මොනවද මේ කර්ණරෝග
ශ්‍රී ලංකාව තුළ ENT රෝග එනම්, උගුර කණ නාසයට සම්බන්ධ රෝග
දිනෙන් දින වර්ධනය වනවා. මෙයිනුත් කනේ රෝගවල විශාල වර්ධනයක්‌
පෙන්නුම් කරනවා. කර්ණ ආසාදනයක්‌ කියන්නේ මොකක්‌ද?බටහිර විද්‍යාවට අනුව කර්ණ ආසාදනයක්‌ කියන්නේ කන් බෙරයට පසුපසින් පිහිටි මැද කන කොටස වෛරස්‌ ආසාදනයකට ලක්‌ වීමයි. මෙය තමයි කනේ රෝග අතුරින් බහුලතම රෝගය. මෙය ඉතාම වේදනාකාරී රෝග තත්ත්වයක්‌. එයට හේතුව බැක්‌ටීරියා වර්ධනය නිසා කන තුළ ඇතිවන ප්‍රදාහ තත්ත්වය සහ එය තුළ වර්ධනය වන දියර නිසා ඇති වන පීඩනයයි. කනේ හටගන්නා ආසාදන නිදන්ගත හෝ උග්‍ර තත්ත්වයක්‌ පැවතිය හැකියි. උග්‍ර කර්ණ ආසාදන ඉතාම වේදනා සහගත වුණත් කෙටි කාලීනයි. නිදන්ගත කර්ණ ආසාදන දිගු කාලීනයි. ඒවා විටින් විට මතුවෙනවා. යළි යට යනවා. නිදන්ගත කර්ණ රෝග මගින් ඇතුළු කනට සහ පිට කනට සිදුවන හානි යළි සුව කරන්න බැරි තරමට බරපතළ විය හැකියි.
කර්ණ ආසාදනයක්‌ හට ගන්නේ කොහොමද?කර්ණ ආසාදනයක්‌ හට ගන්නේ යුස්‌ටේකීය නාලය නමැති කොටස ඉදිමීම සහ අවහිර වීම නිසා බවයි බටහිර වෛද්‍ය විද්‍යාත්මක මතය. මේ අවහිර වීම තුළදී කනේ දියරයක්‌ හට ගන්නවා.
යුෂ්ටේකීය නාලය කියන්නේ මොකද්ද?මේවා ඉතා කුඩා නාල විශේෂයක්‌. කනේ සිට දිවේ පසුපස කොටස දක්‌වා මේ නාල යනවා. යුස්‌ටේකීය නාල අවහිර වීමට හේතු ලෙස බටහිර වෛද්‍යවරන් දක්‌වන හේතු මෙසේයි.
1. අසාත්මිකතා
2. ප්‍රතිශ්‍යාව
3. පීනස/ කෝටරක ප්‍රදාහය නිසා ඇතිවන ආසාදන
4. අතිරික්‌ත සෙම හට ගැනීම
5 දුම් බීම.
6. සෙම් ගෙඩි ආශ්‍රිතව තිබෙන පටක හානි කර බැක්‌ටීරියාවලින් ආසාදනය වීම.
7. වායු පීඩනය වෙනස්‌ වීම.
කර්ණ ආසාදනය මගින් හට ගන්නා අවදානම කුමක්‌ද?කර්න ආසාදන බොහෝ විට හට ගන්නේ කුඩා ළමයින් තුළයි. එයට හේතුව ඔවුන්ගේ යුස්‌ටේකීය නාල ඉතා පටු වීමයි. එසේම සඳහන් කළ යුතු තවත් වැදගත් කාරණයක්‌ වන්නේ මවුකිරි බොන දරුවන්ට වඩා කර්ණ ආසාදන වැඩි ප්‍රමාණයක්‌ බෝතලයෙන් කිරි බොන දරුවන්ට ඇති වන බවයි. කර්ණ ආසාදන හට ගැනීමට තවත් හේතු කිහිපයක්‌ තිබෙනවා. එනම්,
1. තමන් ජීවත්වන පරිසරයට වඩා වැඩි මුහුදු මට්‌ටමක තිබෙන පරිසරයක ජීවත් වීමට සිදුවීම.
