මළ අක්‍රමව පිට වීමට බලපාන හේතු
- සාමාන්‍යයෙන් නිරෝගී පුද්ගලයකුට දිනකට මළපහ පිටවීම වාර දෙකක්‌ හෝ තුනක්‌ සිදුවිය යුතුයි.
- නමුත් කිසියම රෝග තත්ත්වයක පවතින විට එම රෝගයේ ලක්‌ෂණයක්‌ ලෙස මළ පිට වීම අක්‍රමවත් වේ.
- ඇතැම් අයට මළ පිට වුවත් එය තෘප්තිමත් කාර්යයක්‌ නොවන ලෙසට සිදුවීම සහ මළ පිට වන්නට මෙන් දැනුණ ද නිසි පරිදි මළ පිට නොවීම වැනි ලක්‌ෂණ දැකිය හැකිය.
අප සෑම කෙනකුගේම දිනපතා දින චර්යාවේ එක්‌ අංගයක්‌ව ඇත්තේ මළපහ කිරීමය. එක්‌ දිනක්‌ මළපහ කිරීමට නොහැකි වුවහොත් බොහෝ දෙනා තුළ මහත් අපහසුතාවක්‌ හටගනී. එම දින ගණන දෙකක්‌ තුනක්‌ හෝ ඊට වැඩි වුවහොත් ඇති වන අපහසුව ද දෙගුණ තෙගුණ වේ. මෙවැනි අවස්‌ථාවලදී ඔවුන්ට සිහියට නැඟෙන්නේ තමාට මළබද්ධය මතුව ඇති බවකි. වර්තමානයේ මෙලෙස අක්‍රමවත් මළපහ කිරීමේ තත්ත්වයට ගොදුරු වූවෝ අතිවිශාල පිරිසක්‌ සිටිති. ඔවුන් සියලු දෙනාට මතුව ඇත්තේ මළ බද්ධය රෝගයද? ඒ ගැන අපි මෙවර විමසා බලමු.
වෛද්‍යතුමනි, වර්තමානයේ බහුතරයකට පවතින අක්‍රමවත් මළපහ කිරීමේ තත්ත්වය පිළිබඳව පැහැදිලි කිරීමක්‌ කළ හැකිද?
සාමාන්‍යයෙන් නිරෝගී පුද්ගලයකුට දිනකට මළපහ පිටවීම වාර දෙකක්‌ හෝ තුනක්‌ සිදුවිය යුතුයි. එය කරදරකාරී තත්ත්වයකින් තොරව සිදු වනවා නම් ඉතා යහපත් තත්ත්වයකි. නමුත් කිසියම රෝග තත්ත්වයක පවතින විට එම රෝගයේ ලක්‌ෂණයක්‌ ලෙස මළ පිට වීම අක්‍රමවත් වේ. එහිදී සිදු වන්නේ මළ පිට වීම දිනපතා සිදු නොවීම හෝ අක්‍රමවත් ලෙස විටින් විට මළ බුරුල්ව නිතර පිටවීමයි. එමෙන්ම ඇතැම් අයට මළ පිට වුවත් එය තෘප්තිමත් කාර්යයක්‌ නොවන ලෙසට සිදුවීම සහ මළ පිට වන්නට මෙන් දැනුණ ද නිසි පරිදි මළ පිට නොවීම වැනි ලක්‌ෂණ දැකිය හැකියි. මේ සියලුම අවස්‌ථා රෝගයක ලක්‌ෂණයක්‌ විය හැකියි.
වෛද්‍යතුමනි මළ බද්ධයේදී සිදුවන්නෙ කුමක්‌ද?
මුල් කාලයේදී කෙටිකාලීනව දිනපතා මළ පිට නොවීම පෙන්නුම් කරන අතර එයට හේතුව රෝගයක්‌ නම් ඊට නිසි පිළියම් නොකළහොත් කල්යත්ම දින 2, 3, 4, 5 ආදී වශයෙන් සතියක දෙකක්‌ දක්‌වා ද මළ පිට නොවීම මෙහිදී සිදු වෙයි.
වෛද්‍යතුමනි, මෙවැනි අවස්‌ථාවලදී ඇති වන රෝග ලක්‌ෂණ මොනවාද?
