔබ සැලකිලිමත් විය යුතු ආකාරය පිළිබඳ අවධානය යොමු කිරීම වැදගත්. සරල ලෙස කිවහොත් වේදනාවක් යනු ශරීරයට දැනෙන අපහසුවක්. යම් තුවාලයක් හෝ රෝගාබාධයක් නිසාද වේදනාව හට ගනියි. මේ අයුරින් අපට වේදනාවක් ලෙස දැනෙනුයේ රෝගයක් හෝ තුවාලයක් නිසා සිරුර විසින් නිපදවන රසායන ද්‍රව්‍යයන් ස්නායු මත ඇති කරවන බලපෑමයි. එම වේදනාව අපට සංවේදන කරනුයේ ස්නායු මගනි.
හිසරදය
මෙහිදී හිසේ ඇතිවන වේදනාව අපට සංවේදනය කරනුයේ ස්නායු මගිනි. මෙලෙස ඇතිවන හිසරදය විවිධ තත්ත්ව අනුව වර්ග කරනු ලැබේ.
- හදිසියේ ඇතිවන හිසරදය.
- කල්පවතින හිසරදය.
තවද හිසරදයේ ඇති වන වේදනාව අනුවද වර්ගීකරණය වේ.
- මඳ හිසරදය.
- මධ්‍යම හිසරදය.
- උග්‍ර වේදනා හිසරදය වශයෙනි.
ක්ෂණිකව හිසේ තද වේදනාවක් ඇතිවීමත් සමගම වමනය පිට වීම මෙහිදී සිදුවිය හැකිය. මෙලෙස වන්නේ ඔළුවට වැරෙන් පහරක් වැදීම නිසා හෝ යම් තුවාලයක් වූ නිසාද පුළුවන. එහිදී වෛද්‍යවරයකු ලේ දිය කිරීමට ඖෂධ නියම කර ඇත්නම් එවන් විටෙකත් තදබල හිසරදයක් ඇති වේ නම් වහාම වෛද්‍යවරයකු හමුවන්න. සිහි නැතිවීම, තදින් වමනය යෑම වැනි තත්ත්වයන් පවතී නම් වහාම වෛද්‍යවරයකු හමුවීම සුදුසුයි.
දීර්ඝ කාලීන හිසරදය
මෙය තදබල ලෙස දැනෙන්නක් නොවේ. මෙවන් වේදනාවක් ගණනය කරන සාර්ථක ක්‍රමවේද වෛද්‍යවරුන් සතුය. ඒ අනුව ප්‍රතිකාරක වර්ග කෙරේ. මෙහිදී උග්‍ර තත්ත්වයට පැමිණියහොත් වහාම වෛද්‍යවරයකු හමුවිය යුතුය. විටින් විට ඇතිවන මෙම හිසරදය පැරසිටමෝල් භාවිතයෙන් වුවද පහව යන්නේ නැති නම් මෙය මිග්‍රේන් තත්ත්වයක් විය හැකිය. එදිනෙදා ජීවිතයේ පීඩනයන් හෝ වෙනත් මානසික හේතූන්ද මීට බලපෑමට පුළුවන. එලෙස අඛණ්ඩව හිසරදය පවතී නම් ඔබ ඒ පිළිබඳ සැලකිලිමත් විය යුතුය. එනම් ඔබට එම වේදනා ඇතිවන වේලාවන් සටහන් කරගන්න.
දවසේ කිනම් වේලාවක ඇති වේද?
තද හිරු රශ්මිය නිසා වැඩිවේද?
- ඝෝෂාකාරී තත්ත්වයකදී
- රූපවාහිනිය නරඹන විට
ආර්තවය ඇති වූ විට වැඩිවේද?
මසකට කොපමණ වතාවක් ඇතිවේද?
හිසේ එක් පැත්තක් හෝ සම්පූර්ණයෙන්ම වේදනාවක් ගෙන දෙයිද?
