ලිංගික අවශ්‍යතාවය තරුණ යුවළකට අතිශයින් වැදගත්

සුජිත්, මේඛලා යුවල විවාහ වෙලා අවුරුදු 3ක් විතර වෙනව. කාලයක් පෙමින් වෙළිලා සිටි මේ දෙන්නා හිටියේ හරිම සතුටින්, පුංචි පුතාට දැන් වයස අවුරුද්දයි. එයාගේ උපන් දිනේ යෙදිල තියෙන්නෙ ලබන මාසෙට. බබා ලැබෙනකල් දෙන්නම බලන් හිටියෙ හරිම සතුටින්. පුතා හරි හුරතල්. ඒත් දැන් ටික කාලෙක ඉඳල සුජිත් ඉන්නෙ හරිම කනස්සල්ලෙන්. එයා වැඩ කරන්නෙ රජයේ කාර්යාලයක. විධායක නිලධාරියෙක් විදිහට මේඛලා තවත් කාර්යාලයක. බැන්ද දවස්වල ඉඳලම මේඛලා සුජිත්ගෙ හැම ඕනෑ එපාකමක්ම හොඳින් බැලුව. දෙන්නගේ බැඳීම හරිම ශක්තිමත්. පුතා ලැබුණට පස්සේ මේඛලා හැම වෙලාවකම කතා කරන්නෙ පුතා ගැන. එයාට දැන් සුජිත් ගැන හොයන්න වෙලාවක් නැහැ. දැන් සුජිත්ගේ උදේ කෑමත් දවල් කෑමත් කැන්ටිමෙන්. ඇඳුම් පැළදුම් ගැනත් එතරම් උනන්දුවක් නැහැ. ගෙදර ගියාමත් එයාට කතා කරන්නවත් කෙනෙක් නැහැ. සුජිත්ට දැනෙන්නෙ එයා තනිවෙලා වගේ. නිදාගන්න ගියාම පුංචි පුතා දෙන්නට මැදින් තියාගෙන තමයි නිදාගන්නෙ. කාලෙකින්. සුජිත්ටත් මේඛලාටත් කිට්ටු වෙලා නිදාගන්නත් බැරි වුණා. ඉස්සර වගේ නෙවෙයි. දෙන්නගේ ලිංගික සම්බන්ධකමක් කලාතුරකින් සිදුවන දෙයක් බවට පත් වෙලා. මේඛලා නිතරම කියන්නෙ එයාට බබාගෙ වැඩ නිසා මහන්සියි කියල. බබා බලාගන්න කෙනෙක් හිටියත් මේඛලාට ඕනෙ හැමදෙයක්ම එයාගෙ අතින් කරන්න. ඒ නිසාම තමයි මේඛලාට සුජිත් ගැන හොයන්නවත් වෙලාවක් නැත්තෙ.

මේ කතාව සුජිත්ටයි මේඛලාටයි විතරක් සීමා වෙච්ච කතාවක් නෙවෙයි. බොහෝ යුවල් තම ජීවිතයේ එක් අවස්ථාවක අත්වන පොදු සිදුවීමක්. ඒ නිසා පවුල් තුළ සිදුවන වෙනස්කම් දුරස්වීම් එතරම් හොඳ නැහැ සෑම දෙයක්ම සාධාරණ විදිහට විසඳගන්න එක ඉතා වැදගත්. පවුලක භාර්යාව සහ ස්වාමියා අතර සම්බන්ධතාව ලිහිල් වෙන්න ඉඩ ඇරිම සුදුසු නැහැ. මෙහිදී මේඛලාගේ විතරක් නෙවී. සුජිත්ගෙත් යම් අඩුපාඩු තියෙනවා. දරුවෙක් පවුලට එක් වුණාම එයා ගැන දෙන්නම හොයන්න ඕනේ දෙන්නට ඒ සඳහා කැපවෙන්න ඕනෙ. ඒත් සමහර අම්මලා ඒ සම්පූර්ණ වගකීම තමුන්ම භාර ගන්නව. එහෙම වුණාම එයා තුළත් ප්‍රබල පීඩනයක් ඇතිවෙන්න පුළුවන්. ඒ නිසා තමයි, තමාගෙ ස්වාමියත් ගෙදර දොර අනෙකුත් දේත් අනෙකුත් සම්බන්ධතාත් ලිහිල් වෙන්න. මේ ගැටලුව ළමයි ලොකු වුණාමත් පවතිනවා. ඒ පිළිබඳව හොඳ අවබෝධයෙන් කටයුතු කරන්න ඕනෙ. බබා ගැන හොඳින් බලන්න ඕනෙ තමයි. ඒත් අනිත් සියළුදේම අතඇරල එය පමණක් කිරීම ජීවිතයේ ගොඩක් දේවල් නැති වෙන්න හේතු වෙන්න පුළුවන්. සුජිත්ට මේ පාලුව ගොඩක්ම දැනෙන්නෙ එයා මේඛලාට ගොඩක්ම ළඟින් හිටපු නිසා වෙන්න ඇති. ලිංගික අවශ්‍යතාවය විශේෂයෙන් තරුණ යුවල්වලට ඉතා වැදගත්. ඒ මඟින් දෙන්නෙකුගෙ කිට්ටු සම්බන්ධතාවය තවත් දැඩි වෙනවා. ඒ වගේමයි එදිනෙදා පවතින කිට්ටු ආශ්‍රය, සම්බන්ධය පවුලක් හොඳින් පවත්වාගෙන යන්න ඉතා වැදගත්. බොහෝවිට මේ වගේ දේවල් පවුලේ දෙන්නා අතර කතාබහ වෙන්නෙ නැහැ. ඒ නිසාම ඒවා විසඳෙන්නෙත් නැහැ. දුර දිග යන්න කලින් ආයෙත් හිතල බලල දුරස් වූ සම්බන්ධතා නැවත තහවුරු කර ගැනීම ඉතාම අවශ්‍යයි. 

උපුටා ගැනීම දිණමින