හදවතට - මොළයට හානි කරන වෙස්වලා ගත් රකුසා අධි රුධිර පීඩනය

සමස්ත ජනගහනයෙන් කොටසකට පමණක් අධික රුධිර පීඩනය ඇති වන බව පරීක්ෂණ වලින් හෙළි වී තිබෙනවා. යම්කිසි පුද්ගලයෙකුට අධික රුධිර පීඩනය ඇති වන්නේ ඇයි දැයි ප්‍රශ්න කළ විට ඒ සඳහා නිසි පිළිතුරක් ලබා දීමට බොහෝ දෙනා මැලි වනවා. එයට හේතු වන්නේ අධික රුධිර පීඩනයට පාදක වන හේතු කුමක්දැයි රෝගියා හෝ රෝගියාගේ ඥතීන් නොදන්නා නිසයි. ඇතමෙකුට අධික රුධිර පීඩනය ඇති වන්නටත් ඇතමෙකුට එවන් තත්ත්වයක් ඇති නොවන්නටත් හේතුව කුමක්ද? මෙවර ආරෝග්‍යා පුවත්පතින් නිතරම ඔබ දැනුවත් කරන හෘද රෝග පිළිබඳ විශේෂඥ වෛද්‍ය රුවන් ඒකනායක මහතා ඔබට පිළිතුරක් ලබා දීමට මෙවර කලාපයෙන් බලාපොරොත්තු වෙනවා. එපමණක් නොව රුධිර පීඩනය ඉහළ යන ක්‍රම වළක්වා ගැනීමට එතුමා ඔබට උපදෙස් දීමට බලාපොරොත්තු වනවා.

අධි රුධිර පීඩනය ඇති රෝගීන්ගෙන් 90%කගේම රුධිර පීඩනය ඉහළ යාමට හේතුවක් සොයා ගැනීමට අපහසුයි. බොහෝවිට ඔබේ පරම්පරාවේ දෙමාපියන්ට, සහෝදර සහෝදරියන්ට අධික රුධිර පීඩනය ඇත්නම් ජානමය බලපෑම් මත ඔබටත් ඔබේ සහෝදර සහෝදරියන්ටත් ආරෙන් මෙම තත්ත්වය ඇති වන්නට පුළුවන්. මව්පිය දෙදෙනාම අධි රුධිර පීඩනයෙන් පෙළෙනවා නම් දරුවකුට අධි රුධිර පීඩනය ඇති වීමට පවතින ඉඩකඩ වැඩියි.

රුධිර පීඩන ඇතිවන අවස්ථා කීපයක්

• වැඩිපුර ජලය හා ලුණු රුධිරයට එකතු වූ විට රුධිර පරිමාව වැඩි වේ.
• හදවතේ සිට රුධිරය ගෙන යන රුධිර නාල බිත්ති මහත් වී කුහරය පටු වූ අවස්ථාව
• හදවත මඟින් රුධිරය වඩා වේගයෙන් හා තදින් පොම්ප කරන අවස්ථාව. මේ අවස්ථා තුනේදීම අධි රුධිර පීඩනය තත්ත්වයක් ඇති විය හැකිය.

වැඩිපුර ලුණු ආහාරයට ගැනීම

අපි යම්කිසි ආහාරයක් ගත් විට එහි අඩංගු ලුණු ප්‍රමාණය අපගේ සිරුරට උරා ගැනීම සිදුවේ. රුධිරයේ ලුණු ප්‍රමාණය වැඩි වූ විට රුධිරය වැඩිපුර ජල ප්‍රමාණයක් දරා ගනී. මෙයින් සිදුවන්නේ හදවත මඟින් පොම්ප කළ යුතු තරල ප්‍රමාණය වැඩිවීමයි.

තරබාරු කම

විශාල සිරුරක් ක්‍රියාත්මක කරවන්නට හදවතට වැඩිපුර රුධිර ප්‍රමාණයක් පොම්ප කිරීමට සිදු වේ. තරබාරු සිරුර තුළ තිබෙන වැඩි වූ මේද ප්‍රමාණය රුධිර නාල ඇතුළත තැම්පත් වීමක් නිසා රුධිර පීඩනය වැඩිවීමට හේතුවක් විය හැකිය.

අධික ප්‍රෝටීන සහිත ආහාර අනුභවය

අධික ප්‍රෝටීන සහිත ආහාර අනුභව කිරීමෙන් රුධිර පීඩනය වැඩිවීමට හේතු වේ.