මෙවැනි අවස්‌ථාවලදී බඩ පුරවා දැමීම, වාතය පිට වීම, නොරිස්‌සුම් සහගත බව මුඛයෙන් දුඟදක්‌ හැමීම, හිසේ කැක්‌කුම මුහුණේ ප්‍රසන්න බව නැති වී අඳුරු පැහැ වීම සම දුර්වර්ණ වීම, සමේ කැසීම් වැඩි වීම සහ තුනටිය හන්දිපත් වේදනාව වැනි ලක්‌ෂණ දැකගත හැකියි. මෙවැනි අවස්‌ථාවලදී ද නිසි පිළියම් නොකළහොත් ආයුර්වේද වෛද්‍ය විද්‍යාවට අනුව හටගන්නා වූ මහා රෝග කාණ්‌ඩයට අයත් අර්ශස්‌ බගන්ධරා වැනි තත්ත්වයන් ද හටගත හැකියි. ඊට අමතරව පීනස, වාතරක්‌ත සහ කුෂ්ඨ රෝග වැනි තත්ත්වයන්ද දියවැඩියා රෝගය ද මතුවීමේ අවදානමක්‌ පවතී.
වෛද්‍යතුමනි මළ බද්ධය ඇති වීමට බලපාන හේතු මොනවාද?
වර්තමානයේ නම් ආහාර රටාව මේ සඳහා කෙලින්ම බලපෑ හැකියි. මෙහිදී ගැස්‌ට්‍රයිටිස්‌ වැනි ජීර්ණ පද්ධතිය ආශ්‍රිත රෝගවලට නිසි පිළියම් නොකිරීම ප්‍රධාන හේතුවක්‌ බවට පත්ව ඇත. ඊට අමතරව අවේලාවේ අධික ලෙස ආහාර ගැනීම, කෘත්‍රීම ආහාර රටාවකට හුරු වීම වැනි කාරණා කුඩා දරුවන්ට ද මෙම තත්ත්වය ඇති කිරීමට හේතු වී ඇත.
වෛද්‍යතුමනි, මල බද්ධය ඇති වීමට ප්‍රධාන ලෙස බලපාන ආහාර වර්ග මොනවාද?
කෝපි, චොක්ලට් වැනි උෂ්ණාධික ආහාර, පාන් පිටි මිශ්‍ර ආහාර බහුලව ගැනීම සහ අධික ආම්ලික ආහාර වර්ග වන විනාකිරි මිශ්‍ර ආහාර, ගොරකා, අන්නාසි, තක්‌කාලි වැනි උෂ්ණ ගුණයෙන් යුතු ආහාර මේ සඳහා ප්‍රධාන හේතුවක්‌ වී ඇත.
වෛද්‍යතුමනි, මල බද්ධය දුරු කර ගැනීමේ ක්‍රමවේදය කුමක්‌ද?
මෙම තත්ත්වය මතුව ඇත්තේ ආහාර රටාවේ ප්‍රශ්නයක්‌ නිසා නම් ආහාරවලට බහුල වශයෙන් කෙඳි සහිත ආහාර වන අල, බතල, කොස්‌. පොළොස්‌, කෙසෙල් මුව, කෙසෙල් බඩ, කොහිල, පලා වර්ග, එළවළු සහ ඉදුනු පලතුරු වැඩි වශයෙන් ආහාරයට එක්‌ කර ගත යුතුය. මෙවැනි ආහාර වර්ග ගැනීමෙන්ද තවදුරටත් මලබද්ධය පවතින්නේ නම් එය ආහාර ජීර්ණයේ දුරවලතාවක්‌ හෝ කිසියම් රෝගයක ලක්‌ෂණයක්‌ විය හැකි බැවින් නිසි වෛද්‍ය උපදෙස්‌ මත ප්‍රතිකාර ලබාගත යුතුය.
වෛද්‍යතුමනි, ආයුර්වේද වෛද්‍ය ක්‍රම අනුව මේ සඳහා ප්‍රතිකාර කරන ක්‍රමය කුමක්‌ද?
මෙහිදී මූලික වශයෙන් විශේෂ රෝග තත්ත්වයක්‌ පවතී ද යන්න සලකා බලා එයට අවධානය යොමු කර ප්‍රතිකාර ආරම්භ කරයි. බොහෝ විට රාත්‍රි කාලයේදී පහසුවෙන් භාවිතා කළ හැකි ආහාර ජීර්ණයේ දුර්වලතා මඟ හරවන ඖෂධ භාවිතය තුළින් දිනපතා උදේ කාලයේදී පහසුවෙන් මල පිට වන්නට සලස්‌වයි. එවිට කුමන රෝග තත්ත්වයක පැවතුනද මල බද්ධ තත්ත්වයේදී අප මුලින් කියූ හිසේ කැක්‌කුම්, නොරිස්‌සුම් සහගත බව, ශාරීරික වේදනා සහ ලක්‌ෂණ ක්‍රමයෙන් බැහැර වන මුඛයේ දුර්ගන්ධය වැනි රෝග බැවින් රෝගියාට ඉතා සැනසිලි දායක තත්ත්වයක්‌ සහ ශරීරයට සැහැල්ලු බවක්‌ ඇති වේ.
උපුටා ගැනීම දිවයින
