රාත්‍රී කාලයේ නිදිවැරීම සවස් කාලයේ දියනෑම පීනස් රෝගීන්ට අගුණයි
අද පවතින සමාජ ක්‍රමය හා කාර්යබහුලත්වය නිසාම ඇතැමෙකුට තම ශරීර සෞඛ්‍ය පිළිබඳ සිතන්නටවත් අවස්ථාවක් නොමැත. එහෙත් එවැනි ජීවන රටා හා පරිසරයන් මිනිසා රෝගාතුර කරන්නේ ය. එවන් රෝග අවස්ථා කොතෙකුත් ඇතත් පීනස පිළිබඳ විශේෂයෙන් සාකච්ඡා කළ යුතු වේ. වයස් සීමා මායිම් බිඳ රෝගය ව්‍යාප්ත වෙමින් තිබේ. එයට ප්‍රතිකර්ම ආරම්භ කළ යුතුය. එසේ නොවුණහොත් දරුණු ආසාදනයන්ට ගොදුරුව මිනිසා මිය යා හැකියි. ආයුර්වේද වෛද්‍ය විද්‍යාවට අනුව පීනස රෝගය ස්වසන පද්ධතිය හා ඒ ආශ්‍රිතව ඇති වන්නා වූ රෝගයකි. දේශීය වෛද්‍ය විද්‍යාවට අනුව පීනස් ප්‍රබේද 18ක් තිඛෙනවා. කෙසේ වෙතත් රෝගයට ගොදුරු වූවෙකු ඉතා අසහනකාරී මෙන්ම නිරන්තරයෙන් අපහසුතාවයන්ට ගොදුරු වෙනවා. එනිසා මේ රෝගය ඇතිවීමට බලපාන ආසන්නතම සාධක පිළිබඳ අවබෝධයක් ලබා ගත යුතුයි.
සාමාන්‍යයෙන් මෙවැනි රෝගයක් ඇතිවීමට සීත අධික ආහාර පාන ලබා ගැනීම හා නිරන්තරයෙන් සීත සුළගට ශරීරය නිරාවරණය වීම වැනි කාරණා සෘජුවම බලපෑම් ඇති කරනවා. එසේම අධික ලෙස දූවිල්ලට මුසු වීම සහ විවිධ සතුන්ගේ ලෝම වර්ග ද ඒ අතර වෙනවා. එසේම සමහර ක්‍රීඩා භාණ්ඩ, ශීතකරණයේ තබා ගන්නා ලද ආහාර නිසා ද ආසාදන තත්ත්වයට ගොදුරු විය හැකියි. එසේම දිවා කාලයේ නිදා ගැනීම හා රාත්‍රී කාලයේ නිදිවැරීම ද එක් හේතුවකි. තව ද සවස් කාලයට දිය නෑම, විරුද්ධ ආහාර පාන ලබා ගැනීම මෙවැනි රෝග ඇතිවීමට රුකුලක් වන්නේ ය. මෙහිදී රෝග ලක්ෂණ ලෙස දක්නට ලැඛෙන්නේ දරුවන්ගේ නම්, නිතරම නාසය සිරවීමයි. එවිට මුඛයෙන් හුස්ම ගැනීමට සිදු වෙනවා. තව ද නිතරම සෙම් සොටු දියර ගලන අතර ඇස් රතුවීමක් සිදු වෙනවා. නිතර නිතර ඇස් කැසීමකට ලක්වන අතර බොහෝ විට ළමුන්ට රාත්‍රී කාලයේ හා උදෑසන කිවිසුම් යෑම සිදු වෙනවා. එසේම නාසයේ දැවිල්ල හා හිසරදය ද ඇති වෙන්න පුළුවන්. මෙවැනි රෝග කල්ගත වීමේ දී දීර්ඝ කාලීන රෝගවලට ගොදුරු විය හැකියි. එනිසා මෙය මුල් අවස්ථාවේ ම ප්‍රතිකාර මගින් සුව කළ යුතුයි. සෙම්ප්‍රතිශ්‍යාව කාලයක් තිබීමෙන් වුව ද පීනස රෝගය ඇති විය හැකි නිසා ඒ සඳහා ද ප්‍රතිකාර ගත යුතුය. මෙහි අතුරු ප්‍රතිඵලයක් ලෙස හිස කෙස් පැසීම හා ඇස් කැසීම, නිරන්තරයෙන් කඳුළු ගැලීම වැනි දෑට මුහුණ පාන්නට සිදු විය හැකියි. එසේම ඇදුම වැනි රෝග අවස්ථාව දක්වා ද වර්ධනය විය හැකි නිසා මෙය වළක්වා ගැනීමට උත්සාහ ගත යුතුයි. කෘත්‍රීම ආහාර පාන හා කෘත්‍රීම පරිසරයන් ගෙන් (විදුලි පංකා, වායුසමීකරණ) ඈත්විය යුතුයි. දූවිලි පරිසරයන්ගෙන් ඉවත්වීම හා නිවෙස් පිරිසුදුව තබා ගත යුතුයි. හොඳ වාතාශ්‍රයක් ලැඛෙන කාමරයක් නිදා ගැනීමට භාවිතා කළ යුතුයි. එසේම රසායනික අඩංගු මදුරු දගර භාවිතයෙන් ද ඉවත් විය යුතුයි. තව ද සමහර පැණි බීම වර්ග නිසා ද මේ තත්ත්වය ඇතිවිය හැකි නිසා එවැනි දෑ භාවිතයෙන් ඉවත් විය යුතුයි. මේ සඳහා උෂ්ණ, කටු, තිත්ත රසවලින් යුක්ත ඖෂධ ද විවිධ කඵහර ද්‍රව්‍යවලින් සෑදූ ඖෂධ ද, දරුණු අවස්ථාවල ශෝධන කර්ම (නෂ්‍ය, වමන) මගින් ද ප්‍රතිකාර කරනු ලබනවා.
උපුටා ගැනීම දිනමිණ පුවත් පත