දැඩි මානසික ආතතිය

යම්කිසි පුද්ගලයෙකුට දැඩි ලෙස මානසික ආතතියට මුහුණ දීමට සිදුවීමෙන් හෝ යම්කිසි වේදනාකාරී අත්දැකීමක් පිළිබඳ දිගින් දිගටම ආතතියෙන් යුතුව කල්පනාවේ නිග්ම වී සිටීම, අධික භීතිය, අධික කේන්තිය, ප්‍රශ්න වලින් මිරිකී සිටීම, නිරන්තරයෙන් මේ අවස්ථාවන්ට මුහුණ දෙන අයට දීර්ඝ කාලීන අධික රුධිර පීඩනය වැළදීමට ඉඩ ඇත.

අධික රුධිර පීඩනය තිබෙන රෝගියෙකුට ඇතිවන රෝග ලක්ෂණ

බොහෝ දුරට රෝග ලක්ෂණයක් දැකිය නොහැක.

අනපේක්ෂිත ලෙස කායික රෝගයකට මුහුණ දෙන තුරුම තමාට අධික රුධිර පීඩනය ඇත්දැයි බොහෝ දෙනෙක් දන්නේ නැත.

මේ නිසා යම් ලෙසකින් තමාට අධි රුධිර පීඩනය ඇති වේ යැයි සැක හැර දැන ගැනීමට අවුරුදු 40 ඉක්මවූ පසු වසරකට දෙවරක් වත් අධි රුධිර පීඩනය පරීක්ෂා කර බැලීම වැදගත්ය.

එය වැඩි පැත්තට බර නම් සති දෙකකට වරක් වත් මැන ගත යුතුය. සාමාන්‍ය තත්ත්වයේ තිබේ නම් මාස දෙක තුනකට වරක් වත් රුධිර පීඩනය මැන ගත යුතුය.

තමාට අධි රුධිර පීඩනය ඇති වී තිබේ යැයි සිතිය හැකි රෝග ලක්ෂණ කීපයක්ම ඇත.

1. උදේ පාන්දර බෙල්ල පිටුපස ඉහළ ප්‍රදේශයේ සහ හිස මුදුනත ඇති වන හිසරදය හිස කරකැවිල්ල

2. හුස්ම ගැනීමේ අපහසුතාව

3. නාසයෙන් ලේ ගැලීම

4. පෙනීමෙහි අපැහැදිලි බව (දෑස් ඉදිරිපස දැලක් ඇති ලෙසින් දැනීම)

5. දිගටම පවතින සේ වරින් වර ඇතිවන අත - පය පණ නැතිකම

පහත ලක්ෂණ පවතී නම් නිරතුරුවම රුධිර පීඩනය මැන බැලීම සිදු කළ යුතු වෙයි.

• පවුලේ සාමාජිකයන් සහ සමීප (ලේ) ඥාතීන් අතරින් කිහිප දෙනෙකුට අධික රුධිර පීඩනය හෝ හෘද රෝග පැවතීම
• පවුලේ සමීප ඥාතීන් අතර වකුගඩු දුබලතාවක් පැවතීම
• දුම්පානය
• අධික මත්පැන් පානය
• උපත් පාලන පෙති භාවිතය

මෙවැනි රෝග ලක්ෂණ ඇති වූ විට වහාම වෛද්‍යවරයෙක් වෙත ගොස් ඔබේ රුධිර පීඩනට පරීක්ෂා කරවා ගන්න. එක් වරක් පමණක් රුධිර පීඩනය මැන බැලීමෙන් ඔබ අධික රුධිර පීඩනයෙන් පෙළෙන්නෙක් බව තහවුරු කර ගත නොහැක. ඔබ මුලින්ම රුධිර පීඩනය මැන බැලූ අවස්ථාවේ රුධිර පීඩනය ඉහළ ගොස් තිබුණි නම් කලබල විය යුතු නැත.

අවම වශයෙන් ඉදිරි සති දෙක, තුන ඇතුළතදී සතියකට වරක් යළි යළිත් රුධිර පීඩනය මැන බැලීම වැදගත් වේ. ඒ සෑම අවස්ථාවකදීම රුධිර පීඩනය ඒකාකාරීව ඉහළ මට්ටමක පවතිනවා නම් ඔබත් අධික රුධිර පීඩනයෙන් පෙළෙන්නෙකු බව නිගමනය කළ හැක. එවිට ඔබ අනිවාර්යෙන්ම වෛද්‍යවරයෙක් මුණ ගැසී ප්‍රතිකාර ගැනීම අත්‍යවශ්‍ය වේ.

හේතුව අධික රුධිර පීඩනය යනු වෙස්වලා ගත් රකුසෙකු සේ ඔබගේ හදවතට (හෘදයාබාධ), ඔබගේ මොළයට (ආගාධය), හෝ වෙනත් ඕනෑම ඉන්ද්‍රියයකට බලපෑම් කළ හැකි බැවිණි.

උපුටා ගැනීම දිනමිණ