ක්‌ෂය රෝගය පැතිරෙන්නේ කොහොමද?
ක්‌ෂය රෝග බැක්‌ටීරියාව සහිත ක්‌ෂය රෝගියෙකු කහිනවිට, කිවිසුම් යවන විට, සිනාසෙන විට, කතා කරන විට, මෙම බැයිලසය කෙළ බිඳිති සමඟ අවට වාතයට එකතු වේ. එම පුද්ගලයා සමඟ සමීප සම්බන්ධතා පවත්වන නිරෝගී අය මෙම බිදිති සහිත වාතය ආශ්වාස කිරීමෙන් අනෙක්‌ අයටත් රෝගය ආසාධනය වේ. රෝගියෙක්‌ නිසියාකාරව ප්‍රතිකාර ලබාගන්නා තෙක්‌ මෙලෙස රෝගකාරක පතුරවා හරියි. රෝගියා සමඟ ජීවත්වෙන අනෙක්‌ අය වන නිවසේ අයටත්, අසල්වාසින්ටත්, සේවා ස්‌ථානයේ සහෝදර සහෝදරියන්ටත්, මඟතොට හමුවන අයටත් රෝගකාරකයෙන් ආසාදනය වීමේ අවදානම ඇත. මෙසේ ආසාදනය වන පුද්ගලයන්ගෙන් සියයට දහයක්‌ ක්‌ෂය රෝගින් බවට පත්වේ. ප්‍රතිකාර නොගන්නා ක්‌ෂය රෝගියෙකු විසින් එක්‌ වසරකදී ආසාදන කරන නිරෝගි පුද්ගලයින් සංඛ්‍යාව 10-15 ක්‌ අතර වේ.
රෝග කාරක ශරීර ගත වූ බොහොමයක්‌ දෙනා රෝග ලක්‌ෂණ නොපෙන්වා ජීවත් වේ. සක්‍රිය ක්‌ෂය රෝගියෙක්‌ බවට පත් නොවී ක්‌ෂය රෝගයේ රෝග ලක්‌ෂණ නොපෙන්වන මෙම අවස්‌ථාව ක්‌ෂය රෝග ආසාදන තත්ත්වය වේ. නොයෙක්‌ හේතුන් මත ශරීරයේ ප්‍රතිශක්‌තිය දුර්වලවීමෙන් ආසාදිත තත්ත්වය රෝගි තත්ත්වයක්‌ බවට පත්වේ.
විශේෂයෙන් ම ක්‌ෂය රෝගය වැළඳීමේ ප්‍රවණතාවය වැඩිවිය හැකි වන්නේ.., පුද්ගලයෙකුගේ ශරීරයේ ප්‍රතිශක්‌තිය අඩුවිය හැකි අවස්‌ථාවලදී යි. වයස්‌ ගත භාවය, අධික ලෙස මත් පැන්, දුම් බීම, මත්ද්‍රව්‍ය භාවිතා කරන විට, මානව ප්‍රතිශක්‌ති ඌණතා වයිරසය ආසාදන පුද්ගලයෙක්‌ වූ විට, මන්ද පෝෂණ තත්ත්ව වලදී, දියවැඩියා රෝගින්ට, පිළිකා සඳහා ඖෂධ ප්‍රතිකාර ගන්නා විට, පිළිකා රෝගවලින් පෙළෙන සරම්ප කක්‌කල් කැස්‌ස වැනි ආසාදන වලින් පෙළෙනවිට , නිසි වාතාශ්‍රයක්‌ නොමැති බන්ධනාගාර කඳවුරු, අනාථ කඳවුරු වල ජීවත් වන විටයි.
කෙනෙකුට ක්‌ෂය රෝගය හරියට ම තිබෙනවාදැයි හඳුනා ගැනීම සඳහා වෛද්‍යවරුන් විසින් සෙමපටල පරීක්‌ෂාව , X - කිරණ පරික්‌ෂාව, ටියුබකියුලින් හෙවත් මාන්ටෝ පරික්‌ෂාව, පටක විශ්ලේෂණ, සෙම පටක හෝ වෙනත් ශ්‍රවයන් වල විෂබීජ වගාවන් කිරීම මගින් හරියටම රෝග තත්ත්වය නිර්නය කිරීමට වෛද්‍යවරු පෙළඹී සිටී.
ක්‌ෂය රෝගය සඳහා නිසි ප්‍රතිකාර කිරීමෙන් නිට්‌ටාවට සුවකළ හැකියි. ප්‍රතිකාර සඳහා ක්‌ෂය රෝගකාරකය විනාශ කළ හැකි ප්‍රතිජීවක ඖෂධ භාවිතා කිරිම කළ යුතුයි. නිවැරදි ප්‍රතිජීවක ඖෂධ නිවැරදි මාත්‍රාවෙන් නියමිත කාලය තුළ දී නොකඩවා ගැනීමෙන් ක්‌ෂය රෝගය සම්පූර්ණයෙන් (නිට්‌ටාවට) සුවකර ගත හැකි බව ඔබ දන්නවාද? ඒ සඳහා එක ක්‌ෂය රෝගියෙක්‌ මාස හයක්‌වත් නොකඩවා ප්‍රතිකාර දිනපතා ගත යුතුයි. ඒත් එක්‌ ක්‌ෂය රෝගියෙකු පරික්‌ෂා කර බලා වෛද්‍යවරයා විසින් තීරණය කරයි. මුල් වරට ඖෂධ ලබාගන්නා රෝගියෙකු මුල් මාස දෙක සඳහා ඖෂධ වර්ග හතරක්‌ද අවසන් මාස හතර සඳහා ඖෂධ වර්ග දෙකක්‌ ලබාදේ. මෙහි විශේෂත්වය වන්නේ ක්‌ෂය රෝගයට ලබාදෙන සියලු ඖෂධ වර්ග රජයේ ඖෂධ මධ්‍යස්‌ථානවලින් නොමිලේම ලබාගත හැකි වීමයි. විශේෂයෙන් මෙතනදී දැනුවත් කිරිම සහ දැනුවත්වීම ඉතා වැදගත් වෙනවා. ගෝලීය තත්ත්වය ගැන කතා කිරිමේදී ශ්‍රී ලංකාවේ ක්‌ෂය රෝග තත්ත්වය ගැන වර්තමානය සතුටු විය හැකියි.
සෞඛ්‍ය අධ්‍යාපන කාර්යාංශයේ පැවති ක්‌ෂය රෝගය පිළිබඳව දැනුවත් කිරීමේ වෛද්‍ය දේශන ඇසුරිණි.
උපුටා ගැනීම නවලිය
.jpg "පැටිස්")
