නාසයට වද දෙන පීනස
"පීනස්‌ කියන වචනය අපේ දෙසවනට ඇසෙනවාත් සමඟ කිවිසුම් සිහිගන්වන තරමට නාසය හා සම්බන්ධ වූ රෝගයක්‌ බව පැහැදිලිය. ඒත් අද වර්තමාන සමාජයේ බහුලව පැතිර යන මෙම රෝගී තත්වය ශරීර අභ්‍යන්තරිකව උපදිනා ඉතාම සංකීර්ණ රෝගයක්‌ බව අපට තේරුම් යන කරුණු බොහෝය. දකින දකින අයගේ නාසය සෙමෙන් බරවීම, නිතර නාසය තෙත්වෙමින් දියර ගලන ස්‌වභාවය, නිතර යන කිවිසුම් වැළැක්‌වීමට දරන උත්සහයන් සමඟ නාසයේ වූ දැවිල්ල, රත් පැහැගැන්වූ බව ඒවාගේම ගඳ සුවඳ නොදැනීම, රස වර්ග නොවැටහීම ආදී විවිධ හේතූන් සමඟ සමාජය ආක්‍රමණය කළ පීනස නම් මේ අපූරු රෝගී තත්ත්වය සමඟ අද සමාජයේ බොහෝ දෙනෙකුගේ හිසකේ සුදුවීම, කෙස්‌ හැලීම හා නැවත කෙස්‌ නොවැඩීම නිසා සමාජයේ පීඩා විඳිනා බොහෝ දෙනෙකි.
මෙහෙම පීඩාවටපත් වත්මන් සමාජයේ පීනසට බේත් ටිකක්‌ කරගන්න වෙද මහත්තයෙක්‌ හොයා ගන්න ඕනේ කියනා වචන විවිධ තැන්වල නිතර නිතර අපට ඇසෙන කොට මේ පීනසට ප්‍රත්‍යක්‍ෂ වෙදකමක්‌ දේශීය වශයෙන් ඇතිබව අතිශයින් පැහැදිලි වේ. ඒ නිසා මේ පීනස ගැන කථා කරන්න සර්වාංග වෙදකමට දස්‌කම් දක්‌වන දැනට බියගම වෙදකම් කරන මල්වානේ වල්ගම වෙද පරපුරේ රුවන් දහනායක වෙදදුරු සමඟ පීනස ගැන කළ සාකච්ඡාවකි මේ.
අද පීනස මේ තරම් සමාජයේ බහුලව දකින්නට තියෙන රෝගී තත්ත්වයක්‌ වුණේ කොහොමද?
මම නම් හිතත්නේ පීනස අදට වඩා එදා රටේ බහුලව තියෙන්න ඇති කියලා. මම එහෙම කියන්නේ අපේ වෙදකම තුළ ප්‍රධාන වශයෙන් කැඩුම් බිඳුම් වෙදකමට දක්‍ෂයෝ, ඇස්‌ වෙදකමට දක්‍ෂයෝ, ගෙඩි වෙදකමට දක්‍ෂයෝ, මානසික රෝග වෙනුවෙන් ප්‍රතිකාර ක්‍රම, දැවුම් පිළිස්‌සුම්, හා ප්‍රතිකාර විධි ආදී වශයෙන් පාරම්පරිකව හඳුනා ගත් වෙදකම් සමඟ ඇතිවූ ප්‍රසිද්ධ වෙද පරම්පරාවන් තියෙනවා. එදා සමාජයේ තිබූ විවිධ රෝගී අවශ්‍යතාවයන් ඉටුකිරීමට ඒ වෙද පරම්පරාවල් පරම්පරා ගත වුණා. ඉතින් මේ පීනසටත් එහෙම ප්‍රසිද්ධ වෙද පරම්පරා ලංකාවේ තිබුණා. අදටත් ඒ පාරම්පරික වෙදකම මිනිසුන් අතරේ තියෙනවා. එහෙම වෙද පරපුරක්‌ බිහිවෙන තරමටම එදත් මේ පීනස බහුලයි. පරණයි.
එතකොට ඔය පීනසේ විවිධ වර්ග පැහැදිලි කළොත්?
පීනස එහි ඇතිවන රෝගී ස්‌වභාවය අනුව විවිධ වර්ගකිරීම් වලට යටත් වෙනවා. ඒක හැබැයි වෙද පරම්පරා අනුවත් විවිධාකාරයට වර්ගීකරණය වෙනවා. දේශීය වශයෙන් ගත්තාම මූලිකවම පීනස රෝග 18 ක්‌ තියෙනවා. ග්‍රහණි පීනස, ලය පීනස, මොළ ගන්ධ පීනස, ශ්ලේෂ්මජොර පීනස, පිත් පීනස, සෙම් පීනස, හොටු පීනස, පණු පීනස, නාග පීනස, ගල් පීනස, සුලංකණ්‌ඩ පීනස, කරුප්පුවාතිල් පීනස, පාණ්‌ඩු පීනස, අරමණ පීනස, තිත්තිර පීනස, අරබුද පීනස ආදී වශයෙන් විවිධ නම් වැටුනු පීනස සමහර පරම්පරාවල මීට වඩා වෙනස්‌ නම් වලින් හඳුන්වනවා. ඕක අපේ පාරම්පරික මතයයි. ආයුර්වේද මතානුකූලව ප්‍රභේද 5 ක්‌ යටතේ පීනස වර්ග කෙරෙනවා.
