ඇතැම් ආහාර නිසා ඖෂධවල ගුණ හීන වී යන්නට පුළුවන්. මත්පැන් බී ඖෂධ පානය කොහෙත්ම හොඳ නෑ

සුනිල් ඇදුම රෝගියෙක්. ඇදුම ඇති වූ අවස්ථාවලදී ඔහු ක්ලෝම නාල(පෙනහැල්ලට වාතය ගෙන යන සහ ආපසු ගෙන එන ශ්වාස නාල) පුළුල් කරන විස්තාරක ඖෂධ ගැනීම ඔහුගේ සිරිතක්. එහෙත් සුනිල්ට මිදිය නොහැකි පුරුද්දක් තිබුණා. ඒ නම් දවසකට කෝපි කෝප්ප 3-4 ක් පානය කිරීම. ඛෙහෙත් ගත්තද ගුණයක් නැති තැන සුනිල් නැවතත් වෛද්‍යවරයෙක් හමු වුණා. සුනිල්ගේ කෑම බීම ගැන සොයා බැලූ වෛද්‍යවරයාගේ අදහස වුණේ කෝපි පානය දවසකට එක කෝප්පයකට සීමා කළහොත් ඛෙහෙත්වල ගුණය සුනිල්ට නිසැකවම ලැඛෙණු ඇති බවයි.

කෝපි - චොකලට් - කෝලා 

කෝපි පමණක් නොව චොකලට්, කෝලාපාන වැනි කැෆෙන් අඩංගු ආහාරපාන ගැනීම නිසා ක්ලෝම විස්තාරක (ඇදුමට ලබාදෙන) ඖෂධවල ක්‍රියාකාරීත්වය පසුබැස්සවීමට සමත්. එසේම මානසික රෝග සඳහා ලබාදෙන සමහර ඖෂධවල ගුණය අඩු කිරීමටද කැෆෙන් වලට හැකියාව ඇත.

පෙර සකස් කළ චීස්, හරක් මස් ඇතුළු ආහාරත් අහිතකරයි.

පෙර සඳහන් කළ කැෆෙන්වල වගේම කල්ගත වූ ආහාර, අච්චාරු - චට්නි ලෙස සකස් කළ ආහාර, පැසවිම මගින් සකස් කළ ආහාරවල ස්වභාවයෙන්ම ඇතිවන ද්‍රව්‍යයක් ලෙස ටිරමීන් හැඳින්විය හැකියි. විශේෂයෙන්ම ප්‍රොසෙස්ඩ් චීස් කාලයක් පැවති විට වගේම පෙර සකස් කළ හරක් මස්, කුකුල් මස්, පීකදු, වියළි සොසේජස්, වෙනත් මස් නිෂ්පාදන තුළ මේ ටිරමීන් පැවතිය හැකියි. එසේම කෙසෙල් ගෙඩි, වියළි මිදි හා වෙනත් වියළි පලතුරු පමණ ඉක්මවා ඉදුණු පලතුරු තුළත් ටිරමීන් රසායනිකය දැකිය හැක. මේ ටිරමීන් අගුණ වන්නේ ඔබ ප්‍රතිජීවක (ඇන්ටිබයෝටික්ස්) ඖෂධ සහ ප්‍රති - විෂාදීය ඖෂධ (මානසික අවපීඩන තත්ත්වයෙන් මිදීමට ලබන ඖෂධ) ගන්නේ නම් බව මතක තබා ගැනීම වැදගත්.

සුදුළූණු හා ඉගුරු

සුදුළූණු හා ඉගුරු බොහෝ ගුණ ඇති ශාකමය ඖෂධ බව ඇත්තය. එහෙත් ඒවා පමණක් නොව තවත් ශාකමය ඖෂධ රාශියක්ද සමහර බටහිර ඖෂධවල ක්‍රියාකාරීත්වය හා ගැටෙන බව හෙළිව තිඛෙනවා. විශේෂයෙන්ම වොර්ෆරින් නම් රුධිරය කැටි ගැසීම වැළැක්වීමට ලබාදෙන ප්‍රති කැටිකාරක ඖෂධයේ ක්‍රියාකාරීත්වයට හරස් වීමට පුළුවන.

ජින්ග්සෙන්ග්

ශ්‍රී ලංකාවේද සමහරු විවිධ ප්‍රාතිහාර්යමය ගුණ සොයා ජින්ග්සෙන්ග් භාවිත කරන බව පෙනෙයි. වොර්ෆරින් වැනි ප්‍රති කැටි කාරක ඖෂධ ගන්නා විටදී රුධිර ගලනයක් ඇතිවීමේ අවදානමක් ඇති කිරීමට ඒ සමත්. ඒ වගේම ඉබුප්‍රොෆෙන් වැනි වේදනා නාශක ඖෂධ ගත් විටත් එම ඉරණම අත්කර දිය හැකියි. එපමණක් නොව සමහර ප්‍රති - විෂාදීය ඖෂධ (ඇන්ටි - ඩිප්‍රසෙන්ට්) ඖෂධ ගත් විටදීද එමගින් ඇතිවිය හැකි අතුරු ආබාධ ඉහළ දැමීමටද ජින්ග්සෙන්ග් වලට හැකියි.

