ව්‍යායාම කිරීමෙන් පසු පිහිනීම මාරන්තිකද?

වෛද්‍යතුමනි වසර කිහිපයක සිට මම දිනපතා සවසට පැයක්‌ පමණ ඇවිදින්නෙමි. ඇවිදීමෙන් පසු ඇතිවන පිපාසය නැතිකර ගැනීමට මම කෝලා වර්ගයේ බීම වීදුරුවක්‌ පානය කරමි. ජලය පානය කළාට මාගේ එම පිපාසය නැතිවන්නේ නැත. මෙය වැරදි බව මම දනිමි. නමුත් ඊට මම ඇබ්බැහිවී සිටිමි. මීට මා හට වෙන විකල්පයක්‌ නැතිද?

මෙම ගැටලුව ඔබට පමණක්‌ නොව බොහෝ දෙනකුට පවතින්නකි. කෝලා වර්ගයේ බීමවල කැෆේන්, ග්ලූකෝස්‌, කාබනේටඩ් ආදී රසායන සංඝඨක අඩංගුය. එමගින් ව්‍යායාම කිරීමේදී ඇතිවන වෙහෙස වැයවන ශක්‌තිය සහ තෙහෙට්‌ටුව නැති කරයි. කැෆේන් මගින් ස්‌නායු උත්තේජනය ඇති කරන නිසා වෙහෙස නොදැනේ. ග්ලූකෝස්‌ මගින් ශරීරයෙන් වැයවන ශක්‌තිය යළි ලබාදේ. කාබනේටඩ් තෙහෙට්‌ටුව දැනීම පාලනය කරයි. 

ඔබ ව්‍යායාම කරන්නේ ශරීරයේ බර පාලනය කර ගැනීම සහ රුධිර සීනි මට්‌ටම, කොලෙස්‌ටරෝල් මට්‌ටම පාලනය කර ගැනීමට නම් ඔබගේ ඇබ්බැහිවීම තුළින් සිදුවන්නේ ඔබ ඉතා ඉක්‌මනින් රෝගී වී හෘදයාබාධයකින් මරණයට පත්වීමය. ඔබ ඇබ්බැහිවී ඇති කෝලා වර්ග පානයෙන් මිදී නිරෝගී සෞඛ්‍ය සම්පන්න බීම වර්ගයක්‌ පානය තුළින් ඔබට මතුවන වෙහෙස, පිපාසය ක්‍ෂණිකව නිවාගත හැකිය. ඒ සඳහා සිට්‌රික්‌ ඇසිඩ් සහිත පලතුරු වන දෙහි, ලෙමන්, නාරං හෝ කොළ පැහැති දේශීය දොඩම් වැනි පලතුරුවලින් එක්‌ වර්ගයක්‌ තෝරාගෙන ඉන් ඔබට අවශ්‍ය ප්‍රමාණයට ගෙඩි කිහිපයක්‌ කපා යුෂ ලබා ගන්න. එම යුෂ වෙත අයඩින් මිශ්‍ර ලුණු තේ හැන්දක්‌ එකතු කරන්න. ඉන්පසු ඊට අයිස්‌ වතුර අවශ්‍ය ප්‍රමාණයක්‌ යොදා රතු සීනි හෝ ග්ලූකෝස්‌ තේ හැඳි දෙකක්‌ එකතු කරන්න. මෙම ස්‌වාභාවික පලතුරු පානය තුළින් පිපාසය, වෙහෙස, තෙහෙට්‌ටුව ක්‍ෂණිකව නිවාලයි.

මගේ වයස අවුරුදු 26 කි. සති අන්තයේ සෙනසුරාදා සහ ඉරිදාට මම කායවර්ධන මධ්‍යස්‌ථානයකට ගොස්‌ පැය දෙකක්‌ පමණ ව්‍යායාම කර ඉන්පසු පිහිනුම් තටාකයට පැන පැයක්‌ පමණ පිහිනමි. ව්‍යායාම කළ විගස පිහිනුම් තටාකයට පැනීම අනතුරුදායක බව මිතුරෝ පවසති. එය සත්‍යයක්‌ද?

පැය දෙකක්‌ පමණ ව්‍යායාම වල යෙදීමේදී ශරීර උෂ්ණත්වයද හෘද ස්‌පන්ධනයද ඉහළ යයි. එනිසා දහදිය පිට වේ. ව්‍යායාමවලින් පසු ශරීර උෂ්ණත්වය සාමාන්‍ය තත්ත්වයට පත්වීමට විනාඩි 15 ක්‌වත් ගතවේ. එබැවින් ව්‍යායාමවලින් පසු සෙමින් ඇවිදීම, නම්‍යතා  ව්‍යායාමවල යෙදීම කළ යුතුය. එසේ නොමැතිව ව්‍යායාම කළ විගස පිහිනුම් තටාකයට පැනීමෙන් සිදුවන්නේ ක්‍ෂණිකව ශරීර උෂ්ණත්වය පහළ බැසීමෙන් හදවතට එය දරා ගැනීමට නොහැකි වීමය. ඉන් මරණය පවා සිදුවිය හැකියි. ඔබට ව්‍යායාම වලින් පසු පිහිනීමට අවශ්‍ය නම් පිහිනුම් තටාකයට බැස විනාඩි කිහිපයක්‌ සිටීම හෝ ඇවිදීම සිදුකරන්න. ඉන්පසු පිහිනීමේ කටයුතුවල යෙදෙන්න.

උපුටා ගැනීම දිවයින