එතකොට ඔය පීනසට මූලික වශයෙන් තියෙන විශේෂ හේතු?
විශේෂයෙන් දෙමාපියන්ට පීනස ඇත්නම් දරුවන්ටද එය වැළඳීමට හැකියාවක්‌ තිබෙනවා. ඒ වගේම දෙමාපියන්ට ඇදුම, කුෂ්ඨ වැනි ලෙඩ ඇති විට දරුවන්ට පීනස වැළඳීමේ හැකියාව තිබෙනවා. ඊට අමතරව වර්තමාන කාර්යබහුල සමාජයේ ඇති රාජකාරි ස්‌වභාවය අනුව නිතර නිදි වැරීම, නිදි වැරීමෙන් පසු දියනෑම, දිය නෑමෙන් පසු හිස තෙත්ව පැවතීම, අධික සිසිල් ජලය පානය, මළ මුත්‍රාදී වේග දරාසිටීම ආදියත් නාස්‌ පුඩුවලට අධික ලෙස දූවිලි පිවිසෙන පරිසර වල සේවය කිරීමත් ප්‍රධාන වශයෙන් පීනස බහුල වීමට හේතුවක් වෙනවා. ඊට අමතරව අබ, විනාකිරි, අච්චාරු, ලුණුදෙහි, අන්නාසි වැනි ආහාර ගැනීමෙන් ඇතිවන ලේ විෂවීම්ද පීනසට හේතු වෙනවා.
ඔය අසාත්මිකතාවයන් නිසා පීනස ඇතිවන බව ඇත්තක්‌ද?
ඔව්, ඒක පාරිසරික අසාත්මිකතාවය මෙන්ම ආහාර අසාත්මිකතාවයත් වෙන්න පුළුවන්. ආහාර අසාත්මිකතාව නිසා හට ගන්නේ නම් ආහාරයක්‌ ශරීරගත වූ විට ආහාර මාර්ගය තුළ එය ජීර්ණය නොවී පවතින විට එය දිරවීමට ප්‍රතිදේහ ශරීරය විසින් නිපදවනවා. ඒක සිරුරේ සාමාන්‍ය තත්වයක්‌ නොවේ. මේක අධිසංවේදීතාවය මත ඇතිවන කරුණක්‌. අන්න එතකොට කුඩා අන්ත්‍රවලින් කිසියම් ද්‍රවයක්‌ උපදිනවා. ඒක තමයි අසාත්මික පීනසට මූලික වන්නේ. ඔය තත්වයට ආයුර්වේද මතානුකූලව නම් කායග්නිය දුර්වලවීම නිසා හට ගන්නව කියලා විස්‌තර කරනවා.
හිසකේ සුදුවීමත් පීනස නිසා වෙන්න පුළුවන්ද?
ඔව්, හැබැයි හැමෝගෙම නොවේ. අඩු වයසෙන් අකලට කෙස්‌ පැහීම පීනස නිසා වෙන්න පුළුවන්. පීනසේදී සෙම මූලික වුවත් ඔය කියන තත්ත්වය තුළ පිත මූලික වෙනවා. පිතේ ඇතිවන විවිධ විෂමාකාර තත්ත්ව තුළ ශරීරයේ ඌෂ්ණ ගුණය හෝ ඌෂ්මය ඉහට ගැහීමෙන් හිසකේ සුදුකර හෙළා දමනවා. ඒ නිසා ප්‍රධාන වශයෙන් නැතත් අප්‍රධානව ඔය පීනස හිසකේ සුදුකරන්න බලපෑමක්‌ ඇති කරනවා.
දියවැඩියාවටත් පීනස මූලික හේතුවක් වන්න පුළුවන්ද?
ඔව්, ප්‍රමේහ රෝග පීනසත් සමඟ යම් සබඳතාවයක්‌ දක්‌වනවා. ප්‍රමේහ රෝග 20 න් 10 ක්‌ම සෙම නිසා හටගත් ඒවානේ. අනෙක ආහාර මාර්ගයේ ඇතිවන ආහාර පැසවීමට උදව්කරන අග්නියේ දුර්වලතාවයත් පීනස නිසා හටගන්න පුළුවන්. මේ හේතු ගැන ගැඹුරෙන් සිතන කොට පීනස දිsයවැඩියාවටත් හේතුවක් විය හැකියි. ඇත්තෙන්ම ඔයවගේ ගොඩක් රෝග වලට පීනස හේතු වෙනවා. ඒනිසා තමයි ඔය රෝගය ඉතාම සංකීර්ණයි කියලා මුලින් කිව්වේත්. විශේෂයෙන් විදුරුමස්‌ දියවීම කාන්තාවන්ගේ ශ්වේත්‍ර ප්‍රධරය වැනි අවස්‌ථා ඇතිවීමට පීනස මූලික වෙන්න පුළුවන්.