2. දේශගුණික වෙනස්‌කම්.
3. සිගරැට්‌ දුම්වලට නිරාවරණය වීම.
කර්ණ ආසාදනයක රෝගලක්‍ෂණ වේදනාව හට ගැනීම විතරද?1. කන තුළ වේදනාවක්‌ හට ගැනීම සහ අපහසුවක්‌ ඇතිවීම.
2. කන තුළ පීඩනයක්‌ තිබෙන බව වැටහීම.
3. කනේ සැරව වැනි දියරයක්‌ ගැලීම.
4. ඇසීම නැතිව යැම.
කර්ණ රෝග පිළිබඳ ආයුර්වේද මතය මොකක්‌ද?
කන කියන ඉන්ද්‍රියේ කොටස්‌ තුනක්‌ තිබෙනවා. එනම් බාහිර කන, මැද කන, ඇතුල් කන යන කොටස්‌. ආයුර්වේදයේ තිබෙනවා හතරවන කොටසකුත්. මේ කොටස තමයි කන පිටත කොටස හෙවත් කන් පෙත්ත සහ එය සමඟ සම්බන්ධ වන කොටස. ඒ අනුව කන් පෙත්ත ආශ්‍රිත රෝග හෙවත් කර්ණපාලි රෝග කියලා. ඔබ මෙහිදී මතක තබා ගත යුතුයි අප අනුගමනය කරන්නේ සුශ්‍රැත ආචාර්යවරයාගේ ආයුර්වේද න්‍යාය සහ ක්‍රම. ඒ ආචාර්යවරයාගේ මතයට අනුව කර්ණ රෝග 28 ක් තිබෙනවා. ඒවා කණේ පෙර කී තුන් කොටසේ හට ගන්නා රෝග. ඒවායින් වඩාත් සුලභ රෝග කිහිපයකුත් තිබෙනවා. එනම්,
1. කන්වලින් දියර ගැනීම. මෙය සැරව ලෙසත් සුදු පැහැති ද්‍රාවණයක්‌ ලෙසත් ගලනවා. ආයුර්වේදයේ මෙය හඳුන්වන්නේ පූතිකර්ණ කියලා.
2. ඊළඟ රෝග තත්ත්වය තමයි ඇසීමේ දුර්වලතා ඇති කරන රෝග. එනම් ශ්‍රවණාබාධ. එය හඳුන්වන්නේ කර්ණ බාධිර්යය කියලයි.
3. ඒ අතර සමහර රෝගීන් ඇවිත් පැමිණිලි කරනවා මගේ කණේ විවිධ ශබ්ද ඇහෙනවා කියලා. සමහරු කියනවා නිතරම කන තුළින් හෝ හෝ ගාන ශබ්ද එනවා කියලා. තව සමහරු කියනවා බටනලාවක හඬක්‌ වගේ එක දිගට ශබ්දයක්‌ එනවා කියලා. මෙය ඉතාම ප්‍රචලිත රෝග තත්ත්වයක්‌. අප මෙය හඳුන්වන්නේ කර්න නාද කියලයි. මේ රෝගයේම තවත් ස්‌වරූපයක්‌ තිබෙනවා. ඒ ස්‌වරූපය හඳුන්වන්නේ කර්ණ ශ්වේඩ කියලයි. ඒ රෝග තත්ත්වය තුළදී රෝගියාට කන ඇතුලෙන් ඇහෙන්නේ එකම ශබ්දයක්‌ විතරයි. පළමුවැනි රෝග තත්ත්වය තුළදී හඬවල් රැසක්‌ ඇහෙනවා. දෙවන රෝග තත්ත්වයේදී ඇහෙන්නේ එකම හඬක්‌. ඉහත සඳහන් රෝග තත්ත්වයන් තුන තුළදීම ශ්‍රවණ හීනතාවන් ඇති වෙන්න පුළුවන්. මේ අතර හටගන්නවා කන්වල වේදනාකාරී තත්ත්වයක්‌. මෙය කණ තුළ හට ගන්නත් පුළුවන්. ඒ වගේම කනට පරි බාහිර, කන සමඟ සම්බන්ධ කොටස්‌වල හටගන්නත් පුළුවන්.
