අංශභාගය එන්නේ වාත රෝගත් මානසික ආතතියත් අරගෙන

මාරාන්තික නොවුවද මිනිස් ජීවිත ඉතා ශෝචනීය තත්ත්වයකට ඇද දමන මානසික ආතතිය ඉතාම අවදානම් සහගත රෝගයකි. ඇතැම්හු මෙම රෝගී තත්ත්වය නිසා සදාකාලික උන්මත්තකයන් ලෙස කල්ගෙවති. තවත් සමහර දෙනකු ශාරීරිකව පිරිහෙති. මානසික ආතතිය ගැන අද මෙම විශේෂාංගය ඔස්සේ කතාබහ කිරීමට අප අදහස් කළේ පසුගිය සති කිහිපය තුළ ඔබ දැනුවත් කළ 'අංශභාග' රෝගය ගැන තවත් අලුත් තොරතුරු බිඳක් පවසන්නටය. සමහර පුද්ගලයන් මානසික ආතතිය හරහාද බොහෝවිට අංශභාග තත්ත්වයට පත්වන හෙයිනි.

මානසික ආතතිය ප්‍රධාන වශයෙන් ශරීරික මෙන්ම මානසික ආබාධයන් නිසාද හට ගනියි. මානසිකව වැලඳීමේදී දරාගත නොහැකි යම් ගැටලු සහ සිත්වේදනාවන් හේතුකොටගෙන ඇතිවන අංශභාග තත්ත්වය එකකි. එලෙසම හදිසි අනතුරු නිසා මොළයට සිදුවන හානි, පිළිකා සහ මොළයේ හට ගන්නා ගැටිති සහ ගෙඩි වැනි තත්ත්වයන් අරභයාද මානසික ආතතියට ගොදුරු වේ. මානසික ආතතිය යැයි හඳුන්වන්නේ මොළයේ සිදුවන කුමන හෝ විපර්යාසයක්, පිපිරීමක්, හානියක් හෝ වෙනත් පලුද්දක් හේතුවෙන් යෙදෙන පීඩනයක් ස්නායු පද්ධතියට අදාළ ඉන්ද්‍රියයන් අඩපණ කරවීම හෝ අකර්මණ්‍ය කරවීමයි. ඒ හරහා ඇතිවන සියලුම කාර්යභාර්යයන් හි ඇනහිටීම නිසා සිරුරෙහි කොටසක් අවසඟව යෑම සිදුවේ. මෙහි සරල පැවැසීම නම්, ප්‍රධාන විදුලි පරිපථයට තිබෙන සම්බන්ධවීමක් බිඳවැටුණු කල්හි අදාළ ස්ථානයන් කරා විදුලිය නිපදවීම ඉබේම ඇනහිටීම, යන්නය. එලෙසම සිදුවන හානියේ බරපතළකම අනුව රෝගයෙහි භාරදූර බව අඩු-වැඩි වශයෙන් සිදුවේ. අනිවාර්යයෙන්ම වාතරෝග සහ කොන්ද, අමාරු වැනිදෑ පවා අංශභාගයට හේතු කාරකයි. මේ ආකාරයට සිරුරේ පැවැත්ම සඳහාත් නිරෝගී බව රැක ගැනීම සඳහාත් විශාල කාර්යයක් අප සිරුරෙහි පාලකයා වන වාතය මඟින් සිදු කරවයි. එකී පාලකයාට අනුව අප ක්‍රියා කළහොත් අපට කිසිවිටෙකවත් අවහිරයක් නොවන අතර පාලකයාට එරෙහිව අප ක්‍රියා කළහොත් පාලකයාද අපට එරෙහි වන්නේය.

'වාත කෝපය' යනුවෙන් හැඳින්වෙන්නේ අප වෙතින් සිදුවන එම එරෙහිවීමය. වාත කෝප වීම දුරදිග ගිය සැණින් සෙම සහ පිතද දූෂිත වේ. එය කෙමෙන් කෙමෙන් අංශභාගයට හේතුකාරකයක් වන්නේය. එහිදී සිරුරෙහි එක් අංශයක අතපය අකර්මණ්‍ය වීම, එම අංශය පුරා හිරිවැටීමක් පැතිරයෑම, එම අංශයෙහිම මුඛය ඇතුළට ඇදව යෑම, අසෙහි පෙනීම දුර්වල වීම වැනි දෑ සිදුවේ. තවත් අංශභාග රෝගයක සොබාවය වන්නේ ඉණෙන් ඉහළ කොටස පමණක් අඩපණ වීමය. ඉණෙන් පහළ දෙපා පණ නැතිව යෑම හෝ හිරිවැටීම ඇතැම් අංශභාග රෝගයක සොබාවය වේ. මුහුණට පමණක් (ඇස් දුර්වල වීම, මුඛය ඇදවීම හෝ හිරිවැටීම) අංශභාගය පැමිණෙන අවස්ථාද ඇත. එය 'අර්දිත' යනුවෙන් හඳුන්වයි. අවාසනාවන්තම තත්ත්වය වන්නේ, සර්වාංග ලෙස මුළු සිරුරටම මෙම රෝගය වැලඳීමය. මෙහිදී අතුරු ආබාධ බොහෝ යෙදෙයි, සුෂුම්නාවට බලපෑම් ඇතිවන අතර රෝගියා තදින් ඔත්පළ වේ. (මෙය නිතර දක්නට නැත.)  යම් රෝගාබාධයක් හරහා රෝගියා අංශභාග රෝගය වෙත ගොදුරු වෙමින් පවතින්නේ යැයි අනුමාන කළ හැකි ලක්‍ෂණ මොනවාදැයි? දැන් විමසිලිමත් වෙමු. එවැනි ලක්‍ෂණ මතුවීම ආයුර්වේදයෙහි හඳුන්වන්නේ 'පූර්ව රූප' යනුවෙනි. ඕනෑම රෝගයකට මෙන්ම අංශභාගයටද පූර්වරූප ලක්‍ෂණ යෙදේ.

• හිසෙහි පිටුපස කොටස බරවීම (බර ගතියක් දැනීම), 
• හිරිවැටීමක් වැනි සොබාවයක් නිතර ඇතිවී නැතිවීයෑම.
• අතක් එසවීමට සහ හැරවීමට නොහැකි තද බවක් දැනීම.
• ඇස්වල පෙනීම දුර්වල වීම. කටහඬෙහි වෙනස්වීම් සහ දුර්වලතාවන් ඇතිවීම.
• සුළු වශයෙන් හෝ (සාමාන්‍ය මට්ටමකට ගත හැකි) ක්ලාන්ත ගතියක් වරින්වර ඇතිවීම.
• මතක ශක්තිය, කල්පනා ශක්තිය හීනව යෑම, හේතුවක් නොමැතිව සිත අසහනකාරී වීම, නොසන්සුන් ඉරියව් ප්‍රකට කිරීම, අධි රුධිර පීඩනය ඇති අයට එය ඉහළ යෑම, රුධිර පීඩනයෙහි වෙනස්කම් ඇතිවීම.

ඉහත සඳහන් එක් කරුණක් හෝ රෝගියා පෙන්නුම් කරයි නම් වෛද්‍ය උපදෙස් කරා යොමුවීම මැනවි.

උපදෙස් - අනෝමා කුමාරි වීරසූරිය (වෛද්‍ය ආයුර්වේද සර්වාංග) 071-3566204සටහන-දමයන්ති රේණුකා ප්‍රනාන්දුමව්බිම