මොකක්‌ද ආහාර පැසවීමයි පීනසයි අතර ඇති සම්බන්ධය?
පීනස මූලික වශයෙන්ම නාසය හා සම්බන්ධ රෝගයක්‌නේ. ආහාර මාර්ගයේ පහල කෙළවරට ගුදය කියනවානේ. ඒ ආහාර මාර්ගයේම ඉහළ කෙළවරනේ නාසය. ඔය කොන්දෙකේ ඇතිවන ලෙඩ ගොඩක් එක වගේමයි. නාසයෙන් නිතර දියර ගැලීම නිසා ඇතිවන තෙතමනය සමඟ නාසය අවහිර කරන මාංශ අර්බුද ඇතිවන්න පුළුවන්, හරියට මස්‌දලු වගේ. දේශීය වශයෙන් අප හඳුනා ගන්න සමහර කසාය බොහොමයක්‌ ඔය කොන් දෙකේ ඇතිවන ලෙඩවලට එකම කසාය තමයි යෙදෙන්නේ. ඒවා ගොඩක් කවිවලින් ලියවුන කසාය අතරේ පැහැදිලිව තියෙනවා. ඇත්තෙන්ම ආහාර මාර්ගයේ නිසි ලෙස ජීර්ණය වීමට අවශ්‍ය අග්නිය දුර්වලවීම නිසා නාසය ඇසුරු කරන ඉහළ අන්තයේ ඇති සෙම් කැලඹීමත් සමඟ නිතර කිවිසුම් යමින් නිතර දියර නාසයෙන් ගැලීම නිසා නාසය පිසදමමින් පීඩා විඳින බොහෝදෙනා පීනසට හේතු කාරණා ගැන දක්‌වන අඩු සැලකිල්ලත් මේ පීනස වර්ධනය වන්න හේතුවක් වෙනවා.
ඔබ කියූ පීනස නිසා ඇතිවන මස්‌දලු නැතිකරන්නේ කොහොමද?
ඒකට විශේෂයෙන් පාරම්පරිකව අප හදාගත්තු තෙල් වර්ග තියෙනවා. ඒ මස්‌දලුවල තෙල් ගානකොට හෙමිහිට හැකිලෙන්න පටන් ගන්නවා. ඊට අමතරව හිසකේ පෝෂණයට උදවු කරන පාරම්පරික වට්‌ටෝරු අනුව සකසාගත් සුදුසු තෙල් කිහිපයක්‌ භාවිතා කරනවා. හැබැයි ඒවා ආපහු නොඑන්න කසාය කිහිපයක්‌ බොන්න දෙන්න වෙනවා. එතකොට නිකන්ම ඔබ අග්නිය වර්ධනය වෙලා පීනස අපෙන් ඈත්වෙනවා. පීනසට ප්‍රතිකාර කරන එක ඒ තරම්ම අමාරු නෑ.
හිසට තෙල් දැම්මාම සෙම පපුවට බහිනවා කියනවා නේද?
නෑ. දියර ගලන පීනසටම ගැලපෙන තෙල් වට්‌ටෝරු වෙනම තියෙනවා. ඒ වගේම හිසකේ පෝෂණයට ඇති කරන අධික ලෙස සෙම් කෝපය ඇති නොකරන තෙල් වර්ග ඕනෑ තරම් පාරම්පරිකව වෙද මහත්තුරු ළඟ තියෙනවා. හරිහැටි රෝගී තත්වය හඳුනාගැනීමෙන් පසුකරනු ලබන නිවැරැදි ප්‍රතිකාරය තුළින් අනවශ්‍ය සෙම් කෝපයන් මගහරවා ගන්න පුළුවන්.
පීනසට අහිතකර දේ විදිහට ඔබතුමා දකින්නේ මොනවාද?
විශේෂයෙන්ම ඉතා සිසිල් ආහාර නිතර ආහාරයට ගැනීම, අබ, විනාකිරි, අච්චාරු, ලුණුදෙහි, අන්නාසි වැනි ආහාර නිතර අනුභවය, නිතර නිදි වැරීම, පිණිබෑම හා දහවල් නින්ද ආදියෙන් වැලකුනොත් පීනස ඔබට වධයක්‌ වෙන එකක්‌ නැහැ.
උපුටා ගැනීම දිවයින