සමහර විට උගුරේ ප්‍රශ්නයක්‌ මගින් කනේ වේදනාව හටගන්නවා. දතේ කැක්‌කුමක්‌ හට ගත්තොත් එය කන දක්‌වා පැතිර යන්න පුළුවන්. එය වේදනාව සංක්‍රමණය වීමක්‌. ඔලුව කැක්‌කුමක්‌ කනේ වේදනාවක්‌ හැටියට එන්න පුළුවන්.
ඊළඟ රෝග අවස්‌ථාව තමයි කන තුළ හට ගන්නා කළාඳුරු (කර්ණමල) හෙවත් ආං නිසා ඇතිවන වේදනාව. Ear Wax හඳුන්වන්නේ කර්ණ වර්ච කියන නමින්. කලාඳුරු පිරිලා තිබෙද්දී නෑවොත් ඒ කලාඳුරු ප්‍රසාරණය වෙනවා. එවිට හට ගන්නා පීඩනය නිසා කන රිදෙනවා. කලාඳුරු කියන්නේ තෛලමය පදාර්ථ සමඟ මිශ්‍ර වූ දෙයක්‌. මෙය සමඟ වතුර මිශ්‍ර වුණාම එය ප්‍රසාරණය වෙනවා. දැන් කෙනෙක්‌ කියන්න පුළුවන් ස්‌නානය කළාම කන් කැක්‌කුම හෝ ඔලුවේ කැක්‌කුම ඇති වෙන බව. මෙහිදී සිදු වන්නේ එම තැනැත්තාගේ කනට වතුර ගිහින් ඇතුළත ප්‍රසාරණය වීමයි. එසේ කන රිදෙන විට ඔලුවත් රිදෙනවා.
මීට අමතරව කනට වැළඳෙන සෙසු රෝග මොනවද?
සමහරුන්ගේ කන් නිතරම කසනවා. මෙහෙම දිගින් දිගටම කසන විට කනෙන් කිසියම් දියරයක්‌ ගලනවා. මෙය සිදුවන්නේ කන තුළ දිළීර තත්ත්වයක්‌ හට ගත් විටයි. මෙවැනි තත්ත්වයක්‌ තිබෙන විට කන තුළින් දුඟදක්‌ හමනවා. පරණ පාන් වතුරේ පොඟවලා දවසක්‌ විතර තැබුවාම එන ගඳට මේ ගඳ සමානයි. විවිධ හේතු මත මේ දිලීර හටගන්නවා. සමහර විට ඔලුවේ හිස්‌ සොරි තිබුණාමත් කනේ පුස්‌ හටගන්නවා. ඒ හිස්‌සොරි කන ඇතුලට ගිහින් තැන්පත් වන නිසයි. ඒ වගේම දියවැඩියා රෝගීන්ටත් කනේ පුස්‌ වර්ග හට ගන්නවා. කෙනෙක්‌ කන කසන විට එය තුළට විවිධ දේවල් ඇතුළු කරනවා නම් ඒ මගින් අවට පරිසරයේ තිබෙන පුස්‌ වර්ග කන තුළට ගිහින් තැන්පත් වෙන්නට පුළුවන්. ඒ වගේ දේවල් කන ඇතුළට දමලා කන කසද්දී කනේ ඇතුල් ස්‌ථරය තුවාල වෙනවා. එතකොට ඒ තුවාල වූ තැන පුස්‌ හට ගන්නටත් පුළුවන්. ආයුර්වේදයෙ එනවා කර්ණ කණ්‌ඩු කියලා තත්ත්වයක්‌. කන තුළ හටගන්නා දිලීර තත්ත්වය තමයි මෙයින් හඳුන්වන්නේ. මේ දිලීර සුදු පාටට තියෙන්නත් පුළුවන්. කළු පාටට තියෙන්නත් පුළුවන්.
