කාටත් එන හතළිස් ඇඳිරිය
මගේ වයස අවුරුදු 42 යි. ළඟකදී ඉඳන් මට බේත් බෝතලේ කවරවල අකුරු කියවන්න අමාරුයි. මගේ ඇස්වල ප්‍රශ්නයක්ද? මේ වගේ ගැටලු ඔබටත් ඇති. ජීව විද්‍යාත්මක වයසත් සමග අපට ජීවිතයේ වෙනදා පහසුවෙන් කරන ලද කටයුතු කිරීමේ යම් යම් අපහසුකම් ඇතිවනවා. 40 ඇඳිරිය මේ වගේ කතාබහ කරන මාතෘකාවක්.අපේ ඇසේ ස්වභාවික කාචයට අප සමීපයේ ඇති දෙයක් බලන විට එහි වක්‍රතාව සුදුසු විදිහට වැඩි කරගෙන ඒ දෙය දෙස බලන්න පුළුවන්. මෙහිදී අපි වස්තුවේ ප්‍රතිබිම්භය දෘෂ්ටි විතානය මතට නාභිගත කරනවා. නමුත් අපේ වයස සමග මේ හැකියාව අපෙන් ක්ෂයවන්න පටන් ගන්නවා. මේ නිසා අපේ ඇසේ ස්වභාවික කාචයට වෙනදා වගේ තමන්ගේ වක්‍රතාව වෙනස් කරගැනීම අපහසු වනවා. එතකොට වෙනදා වගේ ඉදිකටුවට නූල දාගන්න බැහැ. පොත්වල පුංචි අකුරු කියවන්න අපහසු වනවා. හාල්වල තිබෙන වී ඇට වගේ දේවල් පෙනෙන්නේ නැහැ. ඔන්න ඔය වගේ වෙනදා කිසිම අපහසුවක් නැතුව කරන ලද කටයුතු කිරීම දැන් අපහසු වෙන්න පටන් ගන්නවා.
ඕනෑම කෙනෙකුට වයස අවුරුදු 40 දී හතළිස් ඇඳිරිය ඇතිවන්න පුළුවන්ද?
ඔව්. එහි වෙනසක් නැහැ. කාටත් මේ තත්ත්වයට මුහුණ දීමට සිදුවනවා. එය වයසත් සමග ඇතිවන ස්වභාවික සංසිද්ධියක්. නමුත් ඔබ තරුණ කාලයේදීම කණ්ණාඩි පැළඳගෙන සිටින අයෙකු නම් හතළිස් ඇඳිරිය ඇතිවන වයස ටිකක් වෙනස් වෙන්න පුළුවන්.
ඒ වගේම ඔබ අවිදුර දෘෂ්ටිකත්වයට කණ්ණාඩි දැම්ම කෙනෙක් නම් ඔබට අවුරුදු හතළිහෙන් පසුවත් ටික කාලයක් යනතෙක් හතළිස් ඇඳිරිය ඇති නොවන්න පුළුවන්. තරුණ කාලයේදී දුර දෘෂ්ටිකත්වයට කණ්ණාඩි පළඳපු කෙනෙක් නම් වයස අවුරුදු හතළිහටත් කලින්ම මේ තත්ත්වය ඇතිවන්න පුළුවන්.
ඇස්වලට ව්‍යායාම කළොත් හතලිස් ඇඳිරිය වළක්වා ගන්න පුළුවන්ද?
නැහැ. එහෙම ව්‍යායාම මගින් හතළිස් ඇඳිරිය වළක්වා ගන්න හෝ නැවත සුව කිරීමක් කරන්න බැහැ. ඒක මිථ්‍යාවක්.නමුත් මෙහෙම දෙයක් තිබෙනවා. හතළිස් ඇඳිරිය ආරම්භ වන අවධියේදී අපේ ස්වභාවික කාචයට හා ඒ ආශ්‍රිත පේශිවලට යම් ප්‍රමාණයකින් ඊට අනුගත වෙලා කාචයේ වක්‍රතාව වෙනස් කරගන්න පුළුවන්.