ජින්කෝ බිලෝබා

සමහර පුද්ගලයන් තම මතකය ඉහළ නංවා ගැනීමට මෙම ශාකමය නිෂ්පාදනය ගැනීම දැකිය හැකියි. එහෙත් වලිප්පුව, අපස්මාරය ආදී රෝග තත්ත්වයන්ට ලබාදෙන ඖෂධවල කාර්යක්ෂමතාව පහළ හෙළීමට ඉඩ තිඛෙනවා. තවත් ඖෂධ ගණනාවක හැකියා සිඳලීමට එය සමත් නිසා යම් ලෙසකින් ඔබ ජින්කෝබිලෝබා ගන්නේ නම් වෛද්‍යවරයාට ඒ බව පැවසීම ඔබේ යුතුකමක්.

පොටෑසියම් බහුල ආහාර

කෙසෙල් ගෙඩි, දොඩම්, තද කොළ පැහැ, එළවළු සහ සමහර ලුණු වර්ග තුළ පොටෑසියම් විශාල වශයෙන් අඩංගුය. අධි රුධිර පීඩනය පාලනය සඳහා සහ වෙනත් රෝග තත්ත්වයන් සඳහා ලබාදෙන කැප්ටොපි‍්‍රල් ඇතුළු ඖෂධ ගන්නා විට පොටෑසියම් අධික ආහාර ගත්විට රුධිරයේ අඩංගු පොටෑසියම් ප්‍රමාණය පමණ ඉක්මවා ගොස් අනතුරු ඇති කළ හැකියි.

විටමින් කේ බහුල ආහාර

ගෝවා කුලයේ එළවළු (මල් ගෝවා, ගෝවා ඇතුළු) සහ පලා වර්ග තුළ විටමින් කේ බහුලය. වෝෆරින් ප්‍රති කැටි කාරක ඖෂධය සතු හැකියාව අඩු කිරිමට මේ ආහාර සමත් බව මතක තබා ගැනීම වැදගත්.

ගුණ වැල්මී අගුණ වන වෙලාව

වැල් මී ඖෂධයක් මෙන්ම සමහර ආහාර වර්ග රස ගැන්වීමටද යොදා ගනියි. හෘදය රෝගීන් සඳහා ලබාදෙන ඩිජොක්සින් නම් ඖෂධය ලබන රෝගීන්ගේ හද ගැස්ම අක්‍රමවත් කිරීමට මෙන්ම සමහරවිට හෘදයාබාධයක් කුළු ගැන්වීමටද එය සමත්. එසේම හයිඩ්‍රක්ලෝරෝතයසයිඩ් සහ ස්පයිරනෝලැක්ටෝන් වැනි රුධිර පීඩනය පහළ පෙළීමට සහ මුත්‍ර කාරක වශයෙන් ලබාදෙන ඖෂධවල බලපෑම අඩු කිරීමටද වැල්මී හා වැල්මී තුළ අඩංගු ද්‍රව්‍ය සමත්ය.

ග්‍රේප් පෘට් බොහෝ ඖෂධවල බලය හීනකරයි

ග්‍රේප්පෘට් තුළ අඩංගු නැරින්ජින්, ෆුරනෝකියුමරින්ස් සංයෝග (මේවා දෙහි, සහ නාරං, ඇඹුල් දොඩම් තුළද අඩංගුය. එහෙත් පැණි දොඩම් තුළ නැත.) වැනි රසායනික බොහෝ ඖෂධවල ඖෂධ ගුණයට හානි කිරීමට සමත්ය. විශේෂයෙන්ම ස්ටැටින් ගණයේ කොලෙස්ටරෝල් පහළ හෙළන ඖෂධවල ක්‍රියාකාරීත්වය වැඩි කිරිමට සමත් වූවද, ආමාශ ආන්ත්‍ර පටල තුළින් රුධිර ගලනය ඇති කිරීමට, පේශි තන්තු හානි කිරීමට සමත් බව හෙළිකර ගෙන ඇත. මෙම ක්‍රියාව වකුගඩු කෙරෙහිද අහිතකර ලෙස බලපායි. හෘදය රෝගීන් සඳහා ලබාදෙන ඖෂධ අන්තර් ක්‍රියා කිරීමට මෙන්ම ඖෂධ බොහෝ ගණනාවක ඖෂධීය ශක්තිය හීන කිරීමට ග්‍රේප් ෆෘෘට් සමත් බව පිළිගැනෙයි.

මත්පැන් බී ඖෂධ පානය කොහෙත්ම හොඳ නෑ

ඖෂධ සමඟ මත්පැන් ශරීර ගතවීම නිසා හානිකර තත්ත්වයන් ඇති වීමට ඇති ඉඩකඩ බොහෝය. පැරසිටමෝල් වැනි වේදනා නාශක, ප්‍රති - හිස්ටමීන ඖෂධ, වෝෆරින් වැනි ප්‍රති - කැටි කාරක ඖෂධ මෙන්ම ඇදුමට ලබාදෙන ඖෂධ, කොලෙස්ටරෝල් අඩු කිරීමට සඳහා ලබාදෙන ස්ටැටින් වර්ගයේ ඖෂධ, කොඩේන් වැනි මත්ගතිය ඇති කරන වේදනා නාශක, ඇතුළු ඖෂධ අති විශාල සංඛ්‍යාවක ක්‍රියාකාරීත්වයට හා කාර්යක්ෂමතාවට හරස් වීමට මත්පැන් සමත්ය.

තුසිත මලලසේකර

උපුටා ගැනීම දිනමිණ පුවත් පත