පොතුකබර රෝගය පාලනය කළ හැකියි - නොපමාව ප්‍රතිකාර වෙත යොමුවන්න

පොතුකබර නම් සමේ ඇති වන්නා වූ කුෂ්ට රෝගය නිසා අද ජන සමාජයේ ඇතැමෙක් සිත්තැවුලෙන් කාලය ගත කරන්නට පුළුවන. එහෙත් සිත්තැවුලෙන් ජීවත් වනවාට වඩා එය මැඩපවත්වා ගැනීමට උත්සාහ කිරීම වැදගත්ය. එනිසා අප කළ යුතු වන්නේ රෝගයට මුල්වන හේතු කාරණා පිළිබඳ නිවැරැදි අවබෝධයක් ලබා ගැනීම සහ ඉන් පසු කටයුතු කරන ආකාරය පිළිබඳ දැනුවත් වීමය. 

පොතුකබර රෝගය හට ගැනීමට බලපාන ප්‍රධාන හේතුව කුමක්ද?

අද ජන සමාජයේ දක්නට ලැබෙන විවිධ වූ ආහාර රටාවන් හා මානසික හේතූන් මේ රෝගය ඇති වීමට බලපා තිබෙනවා. එසේම මානසික ආතතිය, උෂ්ණ අධික ආහාර, පිත්කෝපකර ආහාර හා දිරවීමට අපහසු ආහාර, වැරදි ප්‍රතිකාර හා වේගධාරණය (මළ මුත්‍ර පිට නොකර සිටීමෙන් ඇතිවන තත්ත්වය) නිසාත් කුෂ්ට ඇති වෙනවා. සමහර විට රෝගය ශරීරයේ තිබෙන්නට පුළුවන්. එය ශරීරයේ ප්‍රතිශක්තිකරණ හීන වූ අවස්ථාවක මතු වෙන්නත් පුළුවන්. එසේම පෙර ආත්මවල කර්මඵල අනුවත් මෙය ඇතිවීමේ අවස්ථා තිබෙනවා. මේ අනුව දීර්ඝ කාලීන බෝ නොවන චර්ම රෝග වැඩිපුර දකින්න ලැබෙනවා. ආයුර්වේදයට අනුව චර්ම රෝග කුෂ්ට ලෙස හඳුන්වනවා.

අතීතයට වඩා වර්තමානයේ සමේ ඇතිවන කුෂ්ට රෝග දස දහස් ගණනකින් ඉහළ ගොස් තිබෙනවා. එයට හේතුව වී තිබෙන්නේ ද ආහාර හා මානසික හේතූන්ය.

වයස් බේදයකින් තොරව පොතුකබර රෝගය පැතිරී යනවා ද?

මේ සඳහා වයස් බේදයක් නැහැ. නමුත් ළමා කාලයේ දක්නට ලැබෙනවාට වඩා තරුණ කාලයේ මේ රෝගය වැඩිපුර දකින්නට ලැබෙනවා. එයට හේතුව ළමා කාලයේ සහ තරුණ කාලයේ ප්‍රකෘතියේ හා මානසිකත්වල බලපෑමයි. කෙසේ වෙතත් ළමා කාලයේ රෝගය ඉතා හොඳීන් පාලනය කළ හැකි වුවත් එය තරුණ කාලයේ පහසු වන්නේ නැහැ. එයට හේතුව ළමා හා තරුණ කාලයේ මානසිකත්ව වෙනස් නිසයි. නමුත් රෝගී වූ පුද්ගලයාගේ මානසිකත්වය හා කැපවීම මත රෝගය හොඳීන් පාලනය කිරීමේ හැකියාව තිබෙනවා.

පොතුකබර හඳුනා ගන්නේ කෙසේ ද?

පළමුවෙන්ම මෙය පුද්ගලයාගෙන් පුද්ගලයාට බෝ නොවන රෝගයක් ලෙස සඳහන් කළ යුතුයි. පොතුකබර රෝගය දක්නට ලැබෙන්නේ මාළු කොරපොතු මෙන් පොතු ගැලවී යාමයි. එය බොහෝ විට වැළමිට සන්ධියේ හා දණහිසේ බහුලව දකින්න පුළුවන්. මෙහි මූලික ලක්ෂණ ලෙස කුඩා ලප ඇති වී ගැලවී යනවා. මෙය ක්‍රමයෙන් වැඩි වෙන්න පුළුවන්. ඇතැම් විට ක්ෂණිකව මුළු ශරීරයේ ම මෙවැනි ලප ඇති විය හැකියි. සමහර පුද්ගලයන් මෙය වෙනත් කුෂ්ට රෝගයක් යැයි වරදවා වටහා ගැනීමට ද පුළුවන්.

මේ සඳහා ප්‍රතිකාර තිබෙනවා ද?

රෝගීයාගේ ස්වභාවය ප්‍රතිකාරය සාර්ථක වීමට බලපානවා. පෙර සඳහන් කළ ආකාරයට මෙවන් රෝගීන්ට කර්මඵල හේතූන් තිබෙන නිසා මානසිකත්වය ඉහළ මට්ටමකට ගෙන ඒමට අප කටයුතු කරනවා. මේ ප්‍රතිකාර අනුව රෝගියාගේ මනස හා කායික සුවයත් ඉතා වැදගත්. මානසික සැනසීම සඳහා යෝග ව්‍යායාම් ආරම්භ කර මානසික සැහැල්ලුව ලබා දෙනවා. අනතුරුව කුෂ්ට චිකිත්සාව ආරම්භ කරනවා. එසේම විවිධ වූ ආලේපන වර්ග භාවිතා කරනවා. ඊට අමතරව වමන කර්ම හා විරේචන කර්ම මෙන්ම වස්තිකර්ම ද සිදු කරනවා. ඊට අමතරව (ප්‍රත්‍යා-ප්‍රත්‍ය) සුදුසු - නුදුසුසු සහ (ව්‍යහරණ) ඇවතුම් පැවතුම් පිළිබඳව ද දැනුවත් කරනවා.

රෝගීන්ට දෙන පණිවුඩය කුමක් ද?

මෙවැනි රෝග සඳහා සමහර රෝගීන් බිය වෙනවා. සිත් තැවුලට පත් වෙනවා. එවන් ආකාරයට අනවශ්‍ය ගැටලු ඇති නොකරගෙන ප්‍රතිකාර වෙත යොමුවීම වැදගත්. රෝගියාගේ මානසිකත්වය ඉහළ අගයක පිහිටුවීමට අප ආයුර්වේද රෝහලේ අවශ්‍ය කටයුතු සැලැසුම් කර තිබෙන නිසා වැදගත් වන්නේ නිවැරැදිව ලබාදෙන උපදෙස් අනුව කටයුතු කිරීමයි. එසේ වුවහොත් කිසිදු ගැටලුවක් නොමැතිව රෝගය පාලනය කරගත හැකියි.

පල්ලෙකැලේ ආයුර්වේද රෝහලේ වෛද්‍ය කිෂානි වනිගසේකර