ගල් තැළුමක් නම් බලාගෙන ඉන්න එපා...
අතේ අල්ල ප්‍රදේශයේ හා පාදයේ පතුල ප්‍රදේශයේ සම ඝන වීමක් ගල්තැළුම් ලෙස හඳුනා ගන්නවා. දියවැඩියා රෝගීන් නම් මේ ගැන වැඩි සැලකිල්ලක් දැක්විය යුතුමයි.අතේ අල්ලේ හෝ පාද යටිපතුලේ සම ස්වාභාවික ලෙස ඝන වීමද ගල්තැළුමකි. සමේ යම් ස්ථානයක් නිතර ගැටීමෙන් ඇතිවන පීඩනය නිසා එය දරා ගැනීමට එහි සම ඝන වෙයි. මියගිය සෛල එක්වන නිසා එම ස්ථානය රළු බවක් පෙන්වයි. මේ නිසා එම සෛලවලට බාහිර ආපදාවලට ඔරොත්තු දීමේ හැකියාවද වැඩිය. මෙලෙස පීඩනය වැඩි ස්ථානය එක්වී සමේ සිදුවන හැඩ ගැස්මක් ලෙස ගල් තැළුම් ඇතිවෙයි. ඇතිවන අවස්ථා
- බර ඔසවන පුද්ගලයන්
- නිතර බර වැඩ කරන්නන් (කරගැට)
- ගිටාර් වාදකයන්
- පාදයේ ඇදවීමක්
- යම් යම් ස්නායු රෝග
මෙවැනි හේතූන් නිසා සමේ ස්වාභාවික පීඩන සම්ප්‍රේෂණයට බාධා ඇතිවෙයි. පතුලේ යම් යම් ස්ථානවලට වැඩි පීඩනයක් එන්නේ මේ නිසයි.
දියවැඩියා රෝගීන්ට
දියවැඩියා රෝගීන්ගේ ස්නායු දුර්වලතා පෙන්වන නිසාත් ගල් තැළුම් ඇතිවීමේ වැඩි අවදානමක් ඔවුන්ට පවතියි. දියවැඩියා රෝගීන්ට සම දැනීම අඩු නිසා ගල් තැළුම් වර්ධනය වී ඇතුළත පටකවලට ගොස් තුවාල පවා ඇතිවිය හැකියි. පාදයේ ඇඟිලි, ඇඟිලි පාදයට සම්බන්ධ වන ස්ථානය හා විළුඹ යන ස්ථානවල ගල් තැළුම් වැඩියෙන් ඇතිවෙයි. මෙවැනි තත්ත්ව ඔබටත් ඇත්නම් වහාම වෛද්‍යවරයකු වෙතගොස් ප්‍රතිකාර ලබාගැනීම වඩාත් සුදුසුයි.කපා ඉවත් කිරීම. මෙවැනි ගල් තැළුම් පහව නොයන්නේ නම් ශල්‍යකර්මයකින් කපා ඉවත් කළ හැකියි. සමේ උඩු කොටස සාමාන්‍ය සම වනතෙක් කපා ඉවත් කළ යුතුයි. දියවැඩියා රෝගීන් නම් තම පාදවල වැඩි ආරක්‍ෂාවට සුදුසු පාවහන් පැලඳිය යුතුයි. පාදයට සුව පහසු, උස අඩු, flat සෙරෙප්පු පැලඳීමෙන් පාදවලට ආරක්‍ෂාව ලබාදෙන්න.
ශාලිකා රංගනී සමරදිවාකර
මව්බිම
