ස්මාර්ට් ෆෝන් නිසා මානසික ලෙඩ

ස්මාර්ට් දුරකතන එකක් නැති කෙනෙක් අද කාලේ හොයාගන්න අමාරුයි. ඒ තරමට ස්මාර්ට් ෆෝන් සමාජගත වෙලා. තාක්‍ෂණය සහ කාර්ය බහුල බව එක්කම ස්මාර්ට් ෆෝන්වලින් ගත හැකි ප්‍රයෝජනත් අසීමිතයි. විද්‍යුත් තැපෑල, ෆේස්බුක් වැනි අපට බොහෝ විට අවශ්‍ය වන සියල්ල ස්මාර්ට් දුරකතන සතු වීම ඒ කෙරෙහි අප නැඹුරුවීමට තවත් හේතුවක්. නමුත් පසුගියදාක චිකාගෝ හි නෝර්ත්වෙස්ටන් ෆයින්බර්ග් විශ්වවිද්‍යාලයේ වෛද්‍ය විද්‍යා අධ්‍යයන අංශය කළ පර්යේෂණයකින් ස්මාර්ට් දුරකතන හේතු කරගෙන විශාදය නමැති මානසික රෝගය වැලඳෙන බව සොයා ගත්තා. එයට ප්‍රධානම හේතුව ලෙස ඔවුන් පෙන්වා දෙන්නේ නිරන්තරයෙන් ආතතිය, දුක ඇති වන දෑ දර්ශනය වීමයි. සාමාන්‍යයෙන් විශාදය ඇති වීමට බලපාන හේතු අතර නිතර ඇතිවන දුක, ආතතිය, ආතතියට ලක්වන දේ දැකීම ආදිය හේතු වෙනවා. එමෙන්ම වෙනත් රෝග සෑදීමටත් ස්මාර්ට් දුරකතන හේතු වන්නට පුළුවන්. මේ පිළිබඳ මුලින්ම කතා කළේ 2010 අවුරුද්දේයි.

ජනප්‍රිය රචකයකු වන මහාචාර්ය 'සෝරබ් සේබි' පවා ස්මාර්ට් දුරකතන හරහා විශාදය වැලඳෙනවාය යන මතය තහවුරු කරනවා. ඔහු පවසන්නේ සිත යනු ප්‍රශ්න සහ උත්තරවලින් පිරුණු තරාදියක් බවයි. දිනෙන් දින දුක, වේදනාව වැඩිවන්නට වැඩි වන්නට තරාදියේ සමබර බව ගිලිහෙනවා. එවිට අසමතුලිත සිත විශාදයට ගොදුරු වීම සාමාන්‍යයි. නිතර ස්මාර්ට් ජංගම දුරකතන භාවිත කරමින් ෆේස්බුක් වැනි සමාජ ජාල වෙබ් අඩවිවලට සමීප වන්නන් විශාදයට ලක්වන අය අතර ප්‍රධානයි. ඔවුන් නිතර දුක, කේන්තිය, තරහව ඇවිස්සෙන ආතතියට ලක්වන දෑ දකින අතරම, එවැනි දෙයට ප්‍රතිචාර දැක්වීමට උත්සාහ දැරීමත්, එයට හේතුව වනවා. එසේම ස්මාර්ට් ජංගම දුරකතන හේතුවෙන් නින්දටද බාධා මතුවනවා. රාත්‍රියේ එන දුරකතන ඇමැතුම් නිසා එක්වරම තද නින්දෙත් අවදි වීම, දීප්තිමත් ආලෝකය ඇස්වලට වෙහෙසකර වීම ආදී හේතුත් විශාදය ඇතිවීමට බලපාන්න පුළුවන්. පුද්ගලයන් 40 දෙනකු යොදා ගනිමින් කරන ලද මෙම පරීක්‍ෂණයේදී අන්තර්ජාලය හරහා ඔන්ලයින් ප්‍රශ්න විචාරාත්මක ක්‍රමයට ප්‍රශ්න අසා තිබෙනවා. එහිදී දුන් පිළිතුරු අනුව 28 දෙනෙක් විශාද තත්ත්වයට ළංව සිටි අතර 12 දෙනකු විශාදයෙන් පෙළෙන බව අනාවරණය වුණා. වැඩිදුරටත් අදහස් දක්වමින් පර්යේෂකයන් පෙන්වා දෙන්නේ දිනකට විනාඩි 60ක් පමණ දුරකතනය භාවිත කරන්නේ නම් අඩුම වශයෙන් විනාඩි 20ක් වත් පරතරය තබා දුරකතනය භාවිත කළ යුතු බවයි.

හංසි ආටිගලමව්බිම