නමුත් වරදවා වටහා ගන්න එපා. මෙය යම් ප්‍රමාණයකට පමණයි.ඉතින් මේ වෙලාවේදී ඇතැම් විට ඇසට කරන ව්‍යායාමවලින් මේ හැකියාවට පොඩි තල්ලුවක් දෙන්න පුළුවන්. හැබැයි තව වයසට යද්දී මේ හැකියාව සම්පූර්ණයෙන්ම නැතිවෙලා ඔබට කොහොමත්ම කණ්ණාඩි දාන්නම වනවා.
හොඳ මල්ටි විටමින් එකක් ගත්තොත් හතළිස් ඇඳිරිය වළක්වා ගන්න පුළුවන්ද?
ඒ ගැන කියනවා නම් ඇසට අදාළ මල්ටි විටමින් තිබෙනවා. ඒවායේ විටමින් C,E, සින්ක්, ඇතැම් මේද අම්ල, ටොයින්, සියාසැන්තනීන් කියන පෝෂක ඇසේ දීර්ගකාලීන සෞඛ්‍යට යහපත් බලපෑමක් ඇතිකරනවා. නමුත් හතළිස් ඇඳිරිය කිය්නනේ වයසත් සමග ඇති වන දෙයක්. ඉතින් විටමින් ගත්තා කියලා ඒ යථාර්ථයෙන් අපට මිදෙන්න බැහැ.
හතළිස් ඇඳිරිය නිසා අන්ධ වෙන්න පුළුවන්ද?
හතළිස් ඇඳිරිය නිසා අන්ධබව ඇති වෙන්නේ නැහැ. නමුත් පොත්පත් කියවීම, පුංචි අකුරු කියවීමේ අපහසුතා, ඉවුම් පිහුම් කටයුතුවලදී ඇතිවන අපහසුකම් නිසා ජීවිතයේ එදිනෙදා කටයුතුවලටයම් බලපෑමක් ඇතිවනවා මිසක් අන්ධ බවක් ඇතිවන්නේ නැහැ.නමුත් මෙහෙම දෙයක් තිබෙනවා.
වයසත් සමග ඔබේ ඇසට ඇතිවන සංකුලතාවන් වැඩියි. වයස අවුරුදු 40 වෙද්දි ඔබේ ඇසට ග්ලූකෝමාව, එතැනින් ගියාම දියවැඩියාව නිසා ඇතිවන සංකුලතාවන් වැඩිවනවා. ඒ නිසා ඇසේ අන්ධබව ඇතිවන්න පුළුවන්.
මේ වගේ අවදානමක් තිබෙන නිසා වයස අවුරුදු 40 පහු වුණාම ඇතිවන දෘෂ්ටි අපහැදැලිකම ගැන අක්ෂි වෛද්‍යවරයෙක් හමු වී ඇස් පරීක්ෂා කර ගැනීම වඩාත් සුදුසුයි.
හතළිස් ඇඳිරිය තිබෙනවා නම් ඒ වෙනුවෙන් ප්‍රතිකාර
මේ වෙනුවෙන් මූලික ප්‍රතිකාර ක්‍රම තුනක් තියෙනවා. එයින් ඔබට විකල් අවස්ථාවන් තෝරාගන්න පුළුවන්.කණ්ණාඩි සිවිකාච සැත්කම් මේ අතරින් වඩාත්ම පහසු ක්‍රමය විදිහට Reading Glasses දැමීම තෝරා ගත හැකියි. නමුත් මෙය ඔබේ හිතුමතයට කරන්න එපා. අක්ෂි වෛද්‍යවරයෙක් හමුවෙලා ඔබට වයස අවුරුදු 40 ආශ්‍රිතව ඇතිවන ග්ලූකෝමා තත්වය, සුද මතුවීම, දියවැඩියාවේ අක්ෂි සංකුලතාවන් ආදී තත්ත්වයන් නැති බව තහවුරු කරගන්න. ඔබ තරුණ කාලයේ කණ්ණාඩි දාන කෙනෙක් නම් දුර හා ළඟ යන දෙකටම ගැළපෙන කණ්ණාඩි නියම කරන්න පුළුවන්. එතැනත් විවිධ තෝරාගැනීම් තිබෙනවා. විවිධ කණ්ණාඩි වර්ග අතරින් ඔබේ වයස, රැකියා අවශ්‍යතාව අනුව අදාළ කණ්ණාඩිය තෝරාගන්න.
අක්ෂි ශල්‍ය වෛද්‍ය හර්ෂ ප්‍රතාපසිංහ
උපුටා ගැනීම නවලිය
