කැස්‌සට සිරප් වෙනුවට චොක්‌ලට්‌
කැස්‌ස සඳහා නිර්දේශිත සිරප් වර්ගවලට වඩා කිරි රසැති චොක්‌ලට්‌ කැබැල්ලකට කැස්‌ස සමනය කිරීමේ හැකියාව පවතින බව එංගලන්තයේ හල් විශ්වවිද්‍යාලයේ හෘද රෝග හා ශ්වසන අධ්‍යයනයන් පිළිබඳ අංශයේ ප්‍රධානියා වන මහාචාර්ය ඇලින් මොරිස්‌ පවසයි. යුරෝපයේ පවත්වන ලද විශාල අධ්‍යයනයක ප්‍රතිඵලයට අනුව චොක්‌ලට්‌ යොදා බෙහෙත් ලබා ගත් රෝගීන් 163 දෙනකුගේ කැස්‌ස දින දෙකක්‌ තුළදී සෑහෙන ප්‍රමාණයකින් අඩු වූ බව මහාචාර්ය මොරිස්‌ පෙන්වා දෙයි. කැස්‌ස පිළිබඳව වසර ගණනාවක්‌ පර්යේෂණ පවත්වා ඇති මහාචාර්යවරයාට අනුව ඉදිරියේදී කැස්‌ස සඳහා ප්රතිකාර කිරීමට චොක්‌ලට්‌ අඩංගු නව බෙහෙතක්‌ නිපදවීමේ අවශ්‍යතාවක්‌ පැන නැගී තිබේ.
මෙය චොක්‌ලට්‌ කැස්‌ස සමනය කරන බව අනාවරණය කරගත් ප්‍රථම අධ්‍යයනය නොවන අතර මෙයට පෙර ලන්ඩනයේ ඉම්පීරියල් විදුහලෙහි පර්යේෂකයන් පිරිසක්‌ විසින් චොක්‌ලට්‌ නිපදවීමට යොදා ගන්නා කොකෝවා තුළ පවතින "තියෝබ්‍රෝමයින්" ද්‍රව්‍යයට කැස්‌ස සමනය කිරීමට ඇති හැකියාව වත්මන් කැස්‌ස සඳහා දෙන සිරප්වල අඩංගු තොඩේන් නමැති ද්‍රව්‍යයට වඩා වැඩි බව හෙළිදරව් කර තිබේ. චොක්‌ලට්‌වලට කැස්‌ස සමනය කිරීමේ හැකියාව ලැබී ඇත්තේ එහි ඇති ඇලෙනසුලු ස්‌වභාවය මත උගුරෙහි ස්‌නායු මත තරලයක්‌ පිහිටුවීම නිසා කැස්‌ස ඇති කිරීම වළක්‌වාලීමට හැකි වීමෙන් බව යෑයි මහාචාර්යවරයා කියයි. චොක්‌ලට්‌ අනුභව කරනවාට වඩා චොක්‌ලට්‌ අඩංගු බෙහෙතක්‌ කැස්‌ස සඳහා නිපදවිය යුතු බව ඔහු කියා සිටී.
