වැඩිපුර හොඳ උණු වතුරද ඇල් වතුරද?

උදෑසනට හොඳම පානය

පාන්දරින්ම වතුර වීදුරුවකින් දවසට ආරම්භයක් ලබා දෙන්න. මඳ රස්නෙත් වතුර වීදුරුවක් පානය කිරීම මලබද්ධයට හා තරබාරු අයටත් වඩා සුදුසුයි. ඇල් ජලය පානයට වඩා උණුකර නිවාගත් වතුර වීදුරුවට වැඩි අවධානයක් දෙන්න.

උණ ඇති වූ විට

හෙම්බිරිස්සාව සමඟ උණ ඇති වුවහොත් ඇල් ජලය පානය එතරම් සුදුසු නැත. නමුත් උණ ගතිය පමණක් පවතියි නම දියරමය ආහාර වැඩි වශයෙන් ලබාදීමට වෛද්‍යවරු නිර්දේශ කරයි. මේ අතරින් පිරිසුදු ජලයට වැඩි අවධානය යොමු වෙයි.

උෂ්ණ දේශගුණයක් පවතින විට

වියළි දේශගුණයකදී සම අධිකව වියළි වන නිසා නිතර නිතර ජලය පානය කිරීමෙන් විජලනය වළක්වා ගත හැකියි.

බර අඩු කර ගන්න

අධික තරබාරු අය බර අඩු කරගන්න සිතා එකවර වතුර පානය කිරීම සුදුසු නැහැ. වතුර උගුරු 4ක් පමණ පානය කර විනාඩි 15ක් පමණ ගිය පසු නැවැත වතුර පානය කිරීමට හුරුවන්න. ආමාශයට එකවර වතුර ගොඩාක් දරා ගැනීම අපහසු නිසා එය ක්‍රමයෙන් බැහැර වන විට වරින් වර ජලය පානය කිරීම වඩා සුදුසුයි.

ක්‍රීඩකයන්ට

ශරීරය අධිකව වෙහෙසන ක්‍රීඩකයන්ද වතුර පානයට වැඩි ඉඩක් දිය යුතුමයි. නිතර දහදිය පිටවන නිසා ඇතිවන විජලනය වැළැක්වීමටත් වතුර පානය කිරීම වැදගත්. ව්‍යායාම් කරන අතරතුර ලැබෙන විවේකයෙදි (විනාඩි 15 - 20 පසුව) 150ml ත් 300ml අතර ප්‍රමාණයක් ජලය පානය කරන්න. ව්‍යායාම හෝ ක්‍රීඩා කර අවසන් වූ විට තම බර මැන බලා ශරීර ස්කන්ධයෙන් අඩුවන සෑම බර කිලෝ 1කටම 1.5L ක් වත් පානය කරන්න.

වඩාත් සුදුසු ජලය

මලබද්ධයට, වකුගඩු රෝගවලට වතුර පානය දිව ඔසුවක්. සිරුරට ප්‍රාණවත් බවක් ලබාදෙමින් සමේ වියළීම වළක්වාගෙන තරුණ පෙනුම රැක ගන්නත් ජලය අත්‍යවශ්‍යම සාධකයක්. නමුත් වඩාත් සෞඛ්‍යාරක්‍ෂිත වන්නේ සිසිල් ජලයට වඩා උණු කර නිවාගත් ජලය පානය කිරීමට හුරුවීමයි. එහි විසබීජ නටන උෂ්ණත්වයේදී නැතිවීම මෙයට හේතුවයි. නැත්නම් සිසිල් ජලය හෝ උණු ජලය පානය කිරීමෙන් වැඩි සෞඛ්‍යමය වාසි ලැබේ යැයි සිතීම නම් සත්‍යයක් නොවේ.

උපුටා ගැනීම මව්බිම