මේ අතර පිට කනේ බිත්තිවල හට ගන්නවා කුඩා තුවාල විශේෂයක්‌. අප මේවා හඳුන්වන්නේ කර්ණ විද්‍රධි කියලයි. මෙය ඉතාම වේදනා සහගත තත්ත්වයක්‌. මෙවැනි රෝග තත්ත්යක්‌ තුළ කන අල්ලන්නටවත් බැරිවන තරමට රිදෙනවා.
මෙහිදී තවත් වැදගත් දෙයක්‌ කිව යුතුයි. ඒ කනේ සැරව ගැලීම ගැනයි. මෙහි අවස්‌ථා දෙකක්‌ තිබෙනවා. පළමුවැන්න තමයි කන තුළ සැරව හට ගත්තත් පිටතට නොගැලීම. එයට හේතුව කන් බෙරය හිල්වුණොත් තමයි සැරව පිටතට ගලාගෙන එන්නේ. ඒ කියන්නේ ඇතුළෙන් පිටට සැරව ගැලීම. බාහිර කනේ මොනවා හරි ප්‍රශ්නයක්‌ වුණොත් සැරව පිටට ගලනවා. ඒ එක්‌කම තවත් වැදගත් දෙයක්‌ තමයි කුඩා දරුවන්ගේ දීර්ඝ කාලීන උගුරේ ආසාදන. උගුර සහ කන අතර සම්බන්ධයක්‌ තිබෙනව බව මා මීට පෙර සතියක කිව්වා. එය හටගන්නේ යුස්‌ටේකීය නාලය හරහා. ඉතින් මේ යුස්‌ටේකීය නාලය හරහා මැද කනේ සෙම එකතු වෙනවා. ඊළඟට කල්ගත වෙද්දී එතැන ආසාදනයක්‌ ඇති වෙනවා. කර්ණ පටලය නොරාගෙන ඇවිත් පුපුරනවා. එවිට මැද කනේ සිට දියර පිටතට එනවා. මෙය ඉතා පරෙස්‌සමින් සැලකිල්ලට ගත යුතු තත්ත්වයක්‌. මැද කනේ සෙම එකතු වුණාමත් ලොකු වේදනාවක්‌ හට ගන්නවා. රෝගියාගේ කුස පිරුණ තත්ත්යක්‌ එනවා. ශ්‍රව්‍ය දුර්වල වෙනවා. මන්ද යත් යුස්‌ටේකීය නාලය අවහිර වීමයි.
බිහිරි බව කියන්නේ මොකද්ද?
බිහිරි භාවය හට ගන්නට කනෙන් සැරව ගලා ඇතිවන ආසාදන තත්ත්වය බලපාන්නට පුළුවන්. එය ආයුර්වේදයේ හඳුන්වන්නේ ප්‍රතිකර්ණ කියන නමින්.
