මොළයේ ලේ ගැලීමක් ප්‍රෙෂර් එක නිසා එන්න පුළුවන්
මොළයේ ලේ ගැලීමක් කියන්නේ ඔබේ මොළය තුළ හෝ එහි පිටත ආවරණ අතර ඇති අවකාශයේ පාලනයකින් තොරව රුධිර වහනයක් සිදු වීමයි. මොළයේ රුධිර නාලයක් කැඩී පිපිරී ලේ ගැලීමේදී එය ජීවිතයට තර්ජනයක් වන රෝගී තත්ත්වයකි.
මොළයේ ලේ ගැලීම භයානක වන්නේ ඇයි?
මොළයේ ලේ ගැලීම භයානක වන්නේ ඒවා ඉක්මනින්ම දරුණු අතට හැරෙන නිසයි. ඉක්මනින් වෛද්‍ය ප්‍රතිකාර නොලැබුණහොත් මේ තත්ත්වය නිසා මොළයට ස්ථිර හානි වීමට වගේම මරණය පවා ඇතිවීමට හේතු වෙනවා. ඒ නිසා මොළයට ස්ථිර ලෙසින් හානිවීම වගේම මරණය වළක්වා ගැනීමට නම් ක්ෂණික වෛද්‍ය ප්‍රතිකාර අවශ්‍ය වෙනවා. මොළයට අවශ්‍ය ඔක්සිජන් නොලැබුණොත් මිනිත්තු තුන හතරක් තුළ මොළයේ සෛල මිය යනවා.පාලනය නොකළ අධි රුධිර පීඩනය ඇති පුද්ගලයන් අතර මේ තත්ත්වය බහුලව දකින්න ලැබෙනවා.
මොළයේ ලේ ගැලීමක් සිදුවන විට දක්නට ලැබෙන රෝග ලක්ෂණ
- හිසරදය. (මෙය බොහෝ විට හදිසියේ සහ දරුණු ලෙස අන්පේක්ෂිත ලෙස කොටින්ම ඔළුව පැලෙන්න තරම් වේදනාවක් සහිත හිසරදයක් ඇතිවීම.
- ආලෝක සංවේදීතාව. (එළිය දෙස බැලීමට අපහසුව, දීප්තිමත් ආලෝකය වේදනාවක් (Photophobia) ඇති කරනවා.
- කරකැවිල්ල, වමනය.
- සිහිය නැතිවීම. ( කෝමා )
- Aphasia ( කතාකිරීමේ අපහසුතාව හෝ කතාව පැහැදිලි නැති වීම, නොපැහැදිලි ලෙස පැටලෙන ලෙස කතාකිරීම. ( Dysarthria)
- එක් පැතත්ක් පණ නැතිවීම, දුර්වලතාව, හිරිවැටීම.
- එක් වරම ඇස් බොඳ වී යෑම හෝ නොපෙනීම.
මොළයේ ලේ ගැලීමකට හේතු මොනවාද?
- මොළයේ ලේ ගැලීමකට බලපාන ප්‍රධාන හේතුව අධි රුධිර පීඩනය ලෙස සැලකේ. පුද්ගලයකුගේ රුධිර පීඩනය ඉතා ඉහළ මට්ටමක පවතින විට හෝ දිගු වේලාවක් ඉහළ මට්ටමක පවතින විට මේ තත්ත්වය ඇති වේ.
- මොළයේ ඇනියුරිසම්.( දුර්වල ස්ථානවල රුධිර නාල ඉදිමීම )
- මොළයේ පිළිකා.
- මස්තිෂ්ක ඇමිලොයිඩ්, ඇන්ජියෝපති වැනි ඔබේ මොළයේ දුර්වල රුධිර වාහිනීවල ඇති වන වෙනත් තත්ත්වයන්.
- රුධිරය තුනී කිරීමේ ඖෂධ.
- හිසට සිදුවන දරුණු තුවාල.
- අවදානමට හේතුවන වෙනත් තත්ත්වයන්.
- මත්පැන් භාවිතය සහ ආාබධ.
- අධික කොලස්ටරෝල් (හයිපර්ලිපිඩීමියාව)
- විනෝදාස්වාදය සඳහා ඖෂධ භාවිතය හෝ නිර්දේශිත ඖෂධ අනිසි ලෙස භාවිතය.
- දුම්පානය.
මේ වෙනුවෙන් ලබාදෙන ප්‍රතිකාර මොනවාද?
ඖෂධ :
- රුධිර පීඩනය අඩු කිරීමට.
- ලේ කැටි ගැසීම උපකාරී කිරීමට.
- රුධිරයේ සෝඩියම් නියමිත මට්ටම පවත්වා ගැනීමට.
ශල්‍යකර්ම ප්‍රතිකාර :
සමහර අවස්ථාවලදී රුධිර වහනය දරුණු හෝ යම් යම් බලපෑම් ඇතිවිට රෝගියාට ශල්‍යකර්මයක් අවශ්‍ය විය හැක. මෙයින් වඩාත් භයානක සංකුලතාව වන්නේ රුධිරය අවට ඇති මොළයේ කොටස් මත අධික පීඩනයක් ඇතිකිරීමයි. මය සිදු වූ විට රුධිරය ඉවත් කිරීම සහ ඔබේ මොළයේ පීඩනය අඩුකිරීම සඳහා හදිසි ශල්‍යකර්මයක් අවශ්‍ය වනවා.නමුත් සෑම මොළයේ ලේ ගැලීමකටම ශල්‍යකර්මයක් අවශ්‍ය වන්නේ නැහැ. සමහර දරුණු ලේ ගැලීම්වලදී ශල්‍යකර්ම සිදුකිරීමට නොහැකි අවස්ථාවන් තිබෙනවා.
මොළයේ ලේ ගැලීමක් ඇතිවීමේ අවදානම අඩු කරගැනීම හෝ ඒවා සම්පූර්ණයෙන්ම වළක්වා ගන්නේ කෙසේද?
- මෙය වළක්වා ගැනීමට නම් ඔබ විසින් කළ යුතු වැදගත්ම දෙය නම් රුධිර පීඩනය නීරෝගී අගයක පවත්වා ගැනීමයි.
- ඔබට අධි රුධිර පීඩනය තිබේ නම් එය පාලනය කර ගැනීම වඩාත් වැදගත්.
- අධි රුධිර පීඩනය වගේම දෙවැනි වර්ගයේ දියවැඩියාව, සහ අධික කොලස්ටරෝල් තත්ත්වයද මෙයට හේතු විය හැකියි.
- නීරෝගී බරක් පවත්වා ගන්න.
- වාර්ෂිකව වෛද්‍ය පරීක්ෂණ කරගන්න.
- ඔබේ හැසිරීම් වෙනස් කරන්න. උදාහරණ ලෙස දුම්පානය, දුම්කොළ භාවිතය, මත්ද්‍රව්‍ය අනිසි භාවිතය හෝ විනෝදාත්මක මත්ද්‍රව්‍ය භාවිතයෙන් දුරස් වෙන්න.
උපුටා ගැනීම නවලිය