යන අයුරින් ඔබම ස්වයං පරීක්ෂාවක් කර අවබෝධ කර ගන්න. එහිදී ආලෝකය හා ශබ්දයන්ට හිසරදය වැඩි වේ නම් දහවල් හෝ සවස් කාලයේ වැඩිවේ නම්, හිසරදය ඇතිවීමට පෙර ඔබේ සිරුර ඒ පිළිබඳ ඔබට සංවේදනා කරන්නේ නම් මෙය මිග්‍රේන් තත්ත්වයකි. මේ සඳහා ආහාරයන්ද බලපාන අවස්ථා ඇත. චොකලට් හා තෙල් අධික ආහාර ගැනීම මෙන්ම බඩගින්නටද හිසරදය ඇතිවීම දැකිය හැකිය. මෙවන් තත්ත්වයන්ගෙන් අත්මිදීමට තමාම පාලනය විය යුතුය. කලින් සඳහන් කළ හේතු හඳුනා ගනිමින් ඒවා හැකිතාක් සීමා කරගන්න. මෙහිදී දරාගත නොහැකි හිසරදය සමග වමනය පිටවීමටද හැකිය. මේ සඳහා සාමාන්‍යයෙන් පැරසිටමෝල් භාවිත කිරීම සුදුසුය. පසුව වමනය නැවැත්වීමටද ඖෂධ ලබාදේ.
කොන්දේ අමාරු
මෙය බහුල වශයෙන් කාන්තාවක් හට ඇතිවන්නකි. මොවුන්ගේ ආර්තවහරණ සමග සිරුරේ කැල්සියම් නිපදවීම අඩුවේ. ශරීර ස්ථුලභාවය නිසා අස්ථි පිපිරීමට ලක්විය හැකිය. මෙය ඔස්ටියෝපොරෝසිස් ලෙස හඳුනාගනියි. එහිදී අස්ථි අතර ඇති තරලය හීන වී හන්දි අතර ඉඩ අඩුවීම නිසා ස්නායු තෙරපෙයි. එවිට කොන්දෙ අපහසුතා මතු කරවයි. කැල්සියම් අඩු නිසා නුහුරට බරක් එසවූ විට පවා මෙවන් තත්ත්ව ඇතිවිය හැකිය. මෙම අපහසුතා තදින් ඇත්නම්, දැඩි බරක් ඔසවා කකුල් පණ නැතිවුවහොත්, ඇවිදීමේ අපහසුතා වුවහොත්, වහාම රෝහලක් වෙත ගෙනයන්න. එම වේදනා දරාගත හැකි සුළු වේදනාවක් නම් හදිසි නොවන්න. නමුත් නිසි ප්‍රතිකාර කිරීමට වග බලාගන්න. ඔබේ සිරුරේ ස්ථුලභාවයත් මේ සඳහා බලපායි. එනිසා කෑම පාලනයකට හුරුවීම වඩාත් සුදුසු වේ. මෙවන් විටෙක කොඳු ඇට පෙළ තරමක් දුර්වල නිසා ඒවා ශක්තිමත් කිරීමට ව්‍යායාම කිරීම අත්‍යවශ්‍යය. මෙය වෛද්‍ය උපදෙස් අනුව සිදු කළ යුතුය.
ප්‍රතිකාර
ප්‍රථමයෙන් වේදනා නාශක භාවිත කළ හැකිය. කොන්දෙ අපහසුතා පරීක්ෂා කර අස්ථි බිඳීමක් සිදුව ඇත්දැයි නිගමනය කරගන්න. ඒ අනුව ඖෂධ නියම කරයි. එහිදී වේදනාව ඇති විට පමණක් ඛෙහෙත් ගැනීමට හුරුවන්න.