ඇයි කනෙන් සැරව ගලන්නේ?නිතර නිතර ආගන්තුක අපවිත්‍ර ද්‍රව්‍ය කන තුළට ඇතුළු වීම ප්‍රමුඛ හේතුවක්‌ විය හැකියි. ශ්වසන මාර්ගයේ ඉහළ කොටසේ ආසාදන තත්ත්වයක්‌ හටගත්තා කියමු. මෙය සෙම අමාරුවක්‌ එහෙමත් නැත්නම් පීනස්‌ තත්ත්වයක්‌ විය හැකියි. මේ තත්ත්වය පාලනය කරගත්තේ නැත්නම් ඒ ඔස්‌සේ හටගන්නා දුර්විපාක නිසා බිහිරි බව හටගන්නවා. කෙනකුට නිතරම සෙම් ගෙඩි තිබෙනවා නම්, අගුරේ අමාරු නිතරම හට ගන්නවා නම්, එය පාලනය කර ගන්නට බැරි නම් බිහිරි බව හටගන්නවා. ඒ කියන්නේ සෙම් ගෙඩි හෝ උගුරේ අමාරුව හැදුන පමණින් බිහිරි බව ඇති වෙනවා කියන එක නොවෙයි. ඒවා නරක්‌ වුණොත්, නරක්‌ කරගත්තොත් බිහිරි බව හටගන්නා බවයි. මෙසේ සෙම තත්ත්වය නරක අතට හැරුණාම මැදකනේ සෙම එකතු වෙනවා. එහෙම වෙන්නේ මැද කනේ තිබෙන ආස්‌තරණයෙන් සෙම කාන්දුවීම තුළින්. එහෙම සෙම එකතු වුණාම යුස්‌ටේකීය නාල අවහිර වෙනවා. ඉන්පසු එතැන ආසාදනයක්‌ ඇවිත් පුපුරලා සැරව එළියට එනවා. මෙහෙම දිගු කලක්‌ තිබුණාම ශ්‍රවණය හට ගැනීමට හේතු වන ස්‌නායුවට බාධා වෙනවා. බිහිරි බව හටගන්නේ එතකොටයි.
බිහිරි බව පිළිබඳ බටහිර වෛද්‍යවරුන්ගේ අර්ථකථනය කුමක්‌ද?A deaf person has little to no hearing යන ඉංග්‍රීසි වාක්‍යය මගින් බිහිරි බවේ සීමා නිර්ණය වෙනවා. බිහිරි කෙනකුගේ ශ්‍රවණ ශක්‌තිය සමහර විට ටිකක්‌ තිබෙන්නට පුළුවන්. සමහර විට කිසිසේත්ම නොතිබෙන්නට පුළුවන්. බිහිරි බව එක්‌ කනකත් හට ගන්නවා, සමහර විට කන් දෙකෙහිමත් හට ගන්නවා. කුඩා දරුවකුගේ බිහිරි බව ඔහුගේ කතා කිරීමේ ශක්‌තිය නැති කරනවා.
මහලු වියේ පසුවන කෙනෙකු බිහිරි වුණොත් ඔහුට/ඇයට දැනෙන්නේ තමා ලෝකය තුළ තනිව සිටින බවයි. බිහිරි බව තාවකාලිකව පවතින අවස්‌ථා වගේම කෙනෙකුගේ ජීවිතය නිමවන තුරුම පවතින අවස්‌ථාත් තිබෙනවා.
බටහිර අර්ථකථනයට අනුව බිහිරි බව ඇති වීමට හේතු රැසක්‌ තිබෙනවා. ජානමය උරුමය, වියපත්භාවය, අධික ඝෝෂාකාරීබවට නිරාවරණය වීම, ආසාදන, උපතින් ඇතිවන දෝෂ, කනට සිදුවන හානි, ඖෂධ හෝ වස විසවල බලපෑම මේ හේතු ලෙස දැක්‌විය හැකියි. එසේම කාන්තාවකට ගර්භනී සමයේ දී සිපිලිස්‌ හෝ රුබෙල්ලා වැනි රෝගයක්‌ හට ගත් විට දරු කලලයට එය බලපා බිහිරි දරු උපතක්‌ සිදු වෙනවා. ශබ්දයේ ප්‍රමාණය මනින Decibel ඒකක 25 ක් වත් එක කනකට නො ඇසෙනවා නම් බටහිර විද්‍යාවට අනුව ඒ තැනැත්තා හඳුන්වන්නේ බිහිරි පුද්ගලයකු ලෙසයි. බටහිර වෛද්‍ය මතයට අනුව බිහිරි රෝගීන්ගෙන් අඩක්‌ සුවපත් කළහැකියි. ආයුර්වේදයට ඊට බෙහෙවින් වැඩි ප්‍රමාණයක්‌ සුවපත් කළ හැකියි.
ආයුර්වේද වෛද්‍ය ආචාර්ය වෛද්‍ය ප්‍රියානි පීරිස්‌ සමග කල සංවාදයකි.උපුටා ගැනීම දිවයින
