සාර්ස් රෝගයටත් වඩා භයානක මර්ස්
"ඉන්දියාවේත් රෝගීහු දෙදෙනෙක්." ලෝකයේ අද පවතින අලුත් ම රෝග තර්ජනයක් සහ එම රෝගය ශ්‍රී ලංකාවට සංක්‍රමණය වුවහොත් බොරැල්ල රජයේ වෛද්‍ය පර්යේෂණායතනය මගින් ඒ පිළිබඳව සිදු කරන රසායනාගාර පරීක්ෂණය අද කතා බහට ලක් කරමු. මේ රෝගය මර්ස් කොරෝනා වෛරස් ආසාදනය ලෙස හඳුන්වයි. මිඩිල් ඊස්ට් රෙස්පි‍රටරි සින්ඩ්‍රොම් කොරෝනා වෛරස් රෝගය මුලින් ම වාර්තා වන්නේ 2012 වසරේ අප්‍රේල් මාසයේ සවුදි අරාබියෙන් ය. අපේ රටට අසල්වැසි රට ලෙස හඳුන්වන ඉන්දියාවට ද මේ රෝග තත්ත්වය ළඟාවී ඇත. නොබෝදා ඉන්දියාවෙන් මර්ස් කොරෝනා වෛරස් රෝගීන් දෙදෙනකු ගැන වාර්තා විය. මර්ස් කොරෝනා වෛරස් ආසාදන රෝගය පිළිබඳව අදාළ කරුණු මුලින් ම සොයා ගන්නේ ඊජිප්තුවේ වෛද්‍යවරයකු විසිනි. මෙහිදී වෛද්‍යවරු බොහෝ දෙනා අනුමාන කළේ සාර්ස් වෛරස් රෝගය හා සසඳමින් එම රෝගයේ තවත් වර්ධනයක් ලෙසට ය. සාර්ස් රෝගයේදී පෙනහලු ආශ්‍රිත ආසාදන තත්ත්වයක් වර්ධනය වී නිව්මෝනියා ඇතිවේ. එහෙත් සාර්ස් වකුගඩු ආශ්‍රිත රෝග තත්ත්වයක් දක්වා වර්ධනයවීමක් සිදු නොවෙයි. ඊජිප්තු වෛද්‍යවරයා ඇතුළු වෛද්‍ය කණ්ඩායම මර්ස් රෝගය ගැන වැඩිදුරටත් කරන ලද පරීක්ෂණවලදී නිව්මෝනියාව වැලඳී අවසානයේ දී වකුගඩු දක්වා පැතිර ගොස් වකුගඩු අකර්මණ්‍යවී රෝගියා මරණයට පත්වීම ද සිදුවෙන බව සොයා ගත්තේ ය. මේ රෝගය අපේ රටෙන් වාර්තාවීමක් සිදුවුවහොත් රජයේ රෝහල්වලට එන මෙවැනි සැක සහිත රෝගීන්ගේ පරීක්ෂණ වාර්තා සිදුකරන්නට පහසුකම් පවතින්නේ රජයේ වෛද්‍ය පර්යේෂණායතනයට ය. මර්ස් කොරෝනා වෛරස් ආසාදන නවතම රෝගයේ රෝග ලක්ෂණ ලෙස පෙන්නුම් කරන්නේ සතියක් පමණ තිඛෙන උණ, හුස්ම ගැනීමේ අපහසුතාව කෙටි හුස්ම ගැනීම සහ ඉන්පසු රෝග තත්ත්වය අසාධ්‍ය බවට පත්වී නිව්මෝනියා දක්වා වර්ධනය වීමත් අනතුරුව වකුගඩු දක්වා රෝග තත්ත්වය ව්‍යාප්ත වී රෝගියා මිය යාම ය. විශේෂයෙන් ම මැද පෙරදිග රටවලට ගොස් එන පිරිස් වැඩි වෙමින් පවතින නිසා උණ රෝග ලක්ෂණ සතියක් සති දෙකහමාරක් පමණ වුව ද පැවතියහොත් වෛද්‍යවරයකු හමු වී පරීක්ෂණ කිරීම උචිතය. වෛරසය ශරීර ගත වී රෝග ලක්ෂණ ඇතිවෙන්න දින 12 ක් පමණ ගතවෙයි. පරීක්ෂණය සඳහා රෝගියාගේ සෙම් සොටු දියර ගැනීම සිදු වෙයි. මේවා ඉන්පසුව පරීක්ෂණයට ලක්වන්නේ ඉලෙක්ට්‍රොනික අන්වීක්ෂක උපයෝගි කරගෙන ය. මෙවැනි පරීක්ෂණයක් සඳහා රුපියල් 10,000 - 15,000 මුදලක් වැය කිරීමට සිදුවෙයි. රජයේ රෝහල්වලට මෙවැනි රෝගීන් පැමිණියහොත් ඔවුන් ගෙන් රෝග නිශ්චයට ගන්නා සාම්පල පරීක්ෂා කරන්නේ නොමිලයේ ය. සවුදි අරාබියෙන් පසු මර්ස් කොරෝනා වෛරස් ආසාදනය කටාර්, එක්සත් අරාබි එමීර් රාජ්‍යය, ටියුනීසියාව, ජෝර්දානය, ප්‍රංශය, ඉතාලිය, ජර්මනිය, එක්සත් රාජධානිය යන රටවලට ද පැතිර ගොස් ඉන්දියාවෙන් ද ඉකුත් 6 වැනිදා රෝගීන් දෙදෙනකු ගැන වාර්තා විය. උපුටා ගැනීම සිළුමිණ පුවත් පත