සන්ධි වේදනා
මෙයද වැඩි වශයෙන් කාන්තාවන්ට ඇති වන්නකි. ආර්තවයෙන් පසු මේ සඳහා ඇති අවදානම වැඩිය. මෙහිදී පරීක්ෂාවකින් පසු හේතු සොයා නිසි ප්‍රතිකාර නියම කරයි. එම ප්‍රතිකාර ම`ගින් සුව නොවුවහොත් එන්නත් කිරීමක් සිදුවේ. මෙය කාලයක් කල් පවතින්නකි. එම`ගින්ද වේදනාව පහව නොගියහොත් ශල්‍යකර්මයකින් සන්ධි පිරිසුදු කිරීම සිදුකළ හැකිය.
ආර්තවය සමග ඇතිවන වේදනාව
කාන්තාවකගේ ඔසප් චක්‍රය ආරම්භ වන විටම උදරයේ වේදනාවක් ඇතිවේ. මෙය පුද්ගලයාගෙන් පුද්ගලයාට වෙනස් වන්නකි. මෙම වේදනාව ටිකෙන් ටික අඩුවී පහව යයි. මෙය රෝගයක් නොවේ. ශරීරයේ හෝමෝනවල යම් ගැටලුවක් නිසා යටි බඩ ලේ ගැලීම වැඩිවීමට පුළුවන. කලින් සඳහන් කළ පරිදි වේදනාව ටිකෙන් ටික පහව යන්නේ නම් එය ගැටලුවක් නොවේ. නමුත් එය අඛණ්ඩව පවතී නම් වෛද්‍යවරයකු වෙත යෑම වඩාත් සුදුසු වේ. මන්ද ඇතැම් විට ගර්භාෂ බිත්තියේ ඇති වූ ගෙඩියක් ගර්භාෂ බිත්තියට පිටතටත් වර්ධනය වීමට හැකි බැවිනි. ඇතැමුන් ආර්තවය වේදනාවට පැරසිටමෝල් වේදනා නාශකයක් ලෙස භාවිතයට ගනියි. ලේ ගලනය අඩු කිරීමටද ඖෂධ ලබාගන්නා අවස්ථා ඇත. දැන් සෑම මූලික රෝහලකම සුවනාරි සායන ආරම්භ කර ඇත. මෙමගින් අවු 35ට වැඩි කාන්තාවන්ගේ සියලු කායික මානසික රෝගයන් සඳහා ප්‍රතිකාර කෙරේ. මෙවන් සායනයන්ට යොමුවී ඔබේ සෞඛ්‍ය තත්ත්වය පරීක්ෂා කර නිසි ප්‍රතිකාර සඳහා යොමුවිය හැකිය.
තුවාලයක් වූ විට
සීරීමක් හෝ යම් තුවාලයක් සිදුව ලේ ගලා යයි නම් එය හොඳින් පිරිසුදු කර සුදුසු අලේපන (ඖෂධ) ගල්වා ආවරණය කර තැබිය යුතුය. දැඩි වේදනාවක් ඇත්නම් පැරසිටමෝල් වැනි ඖෂධයක් ගත හැකිය. ඉන් පසුවත් වේදනාවක් ඇති වේ නම් තුවාලය ආසාදනය වී තිබිය හැකි හෙයින් වෛද්‍යවරයකු වෙත යෑම වඩාත් සුදුසුය. මිග්‍රේන්, ඔස්ටියෝපොරෝසිස් හා ආර්තවයෙන් දැඩි ලෙස පීඩා විඳින්නේ නම් එය ඔබේම නොසැලකිලිමත් බව නිසා සිදුවන්නකි. සමබල ආහාරවේලකට හුරුවීමත් සමගම දිනපතා ව්‍යායාමයන්හි නිතර වන්නේ නම් නිරෝගීසම්පන්න දිවියකට හිමිකම් කීමට ඔබටත් හැකිවනු ඇත.
වෛද්‍ය තුසිත කහදුව ජාතික රෝහල - කොළඹ
ශාලිකා රංගනී සමරදිවාකර
උපුටා ගැනීම මව්බිම පුවත් පත
